Pathau mik va song tong abih gauk! ! Lac anek di bangsa Ba Na, ndik tapui song prong tagok di  xã Ngọc Bay, ban  sit Kon Tum, tỉnh Kon Tum, yaok pluh thun tapa meng hatai takre cồng chiêng song cong khin khik ramik, patagok hu nghệ thuật cồng chiêng dalam rai duik yaok harei, nghệ nhân A Biu hu nao tal dom puk palei, tal dom sang bac piah pato  cồng chiêng ka rai rarah ranaih umo . Urang vak  Khoa Điềm, dok di bhum Tây Nguyên hu kadha vak khan tal urang nghệ nhân abih hatung hatai ni.

Sang bac Tiểu học Đặng Trần Côn, di xã Ngọc Bay, ban sit  Kon Tum hu jiak  700 adei anek saih, tong abih jeng lac anek kamuan di bangsa takik Ba Na. Bruk njauk biai di sang bac ni lac tong abih anek saih biak takre saong thau tong chiêng, tamia xoang. Hadei di dom tuk bac chính khóa  song dalam harei canercar, harei adit  sap cồng chiêng hu yava tagok chreih chrai dalam mblang bein sang bac. Anai gru Đậu Thị Lan, akaok sang bac brei thau, Bruk tong chiêng hu sang bac khik ramik meng rilo thun ni mai song urang dang tabiak pato ka dom adei anek saih lac nghệ nhân A Biu.

 “Nghệ nhân A Biu  biak takre ilamu meng kan di urang bangsa drei. Ong hu duah pataom dom bộ chiêng, xoang biak lavik saman song hu ilamu pato veik ka rairah ranaih bruk taong chiêng. Song ni lac sa bruk biak prong pachreih ba anek saih nao tal sang bac.

Oh lac pato ka dom adei anek saih di sang bac Tiểu học Đặng Trần Côn saong dom thanh thiếu nhi dom palei dalam bhum thau tong cồng chiêng, tamia  xoang, nghệ nhân A Biu dok kham merat langyah brei thau ka halau gha song ilamu cồng chiêng piah ngak ka rai rah ranaih paglong hatai thau khik ramik patagok ilamu meng kan di bangsa Ba Na. Meng hu nghệ nhân A Biu pato tacei, rilo adei sit hu brei mboh bruk naih gheih di drei tapa dom mbang patom ilamu, nyaom pakacah, hội diễn yau adei  Y Việt Hương,  anek saih tal bac 4D, adei A Văn Thỉu, anek saih tal bac 5C... Abih di nyu nan lac adei  Y Thái Thị Kim Ngân, anek saih tal bac 6, Sang bac  Trung học Cơ sở Hàm Nghi tong hu  dàn chiêng 8 boh biak gheih. Adei  Y Thái Thị Kim Ngân, lac:

 “Anek pasram  tong chiêng meng tuk bac pakat  I song ong pato ka anek tong chiêng. Kadha bo anek tong lac kadha doh ru adei. Anek tong hu sa thun ye,  ong hu pato ka anek tong. Dalam kadha ru adei nan gheih di abih lac ragu ragam. 

Hu hatai anit ranam ilamu cồng chiêng song piah ka hatai ranam nan meda pambak prong, dui pachreih bhap bini, yaok pluh thun tapa nghệ nhân A Biu hu buh rilo pren yava duah thau hu suan yava di ilamu cồng chiêng. Ong eng drei duah gru bac megru song meng akaok sahneng hadah krah di drei ong thau ramik pasiam chiêng. Dom boh  chiêng khut tal tangin ong hu siam veik, jeng dom bộ chiêng hu sap glaong biar biak gheih. Bloh bruk ong padauk duik pablei drap ar nao tal huyện An Khê, tỉnh Gia Lai cang 5, 6 harei blei ka pahu bộ chiêng Klang Brông quý giá; atau bruk ong palua diuk anek padang ngak veik boh sang meng kan di  bhum Plei Klech, xã Ngọc Bay, ban sit  Kon Tum harei melam peih pambah mbang raok tuai  piah yaih khan ka ilamu Ba Na.v.v. urak ni oh dok lac bruk di taeng ong, bo jeng sa bruk hadah mbaok meta di urang Ba Na dalam bhum. Ndom ka hatai khin di drei, nghệ nhân A Biu brei thau:  “ Urak ni cong khin di abih lac ngak yau habar pato abih ka urang dalam sang, dalam bhum palei jang yau dalam sang bac. Ngak yau habar drei tacei ka urang thau ka yaom glaong sa bộ chiêng. Ni lac ilamu bangsa Ba Na. Po anit dok nao mai hu piah pato veik ka rilo menuac lac biak siam.

Ngan song nghệ nhân A Biu, cồng chiêng lac halau gha, lac sap ndommeng hatung hatian di  urang Ba Na. Bui sambai urang tong cồng chiêng, oh sambai jeng ba tabiak dak dalikan. Ndom anit gauk, ganong gauk jeng meng sap cồng chiêng. Piah khik ramik , patagok hu nghệ thuật cồng chiêng dalam rai duik yaok harei ye dom rai rah harei hadei brei hu hatai takre song cong khik ramik cồng chiêng. Ni jeng lac makna piah  nghệ nhân A Biu thun ni yam tapa umo  60 thun, min dok tari tarieng nao tal dom sang bac, tal abih palei angaok palei ala di ban  sit  Kon Tum, tỉnh Kon Tum pato cồng chiêng ka rai rah ranaih umo./.