Rilo sang bein di  Đồng Nai dok duh hatai kayua boh kayau pablei tết thun ni hu biak takik  kayua langik oh siam , abih di nyu nan lac boh kruac bung song boh paaok. Yaom lac , tui kuhria boh kayau meda tagok yaom kayua hu takik, min nyu oh pabak hu kayua baoh kayau hu biak takik. Urang vak  Xuân Lượng, dok di ban raya  Hồ Chí Minh hu kadha vak khan tal bruk ni : 

Di bhum pala kruac bung Tân Triều (huyện Vĩnh Cửu, tỉnh Đồng Nai), rilo urang nong brei thau  thun ni  sản lượng kruac bung trun khang, samu meteh tal labaih meteh hasit dut song tuk vak jiak si Tết thun bloh

Bein kruac bung saradang hala cam 2 héc-ta di ong Ngô Văn Sơn (palei Vĩnh Hiệp, xã Tân Bình, huyện Vĩnh Cửu) tui kuhria hu meng 13 tal 15 tấn, nan lac samu meteh dut song 30 tấn vụ Tết âm lịch thun dahlau. Tui ilamu di sa urang pala kruac bung lavik thun, ong Sơn brei thau, piah paik mek njauk tuk Tết Nguyên đán brei  ngak ka phun  tabiak bingu, min thun 2017 hu 2 bilan  6 ngak ka phun tabiak bingu njauk  tame tuk hajan khang dui atah, nan ye bingu bruk, tabiak boh oh rilo atau khut, jaruh boh.

Jiak di ni,  ong Sơn taduan hu rilo panuac caong blei, dalam nan hu panuac tapa điện thoại atau mai tapak di bein, min ong oh taduan panuac sinya, bo pablei dahlau ka dom urang krein randapt. Yaom kruac bung saradang hala cam thun ni nyu tagok, tuk vak bilan 11 tui saka ia bilan yaom nyu tagok labaih  1 triệu đồng/ sa pluh (12 boh)  song tui kuhria mboh dahlau, meda tagok gac mbiah tal Tết, min oh ginup pabak hu dut song sản lượng biak kurang (labaih). Ong Ngô Văn Sơn lac Tui hulin mboh meng ni tal  tết yaom kruac bung hala cam Tân Triều meda tagok  5 tal  10%,  lac  1 triệu 200 ribau đồng , Tết yaok thun yaom  800 tal 1 triệu đồng min. Meyah ndom lac yaom tagok piah pabak ka baoh takik ye oh ginup, kayua baoh nyu takik jang tal 2 binah ye bo yaom tok tagok hu 5 tal 10% nan ye nyu oh pabak ginup 

Bruk jeng oh siam jang ka phun paaok. Di dom bhum pala paoak prong yau Tân Phú, Định Quán, Long Khánh, Xuân Lộc, urang nong brei thau  vụ paaok thun ni jeng takik baoh. Tui ong Nguyễn Xuân Trung (palei  1 xã La Ngà, huyện Định Quán), thun ni langik oh ka siam, hajan prong dui atah tdalam bilan 9 meng bloh ngak ka phun tabiak bingu ndam baoh takik hu rilo ruak kik halak halin ba tal takik baoh, hu dom bein oh hu baoh hagait. Ong Trung lac: : Dom thun jaik ini mboh biak kan kandah, hangin, ribuk gam song abih di nyu nan lac dalam thun ni, hangin ribuk rilo, paoak oh tabiak bingu ndam boh hu, hu dom sang bein khat lihik meng  50 tal  70%,  hu sang lahik abih, meyah langik daok yau ni ye urang nong gleih glar lô.

Dreih yau nan, sản lượng di Hợp tác xã paaok  Suối Lớn (xã Xuân Hưng, huyện Xuân Lộc) jeng trun labaih 200 tấn dut song thun dahlau , tok hu labaih 300 tấn paoak dom janih pablei Tết.

Jeng kayua (ảnh hưởng di) langik tasik oh siam, hu dom bein paoak, urang nong brei ngak ka nyu tabiak bingu mbang ka 2, ngak ka bilan paik boh oh njauk tame tuk  Tết âm lịch bo laik tame tuk hadei tết labaih 1 bilan. Nan oh ka ndom tal mbang ribuk ka 11 meng bloh ngak ka yaok ribau phun paoak jaoh, jaleih, ngak ka sản lượng trun.

Labaih  30 thun pablei salih paoak,  ong Nguyễn Văn Xuân (dok di xã La Ngà, huyện Định Quán) brei thau, thun ni yaom lac hu jhul yaom blei tagok biak glong, min oh hu paaok piah blei. Yaom paoak  3 bilan hajan , urak ni meng  12.000 tal 15.000 đồng/1kg, paaok  Đài Loan yaom meng  25.000 tal  55.000 đồng/1kg, tagok khang dut song thun dahlau min kan hu pa-ok piah blei:

  Ngak  bruk blei paoak  dom pluh thun ni ye, min meng nan mai bahrau mboh thun ni kayua hajan ribuk gam gam , ngak ka baoh oh gam, nyu khut, nyu jaruk abih. Tui nan blei jeng oh oh pa-ok piah blei, ngak mbang pa-ok thun ini glaih glar lô .

Bruk njauk biai nan lac, thun ini lac thun ka 2 gam gam vụ boh kayau Tết di  Đồng Nai gaok kan kandah kayua hajan suan bilan. Puac thun 206, akaok thun  2017, langik oh siam ngak ka sản lượng boh kayau di Đồng Nai trun biak rilo, tal thun ni , khat lihik dok trak jang. Yaom lac tui kuhria mboh dahlau, boh kayau Tết thun ni meda tagok yaom jang biak rilo, min tok daong hu sa binah halei min, oh ba mai kein liba ka urang nong, kayua yaom tagok lo, boh kayau takik menuac blei ye khat lihik dok trak jang./.