Pathau mikva saong taong abih gauk!

Bruk jah tak glai di tỉnh Quảng Ngãi daok rah tabiak ralo saong daok patagok. Njauk caik hatai nan lac bruk meriak taneh pala glai di bhap bini saong dom mban khik iek glai dak harei dak ralo, ngak srau kadau puk palei. Tiến Công, urang pambuak bruk saong rayo sap ndom VN hu kadha vak brei thau ka bruk ini:

Mban khik iek dự án glai pacang caga khu đông huyện Ba Tơ daok gaok ralo kan kandah dalam bruk khik iek taneh glai hu jao brei. Tui quy hoạch, mban khik iek hu brei bruk khik caga 13.700 hécta glai pacang caga. Min urak ini, bhap bini puk palei daok lih mek 3.800 hécta piah pala glai sản xuất.    

Ong Phạm Thuần, Giám đốc mban khik iek dự án glai pacang caga khu đông huyện Ba Tơ, brei thau, bruk mek veik taneh glai bo bhap bini lih mek daok gaok ralo kan kandah saong oh ka langyah hu abih: “Urang ngak biak samar, jah tak bloh am cuh pala chip. Tuk drei tame tak klak phun pala ye njauk urang puac. Urak ini urang ndom lac urang oh hu taneh nan ye urang pala”.

Meng akaok thun tal ini, dalam tỉnh hu 20 mbang jah taK glai, lahik labaih 21,7 hécta. Gah kiểm lâm duah mboh 261 mbang vi phạm. Bruk meriak taneh glai di bhap bini saong dom mban khik iek glai daok lac bruk praong. Piah pasiam veik bruk ini, langiu di patagok bruk pasang iek khik caga glai, gah ngak nông tỉnh ini daok quy hoạch, salih veik dom taneh glai piah jao ka bhap bini pala drak.

Ong Nguyễn Đại, Phaok akaok Chi cục kiểm lâm tỉnh Quảng Ngãi, brei thau, Chi cục hu pala phun kayau praong piah ngak jalan neh rabha glai pacang caga saong glai sản xuất. Dahlau daih ngak meng geng bê tong, Biar, kan mboh. Anak tal hu thí điểm pala phun vành đai hijao.

Bruk jah tak glai di tỉnh Quảng Ngãi daok patagok. Bruk njauk meyai  di bruk ini oh lac urang jakar ngak bruk khik iek glai takik bo kayua bhap bini dalam bhum oh hu jien mek tame, oh hu bruk ngak piah duah jien, bat al bruk urang jah tak glai.

Kayua yau nan ye, jalan ngak suai lavik dalam bruk tui iek, khik caga ong patagok glai oh lac parilo biên chế jang ka gah kiểm lâm atau dom mban khik iek glai bo ngak yau habar piah bhap bini dalam bhum hu glai hu jien mek tame tani tanat meng bruk khik caga glai.

Ong Đặng Văn Minh, Phaok akaok UB bhap bini tỉnh Quảng Ngãi, ndom lac: “Urak ini duah bruk ngak mbang, dua jien mek tame ka bhap bini dalam bhum dự án nan lac siam abih. Meng jalan ngak lac khoán, pambuak bruk saong urang piah khik caga glai. Meyah oh ngak tui jalan nan, ye bhap bini tuk halei jeng saneng tok jah tak glai meng hu jien mek tame, meng pabak hu ka rai diuk di urang yau nan oh khik hu glai. Jalan ngak, sarak di Trung ương daong ka bruk khik caga glai, meyah oh ka ginup ye meda pok panuac likau daong gilac meng kadung jien karja tỉnh”

Brei ka bhap bini hu jien mek tame meng bruk khik caga glai. Ini hu iek lac jalan ngak hu kein laba bo tỉnh Quảng Ngãi pamaong tal piah glai hu khik caga khang kajap. Kayua lac tuk hu bruk ngak, hu jien mek tame meng glai ye bhap bini dalam bhum oh daok palai pajoa nao jalan diuk rai di drei./.