Pathau mik va song tong abih gauk! Meng kan mai, padai Cu Prêng dok ieu lac  padai puh hu kak kajap haong rai duik di urang  Pa Kô - Vân Kiều di huyện bhum ceik Hướng Hóa, tỉnh Quảng Trị. Dalam rilo thun tapa, mik va bangsa takik di labik ni daok kham merat khik ramik janih padai quý ni.

Jiak 10 thun ni mai, langiu di bruk pala dom janih phun bahrau hu kein laba glong, sang amuk Kăn Bên di palei  A Sói, xã A Túc, huyện Hướng Hóa bhian kaoh tabiak meng 1 tal 2 mẫu taneh ngak padai puh. Amuk Kăn Bên brei thau, janih padai ni  năng suất oh glong, min biak mbuan pala song lac janih phun lavik rai di yaok boh sang. 

Yaom lac taneh pala drak oh daok rilo, min ni lac janih padai meng kan di ong muk caik veik. Yau nan ye, yaom lac oh hu taneh min yaok thun jeng daoki pala ngak. Kayua ni lac janih padai quý piah ngak pandap alin, piah pok paling muk kei tuk  rija roya di bangsa drei.

Padai puh tamuh hu dalam lingik pandiak, dahlau deih bhap bini bhian pala di dom labik tapen takai ceik, tuk vak tamuh dalam 8 bilan. Padai yuak bloh piah ngak alak, tanek nduik pok kakuh paling dom pô yang, likau ka vụ hadei hajao mekre, anek taco ngak mbang hu ginup meda, menuac sia dalam palei jum patom gauk. Urak ni ngan saong taneh prong jiak 500ha, janih padai puh di urang Pa Kô – Vân Kiều di huyện Hướng Hóa daok hu darak pasa biak takre, jeng đặc sản dalam bruk du lịch ẩm thực. Meyah khik ramik song patagok khang kajap, kein laba, janih padai ni meda ba mai kinh tế glong. Ong Hồ Quốc Trung - Phó akaok jabat ngak nong song patagok palei pala huyện Hướng Hóa brei thau:

(Ngan song phun padai puh, tuk vak tapa di huyện Hướng Hóa mblang taneh pala trun kayua patakik taneh am cuh ngak puh. Min khol hulin dok kham merat hu panuac ka dom mban, ngành, dom pakat khik ramik nguồn Gen, jang yau lai tạo pajaih song patagok năng suất. Lingiu di nan jeng hu pathau khan ka bhap bini khik ramik song patagok pajaih padai ni, piah patagok ilamu bangsa drei.

Tapa dom rai khik ramik, padai puh di urang Pa Kô – Vân Kiều di huyện Hướng Hóa, tỉnh Quảng Trị hu rilo siam mekre bo dom janih padai cao sản kan si duk hu. Urak in, yaom lac oh dok pala ngak rilo yau dahlau deih, min bhap bini Pa Kô - Vân Kiều jeng daok kham merat khik ramik janih padai meng kan ni./.