Pathau mik va song tong abih gauk! Bruk salih bahrau thi cử tuk halei jeng hu menuac sia caik hatai sangka kayua nyu gaok tapak tal  bruk pakacah di  anek saih saong bruk pato pakai, ôn tập di dom sang bac phổ thông. Kayua yau nan ye, bruk dom mbang pakacah prong gam gam salih bahrau dalam dom thun jiak di ni, ngak brei oh takik menuac mboh gleih glar, duh hatai. Meng menuac pato tal urang bac jeng mboh glaih glar kayua oh hau daok salih bahrau yau habar tra. Mỹ Dung, urang vak di rayo sap ndom VN dok di ban raya Hồ Chí Minh hu kadha vak khan tal bruk ni.

            Dok hadar veik tuk bac tamat môn Toán tal 10 thun 2017, yaok rituh anek saih di ban raya Hồ Chí Minh haiy kayua  đề thi biak kan. Bruk salih bahrau ni ngak brei oh takik  anek saih mboh glaih glar, duh hatai. Bahrau ni, Sở pato megru ban raya Hồ Chí Minh brei thau meda hu rilo salih bahrau dalam bruk tabiak đề thi tame tal 10 thun 2018. Đề thi abih 3 môn Toán, Ngữ văn song Ngoại ngữ tui kuhira meda salih bahrau tapa bruk tagok dom  câu hỏi tui jalan tích hợp, liên môn piah tong yaom bruk bac da-a, sahneng duah di anek saih.

Sa mbang pakacah karei hu rilo salih bahrau ngak ka menuac sia biak sangka lac mbang pakacah Trung học phổ thông pakat negar. Hadei di 3 thun peih ngak, oh lac quy chế pakacah bo đề thi gam gam salih bahrau. Đề thi, bruk pakacah salih bahrau jeng hu makna lac anek sai, gru pato di dom sang phổ thông njauk “nduac pakacah” salih bahrau. Yau thun 2017, tuk salih meng pakacah tự luận tapa pakacah trắc nghiệm, anek saih song gru pato di dom sang bac phổ thông tok hu dom bilan piah caga. Tuk vak takik,salih bahrau rilo, oh takik gru pato mboh having akaok kayua piah salih bahrau bruk pato pakai, ôn tập chip lac bruk oh mbuan. Kayua yau nan ye, bruk bo rilo anek saih song gru pato duh hatai di abih urak ni lac mbang pakacah Trung học phổ thông thun 2018 hu salih bahrau yau habar, srau kadau rilo halei oh? Amuk Lại Thị Thắm, gru pato sap Anh, sang bac Trung học phổ thông Nhân Việt ndom lac:

 “ Salih dalam bruk thi cử lac bruk  njauk ngak. Min bruk salih bahrau brei hu jalan ngak cambaih laih , hu tuk vak parabha cambaih laih piah gah pato megru, rilo meng lac gru pato song anek saih hu tuk vak palagaih song bruk salih bahrau nan.

          Thau hu bruk gleih glar di anek saih song gru pato di dom sang bac phổ thông, Phó Giáo sư, Tiến sĩ Đỗ Văn Dũng, Hiệu trưởng sang bac  Đại học Sư phạm Kỹ thuật ban raya Hồ Chí Minh mboh lac, Mintri pato megru njauk caga ka nyu siam jang dalam bruk salih bahrau  thi cử jhui peih ngak gam yau tuk vak tapa.

 “Cong khin thun 2018 mbang pakacah hu salih bahrau tui jalan patagok dom jak jeng mek hu song pasiam dom điểm yếu jhui yau dom thun dahlau  gam gam salih bahrau ye oh hu. Lingiu di nan, mintri pato megru njauk samar brei thau bruk pakacah piah tuk anek saih tame tal 12 thau hu piah klah tatuak drei”.

        Tiến sĩ Hỗ Hữu Nhựt, Ủy viên Ủy ban Mặt trận negar  Việt Nam ban raya Hồ Chí Minh mboh lac, salih bahrau bruk pakacah lac bruk njauk, min ngak yau habar piah hu kein laba, oh lac harei ni salih bruk ni, harei deih salih bruk deih. Dalam tuk vak ba drei tame dunya yau urak ni, pato megru Việt Nam brei hu so sánh, bac megru ilamu meng dom negar patagok piah hu dom jalan salih bahrau ka nyu lagaih.

          “Bruk pato megru di negar drei jeng dok dalam bruk pato pakai di bhum ASEAN jang yau di dunya. Kayua yau nan ye, khol drei brei duah thau đề thi di dom negar dalam bhum song di dunya.”.

          Dom anek saih song dom sang bac  phổ thông biak huac dom srau kadau tuk jiak tal mbang pakacah prong. Nan ye, thei jeng cong khin lac, meyah lac hu salih bahrau hagait, mintri pato megru samar khan brei thau piah ka urang bac song menuac pato hu jalan caga ka nyu lagaih./.