Pathau mik va song tong abih gauk! 

Meyah hu mbang nao rivang dom bhum palei di tỉnh Sóc Trăng meng mboh hu rai diuk mbang ngui daok dang di mik va labik ni daok hadah hadai tagok. Mik va khan lac, meng hu jalan mbak puk palei hu padang ngak, daong ka bruk pajeng ba pandap panda hu mbaun lagaih, jhul kinh tế patagok, ngak brei salih bahrau mbaok meta di bhum palei pala yau harei ni. Urang vak Thạch Hồng, dok di bhum  taneran krong CL hu kadha vak brei thau ka bruk ni

Meng pasak xã Tham Đôn, huyện Mỹ Xuyên mai dom palei  Trà Bết, Cần Giờ atau Bưng Chụm dalam dom harei ni …tapen 2 gah jalan lac dom phun mai rak bingu kanjik katam. Dom boh sang praong siam song dom bein njam patam hajao mekre hu mik va pala piah pablei tết ngak brei bhum palei joa lange hadah hadai tagok. Ong Ông Văn Soai, sa urang taha di palei  Cần Giờ brei thau: jalan mbak puk palei hu tuh menyek, tuk bê tông, praong meng  2 – 3 m nao tal dom puk, palei atah bayah, palagaih ka bruk patagok kinh tế, ilamu, xã hội, ba bruk ngak, patruh eik patrun kathaot, khik kajap an sinh xã hội.

- Jalan mbak urak ni hu karja padang ngak biak siam. Palei Cần Giờ hu ngak hadei di abih, tuh bê tông biak siam. Urak ni nao darak ni deih biak mbuan.  Hulin hadar labaih 20 thun dahlau, cakon non njam nao pablei di ban Sóc Trăng brei padeih takai 5,6 mbang meng nao tal labik. Min urak ni hu menuac mai blei tal labik oh cang pajeng nao. .

  Meyah dahlau deih, mik va pala njam patam di dom palei dalam xã Tham Đôn abih dom tuk piah ba kaya nong tagok  pablei di pasak xã, huyện atau ban  Sóc Trăng, ye urak ni, meng jalan palei hu tuh bê tông, tuh menyek, mik va tok pala drak, pandap panda hu urang mai blei pak di labik. Tui nan, pandap panda kaya nong di mik va hu pablei di grauk labik dalam tỉnh saong dalam bhum.

Oh taeng hagait xã Tham Đôn, huyện Mỹ Xuyên, bruk padang ngak jalan palei hu tong abih dom puk palei di  Sóc Trăng sangka buh jien ngak. Thun bloh, xã  Long Phú, huyện Long Phú hu buh brei jien padang 2 jalan palei, mik va di labik ni biak bui sambai tuk hu jalan nao mai.

Ong Thạch Khuôn, sa dalam 13 boh sang hu mbang tui meng danak dak  tacei tangin nao gah jalan bê tông, praong 3m, atah labaih 4km tapak samu bahrau ngak salah bloh, pambuak pagam palei  Nước Mặn 2, xã Long Phú song jalan Nam Sông Hậu, labik nduac tapa huyện chreih chrai lac:

- Hu jalan bloh nao mai mbuan lagaih jang, dahlau deih lingik hajan ye oh nao mai hu. Urak ni mik va drei biak bui sambai. Ngak mbang pablei salih ni deih hu mbuan lagaih 

Ong Nguyễn Hoàng Thơ, chủ tịch Ubbhap bini xã Long Phú, huyện Long phú, brei thau, dom jalan palei di xã urak ni pabak siam ka bruk nao mai, jang yau bruk ngak mbang di bhap bini dalam xã. Meng nan rai duik di mik va dak harei dak tagok, daong ngak ka mbaok meta palei pala  Long Phú hadah hadai jang. 

- Hu pakat angaok buh jien padang ngak, abih di nyu nan lac jalan mbak  palei pala , hu daong patagok bruk ngak mbang, ngak huak di mik va. Mbaok meta di palei pala dak harei dak tagok.

Tui kuhria mboh di Sở jalan mbak pajeng ba tỉnh Sóc Trăng, thun 2017 meng bloh, dom palei pala tỉnh Sóc Trăng hu pasiam veik 255 jalan palei, atah labaih 356 km song ngak 52 boh tatua, tui yaom jien abih tih lac  460 tỷ đồng. Langiu di nan, dok hu pambuak bruk song Mban khik ramik dự án 2 peih bruk padang ngak  6 boh tatua dân sinh  dalam  Dự án padang ngak tatua song khik ramik drap ar puk palei (LRAMP). Taeng thun  2018 ni, sở jalan mbak pajeng ba Sóc Trăng daok pambuak bruk song dom puk palei peih bruk padang ngak jalan mbak palei pala gam song dom tanut palei pala bahrau . Tui kuhria meda ngak bahrau song pasiam veik 290 tatua, jalan, saong yaom jien abih tih lac labaih 457 tỷ đồng. Thượng tọa Lý Minh Đức, trụ trì baha Som - Rong (ban sit Sóc Trăng), urang quốc hội tỉnh Sóc Trăng mbang 14 khan lac, jalan mbak nao mai di Sóc Trăng urak ni pabak hu bruk nao mai di bhap bini bhum palei pala. 

Jalan mbak urak ini nao dom huyện, xã biak mbuan lagaih ye, lagaih ka dom adei anek saih nao bac, lagaih pajeng pandap panda kaya nong nao pablei. Ni jeng lac bruk hu Đảng song karja  sangka buh jien padang ngak.

Tal urak ni, Sóc Trăng hu jalan ôtô tal pasak dom xã. Meda lac dom sarak hukum di  Đảng, karja, bruk kham merat di  tỉnh Sóc Trăng hu ngak ka jalan mbak nao mai di palei pala dak harei dak tagok, dong jhul kinh tế Sóc Trăng song bhum palei pala oh padeih hadah hadai tagok./.