Ong Hồ Trường Sinh bangsa Cor, 62 thun, palei 3, xã Trà Giang, huyện Bắc Trà My nan lac sa dalam dom urang hu angan je dalam bhap bani bangsa takik di tỉnh Quảng Nam ka bruk cakrok patagok kinh tế glai. Meng tari taring, ong Sinh saong diuk anek hu ngak ka dom mbuan taneh thu lagu di xã bhum ceik Trà Giang jeng dom glai keo hijao, brei jien mek tame yaok rituh triệu đồng yaok thun. Langiu di nan, ong Hồ Trường Sinh daok lac urang bak hatai anit ranam anek manuac tuk halar hatian taduan raong urang taha daok sa drei saong uranaih metui medhar di puk palei.

Atah di ini jaik 20 thun, sang ong Hồ Trường Sinh lac sang kathaot di xã Trà Giang. Taneh mbuan ceik di xã Trà Giang prong min oh siam, ralo patau randaih, biak kan pasiam veik piah pala phun kayau, kayua nan ye yaom lac luac thun pambuak pagam haong hamu apuh, sang ong Sinh jeng oh ginup mbang. Thau tal phun keo meng Dự án pala bahrau 5 triệu héc ta glai di Raja-ei akaok dom thun 2000 piah me-om hijao mbuan taneh kalu, ong Sinh patak pataom hu ralo ilamu pala, mong iek phun keo saong mboh hu pren khang di janih phun pala ini angaok dom bhum taneh thu lagu. Yau nan min, di tukvak nan kayua oh ka hu sang mac ngak dăm keo nan ye phun keo tal umo thu hoạch oh hu labik pablei tani tanat, yaom kaom tuk trun tuk tagok.

          Thun 2005, tuk hu ralo sang mac ngak dăm keo peih tabiak, ngak ka yaom blei phun keo tamo tagok jang, sang ong Hồ Trường Sinh khang hatai nao mesre phun jien di gilang pariak 50 triệu đồng piah pala bahrau 5 héc-ta keo. Hadei di 6 thun buh pren iek glang, dom mbuan keo di sang ong Sinh mek hu rilo kayau. Hadei di kaoh abih phun jien buh tame saong bayar sre gilang pariak, ong Sinh patui veik pala gối vụ saong peih prong taneh pala phun keo, urak ini tagok tal 25 héc-ta. Langiu di nan, sang ong daok pala pablak dom janih phun katut harei yau bei plom, menaih pambuak haong raong menuk, pabui glai, limo piah mek katut raong atah. Jien mek tame kuhria rah tapa yaok thun di  sang ong Sinh meng bruk cakrok kinh tế glai labaih 400 triệu đồng, ba bruk ngak ka 10 urang dalam palei.

Dua thun mai ini, sang ong Sinh daok salih tapa ngak dịch vụ tuk blei 1 sruh radaih ô tô tải yaom labaih 600 triệu đồng piah pajeng pah keo mai tal dom sang mac, blei 2 sruh radaih ô tô sit ngak du lịch, ndam likhah pambuak haong bruk ngak ndam, ngak mbang huak duh ka dom ndam di bhap bani dalam xã. Oh lac ngak kinh tế jioi, ong Hồ Trường Sinh daok hu mikva dalam palei anit ranam, iek praong tuk taduan raong sa urang taha daok sa drei saong sa uranaih metui dalam palei. Nan lac amuk Huỳnh Thị Dế, umo 90 thun, oh hu labik daok, hu sang ong Sinh taduan raong meng 20 thun ini mai. Adei Hồ Thị Bé, metui amaik ame tuk bahrau 4 thun jeng hu sang ong Sinh taduan mai raong.

Phaok akaok Ủy ban bhap bani xã Trà Giang Đoàn Ngọc Minh brei thau: ong Hồ Trường Sinh lac kareih camin ngak mbang palei salih naih jioi, hu Mentri ngak nong saong patagok palei pala pok brei harak meyaom ka bruk cakrok patagok kinh tế glai. Yaok thun, tame vụ pala glai bahau, sang halei dalam palei hu rai diuk kan kandah jeng hu ong Sinh daong brei phun pajaih. Bac megru ilamo ngak mbang kinh tế di ong Sinh, ralo dam dara di xã Trà Giang ngak mbang hu meng mô hình trang trại raong glang pambuak haong pala glai. Meng labik lac urang hu angan je dalam bhap bani bangsa Cor, ong Sinh jak ba mikva dalam palei sanya oh lih mek taneh glai tamo; tah klaah ralo adat cambat tanarakun oh daok lagaih, padang palei 3 ralo thun gam mek hu angan palei ilamo./.