Yaom amriak kalu 2 thun dahlau biak glong, labaih  200.000 đồng/kg. Nan jeng lac tuk dom urang pala amriak kalu di  Đồng Nai chreih chrai, bui sambai di abih kayua nyu ba jien tame biak ralo. Min bruk bui sambai nan oh hu lavik. Amriak kalu gam gam laik yaom, trun daok 120.000, 100.000, 80.000, 60.000, song urak ni dok 54.000 đồng/kg. Tui yaom ni, tok ginup piah pah menuac paaik. Nan oh ka ndom tal, thun ni năng suất amriak kalu di rilo bein biak biar. 

Bein amriak kalu prong jiak 1 héc-ta di ong Trần Minh Sang daok di palei  Hưng Thạnh, xã Hưng Lộc, huyện Thống Nhất pala hu 7 thun song dok paik  boh. Thun dahlau ong Sang mek hu jiak 2 tấn amriak kalu asar, min thun ni tok mek hu 1/4, lac 500 kg. Yaom jien nan ong Sang tok ginup bayar ka urang paik boh. Ong Sang brei thau

  Thun ni hajan rilo, năng suất nyu trun. Tui kuhria tok mek hu 5 tạ, tui yaom amriak kalu yau urak  ni tantu khat. 

Jeng dalam thun bloh, 3 tấn amriak kalu asar di ong Thân Công Cường, palei Hưng Thạnh, xã Hưng Lộc hu  urang mai blei  yaom 120.000 đồng/kg min mboh yaom beir, ong Cường oh pablei bo khik veik cang yaom tagok. Bloh yaom nyu oh tagok bo gam gam trun, tui yaom ala 60.000 đồng/kg yau urak ni, tui kuhria  ong Cường khat jiak 200 triệu đồng:  

Hulin cong khin karja hu sarak dong ngak habar piah mik va diuk hu haong phun amriak kalu. Daok yaom yau ni mik va khat trak, oh kak kajap hu haong phun amriak kalu ye. 

Kayua huac yaom amriak kalu daok trun, nan ye rilo urang nong di  huyện Thống Nhất pala pablah kruac bung klik hajao dalam bein amriak kalu. Pala kruac bung yau brei mboh lac urang nong oh daok khin kak kajap haong phun amriak kalu tra.

Dreih yau nan, di  huyện Trảng Bom rah tabiak bruk urang nong jah klak phun amriak kalu salih tapa pala phun karei. Kurhia taeng xã Thanh Bình, huyện Trảng Bom, yaok pluh  héc-ta amriak kalu lihik abih kayua suan bilan, laik yaom, urang nong oh dok khin janih phun ni.

4 héc-ta amriak kalu dok brei boh di  ong Lầm Mã Phúc daok di palei Trung Tâm, xã Thanh Bình, huyện Trảng Bom jeng bahrau hu po jah klak meteh piah salihtapa phun patei cấy mô. Thun ni patei pablei tabiak negar langiu hu yaom glong, phun amriak kalu cagar veik oh ba mai kein liba , nan ye ong Phúc khang hatai jah klak amriak kalu , pala patei:

Kayua  thun ni mboh yaom biak beir,  năng suất amriak jeng oh hu hadom. Urak ni drei jah klak piah pala patei, kayua mboh rilo urang pala patei hu yaom nan ye drei jah amriak kalu pala patei iek.

Yaom beir, rilo urang nong di  Đồng Nai khik piah amriak kalu  cang yaom tagok. Min urak ni urang yau dok ala di angaok pui kayua oh yau hatai caong, yaom amriak kalu oh tagok bo dok gam gam trun ba tal mbuan si tavak sre di anak meta. Rilo menuac dalam sa atau dua adit ba amriak kalu tabiak cambu piah amriak kalu nyu oh tamuh bimao, bruk ni oh lac abih pren ngak bo nyu daopk lihik kilo.

Duh hatai jang, tui rilo urang nong, meyah yaom amriak kalu daok trun beir yau urak ni meda rah tabiak bruk urang nong klaak bein am riak kalu oh iek glang, pacang caga halak halin ba tal amriak kalu metai, daok takik taneh pala, trun năng suất song chất lượng. Ong Nguyễn Văn Trãi, xã Xuân Thọ, huyện Xuân Lộc duh hatai lac: 

Bruk buh jien tabiak iek glang urak ini lac bruk suh sah di khol hulin. Urak ni urang iek glang oh buh hagait pabak tame, iek glang mbiah piah khik ka bein tani tant. Daok bruk pruh ia, buh khak ni deih, urak ni jeng takik, kayua buh rilo bo kein liba oh hu hadom jeng lac kan kandah ka mik va  .

Anak bruk amriak kalu oh njauk, laik yaom , Chi cục pala drak, khik caga phun pala, Sở ngak nong song patagok palei pala tỉnh Đồng Nai hu panuac kakei urang nong jhui tagok taneh amriak kalu min jeng oh pachreih bruk salih phun pala tui hatai khin di drei . Amuk Trần Thị Tú Oanh, Phó akaok Chi cục pala drak, khik caga phun pala  tỉnh Đồng Nai lac  

Băng 21s: Hu panuac kakei  urang nong oh peih prong taneh pala amriak kalu. Saong tỉnh dok ba tabiak bruk padang dom mblang hamu prong pambuak bruk pala saong pablei piah khik kajap labik pablei tani tanat ka janih phun ni. Abih di nyu nan lac bruk tacei pato urang nong pala amriak kalu saat jeng dok hu dom jabat  chức năng kham merat peih ngak piah paglong chất lượng amriak kalu pamong tal darak pasa xuất khẩu bahrau , hu yaom tagok glong .

 Dom thun jiak di ni, urang nong Đồng Nai yau randap haong dom panuac ndom nao ndom mai yau “laik yaom”, “giải cứu”, meng pabui, menuk, patei song urak ni lac amriak kalu. Meyah oh samar hu jalan ngak meng gah chức năng, urang nong jeng dok lac urang njauk khat lihik rilo di abih kayua yaom kaom kaya nong./.