Ndih tapui tabiak dalam sa boh sang oh ngak mộc thủ công,  min meng tari taring, saai A Lăng Brư umo 30 thun, daok di palei  A Lua, xã Dang, huyện Tây Giang, tỉnh Quảng Nam hu jak jeng song nghề mộc. Meng bruk ngak ni hu dong ka saai song boh sang yam tagok tabiak truh kan kathaot pak di palei drei. A Viết Sĩ, urang vak di rayo sap ndom Việt Nam hu kadha vak khan tal bruk ngak kaya meda di saai:

Lac anek di sa boh sang kan hu rilo adei saai, rai duik yaok harei di sang A Lăng Brư tok cong tame hamu puh. Kan kandah, kurang rilo janih, A Lăng Brư klak bac biak avar piah dong ka amaik ame duah jien.

Thun 2001, A Lăng Brư tut angan nao bac  bruk ngak mộc 3 bilan di huyện Hiên (klak ) urak ni lac huyện Đông Giang, tỉnh Quảng Nam. Bac bloh saai likau nao tui dom saai, dom cei piah pabak ilamu jang saong piah duah hu jien dong ka amaik ame. Tuk nan, huyện Hiên oh hu điện, jamriak  ka nghề mộc biak kurang  nan ye bruk ngak biak gleih glar. Rah tapa rilo bruk ngak krei di gauk piah duah jien song patak patom phun jien, puac di abih, A Lăng jeng mai veik haong bruk ngak mộc bosa-ai hu bac megru. Saai nao mesraiy di karja 20 triệu đồng mai blei mac cưa, jamriak bào –braoh piah yam tagok meng nghề mộc. Saai  A Lăng Brư Klah khan lac:

Hadei di tuk bac bloh 3 bilan mộc hulin mai ngak. Tuk camereip gaok biak rilo kan kandah ka jamriak , điện …ngak oh samar hu. .Urak ni siam jang biak rilo, ngak bruk jeng hu samar jang. Lin oh lac ngak  sang , bo dok ngak khaghe ndih , ngak tu tui hatai khin di urang blei,, urang ba kayau mai tal sang piah lin ngak. Karja xã biak sangka, bhian hu panuac kakei brei kham ngak song dong gah jamriak. Rilo urang tui lin ngak, lin jeng abih hatai tacei  pato , dong ka dom adei di puk palei duah hu jien hasit sarak.

Meng kham merat, tari taring, nghề mộc di A Lăng Brư dak harei dak tagok siam lagaih. Đơn hàng meng mik va dalam huyện song dom  huyện karei dak harei dak rilo. Dom boh tu , kaghe ndih hu ngak tabiak meng plak tangin gheih di saai hu mik va biak takre. Yaom lac đơn hàng rilo min saai tuk halei jeng kham merat jao njauk harei piah padang hu hatai jia dalam mik va. Urak ni, meng  nghề mộc yaok thun sang saai mek tame hu labaih 100 triệu đồng.

Oh lac yam tagok tabiak truh kathaot ka drei, A Lăng Brư dok hu ba bruk ngak ka rilo dam dara dok dalam palei. Saai bayar jien ka jang, meng 150 tal  200 ribau đồng yaok harei. Saai Hốih Nang, daok di palei  A Đâu, xã Dang, urang ngak bruk song saai  Brư brei thau:

Hulin bahrau tui ngak song saai Brư, labik halei drei oh ka ngak hu, ye saai abih hatai tacei pato piah ka drei gheih tangin jang. Lingiu di nan, saai  dok samgka tal rai duik di adei saai jang tra.

    Saai Coor Lúp, Phó Bí thư Huyện Đoàn Tây Giang, tỉnh Quảng Nam daok brei thau lac” “Tapa  jalan di Đoàn hu dong brei mesraiy phun jien, urang đoàn  dam dara halei khin ngak  kinh tế boh sang atau peih prong bruk ngak mbang ye meda mesraiy meng 50-100 triệu đồng. Tapa tui iek di khol hulin urak ni hu 5 xã dok peih bruk brei mesraiy phun jien tui jalan  di Đoàn. Ngan song saai Brư ye hulin tong yaom biak glongbruk kham merat ngak mbang di sa-ai. Urak ni pandap  di saai ngak biak mekre song hu rilo menuac mai duah blei, duah sa-ai ngak. Saai jeng hu ba bruk  ngak  ka dam dara dalam palei, hulin jeng cong khin dom urang  đoàn, dam dara karei njauk bac megru bruk kham merat yam tagok patruh kathaot di saai A Lăng Brư, piah patagok kinh tế, oh dok eik lipa tra.”

    Meng hatai kham merat yam tapa kan kandah di drei, A Lăng Brư hu tabiak truh kan kathaot meng nghề mộc pak bhum palei di drei. Saai lac kreh camin hadah piah ka dam dara Tây Giang bac megru, ngak tui./.