Sang muk Nguyen Ngọc Lệ daok di tổ 4, phường Nghĩa Phú, ban sit Gia Nghĩa pala bingu cúc meng lavik mai. Jien duah hu meng pablei bingu yaok bilan meng 30 tal 40 trieu dong. Tuk jaik tết, sang muk biak jar var haong bruk ngak. 6 urang dalam sang parabha gauk tui iek labaih 200 ribau phun cúc Da Lat saong labaih 1.000 phun bingu ly piah sumu pablei ka urang, ka dom darak hu kakei dahlau. Tui yaom pablei 2.500 đồng sa phun bingu cuc, meyah bingu rak njauk tuk tết, sang muk Lệ  meda duah hulabaih 300 trieu dong.

          “Yaok bilan, atau tết jeng yau nan, dahlak pala bingu pablei hu rilo, hu tuk oh daok binguk piah pablei. Raok tết thun ini sang pala 200 ribau phun piah pablei dalm tỉnh, kham tui iek tani tanat piah bingu raak gheih mekre pablei ka mikva.”

Jeng daok dalam kapul pambuak bruk pala bingu di phường Nghĩa Phú, bilan bingu tet thun ini, sang ong Mai Xuân Khai pala jaik 2 pluh ribau phun cuc dalam lồng. Tukvak ini, dom urang dalam sang jeng pataom tame iek glang bingu meng 5 tuk page tal melam. Meng hu rilo thun pala bingu, yau nan ye dom bruk yau buh khak, pruh ia, pasiam nhiệt độ dalam lồng hu ông Khai ngak biak siam.Ong lac, Tết ini, meda pablei tabiak darak binguk cuc biak mekre, siam:

“Dahlau daih tuk mikva pala caphe ye raidiuk kan kandah rilo, hadei di tuk salih janih phun pala kayua ban sit saong phường pambuak gauk daong ka mikva meng pajaih tal nhà vòm nan ye raidiuk bhap bini cak rok saong patagok. Meda lac pala bingu duah hu jien rilo, min  abih rilo tukvak tui iek, jru tavao, min jien mek tame rilo.”

Kapul pambuak bruk pala bingu ini hu padang tabiak meng bruk daong di Ub bhap bini phường Nghĩa Phú. Meng yaom jien buh tame 100 trieu dong tuk camereip,  hu daong ka mikva ngak randap haong bruk pala bingu dalam sang lồng. Yaom lac taneh pala daok takik, bahrau hu sa hecta, kapul pambuak bruki pala bingu phường Nghĩa Phú lac labik pablei bingu ka ban sit Gia Nghĩa, ngan saong rilo janih. Dalam nan, ralo meng lac bingu Cuc Chi trắng, Muống hồng, Tia sao, Vàng Đài Loan, Tím sen, hoa huệ saong cẩm chướng.

Muk Lê Thị Sáu, akok Kapul urang ngak nong phuong Nghĩa Phú brei thau, labik ini dahlau diah pala caphe lavik thun, taha. Ngak tui bruk salih janih phun pala, khang hatai pala bingu dalam sang lồng, meh hu kien laba. Hadei di tuk nao rivang iek dom labik pala bingu di ban Da Lat, hu pasram ilamu pala bingu, kapul pambuak bruk hu palih ruah dom pajaih bingu lagaih, ba dom ilamu tame ngak tui, nan ye jien mek tame di kapul pambuak bruk dak harei dak tani tanat saong patagok. Muk Lê Thị Sáu brei thau, mikva urang nong labik ini caong khin peih praong bruk pala bingu, piah phường Nghĩa Phú hu jeng palei pala bingu yau dom labik karei di ban Da Lat.

Daok labaih sa adit tra tal Tet nguyen đán Mậu Tuất 2018, dom bein bingu di phường Nghĩa Phú,ban sit Gia Nghĩa, tỉnh Đắk Nông daok hu tui iek tani tanat. Dom sang dalam kapul pambuak bruk daok kham merat piah ngak ka bingu raak chroh njauk tuk tet, pablei hu yaom. Tui nan brei thau, pala bingu lac bruk ngak kinh tế di palei. Saong Nghĩa Phú meda jeng bhum bingu praong di ban sit Gia Nghĩa, tỉnh Đắk Nông./.