Hu mboh saong hu thau ka dom bala trak angaok jalan mbak kayua urang peih radaih samar oh njauk jalan, adei Vũ Thanh Sơn, anek saih tal 9C, Sang bac THCS Dray Bhăng, huyện Cư Kuin, tỉnh Đak Lak sahaneng ngak tabiak thiết bị thông minh peih radaih mô tô, nyu pacang peih samar, brei thau dahlau lac jalan gah anak oh lagaih.

Hadei di 6 bilan duah thau saong ngak iek, Sơn brei tabiak rai pandap peih radaih mô tô thông minh, hu 5 kadha siam lagaih lac: brei mboh saong thau radaih peih khang abih; duk iek pandap atah di radaih, trun ga, padeih tự động; thau radaih peih khang atau cadu; brei moh tanut xang di mìn hình; pandar xi nhan.

Pandap ini mek hu giải nhất di mbang pakacah roh duah dam dara saong uranaih tỉnh Dak Lak thun 2017, giải nhất mbang pakacah ilamu ky thuat dam dara tinh Dak Lak thun bac 2016-2017 saong uranaih pakat negar thun 2016. Adei Vũ Thanh Sơn khan lac:

“Yaok harei tuk dahlak tabiak jalan ye dahlak  mboh bala angaok jalan mbak biak rilo. Dahlak caong khin pandap ini hu dom jabat chuc nang, abih di nyu nan lac dom sang mac meda ngak pandap ini di dahlak pagam tame radaih patuh piah pasang eik peih radaih jeng yau brei thau lac hu pandap pacang gah anak.”

Jeng takre roh duah dom hagiat birau, karei, adei Nguyễn Trần Nhất Phi, tal bac 9B, sang bac THCS 19/8, xã Ea Tiêu, huyện Cư Kuin, tỉnh Dak Lak eng drei duah thau meng Internet ka công nghệ điện tử. Adei ngak hu Robot  pataom mek dhur mur ngak hacih sang danaok.

Birau ini, Phi duah thau saong ngak điều khiển pandap điện dalam sang tapa phone tangin. Meng hệ thống ini, tok pambuak haong phone tangin tapa bluetooth, bruk peih atau padam dom pandap điện yau gom menyek, kadik, tivi…mbuan ka urang pandar, abih di nyu nan lac urang taha, urang jaoh jo. Adei Phi khan lac, kayua eng drei roh duah nan ye gaok biak rilo kan kandah saong ngak oh jeng, min hu amaik ame adei sa-ai saong anai gru cei gru pachrei ba, dalak kham merat ngak hu.

“Camereip drei ngak khung di baoh sang dahlau. Hadei di nan bac ngak lap trình điều khiển saong duah thau dom thiết bị điện tử piah lagaih saong bruk pandar di sang. Tuk ngak hu dom mạch điện tử camereip ye oh peih hu ngak ka dahlak biak duh hatai. Hadei di nan dahlak hu menuac dalam sang daong, dahlak ngak hu siam.” 

Ngan saong Nguyễn Ngọc Hồng Ánh, anek saih sang bac THCS Cao Bá Quát, xã Cư M’gar, huyen Cư M’gar, tinh Dak Lak, kayua mboh amaik ame ghaih glar tuk tame bilan paik caphe, sahaneng duah ngak tabiak radaih tự động bruk paik, yeng palih, papaok caphe.

Hadei tukvak roh duah, hu bruk daong di anai gru, cei gru saong domn ayut, Ánh ngak tabiak sruh radaih hu prein khang 4 mã lực, hu cần gạt số piah peih radaih saong băng chuyền tự động pataom mek saong tame kadung caphe. Meng sruh radaih ini, bruk pataom mek caphe mbuan jang, abih takik tukvak jeng yau prein yawa.  Adei Nguyễn Ngọc Hồng Ánh khan lac:

“Tukvak ngak tabiak radaih biak suai lavik. Yau ye băng chuyền nduac tal labik pandok ye nyu taprah tabiak langiu, njauk brei ngak veik, radaih patuh yawa khang brei ngak ka nyu sit….Yaom radaih ini abih labaih 5 triệu đồng, dahlak sahaneng lac meda ngak tabiak rilo hu.”

Meng dom bruk dalam raidiuk, rilo dam dara di Dak Lak roh duah ngak tabiak dom pandap ky thuat. Meng nan daong dom adei patagok bruk roh duah jeng yau bruk takre roh duah ilamu khoa học, ba dom ilamu bac megru hu tame ngak piah ba mbuan lagaih ka raidiuk./