Pathau mikva saong taong abih gauk! Piah ramik veik gah ngak nông tui jalan paglaong yaom, patagok khang kajap; saong piah patrun kan kandah bruk pablei padai, brah dalam tuk darak pasar pablei kan kandah gam saong biến đổi khí hậu urak ini dak harei dak khang jang, tỉnh An Giang daok pataom tame salih janih phun pala, abih di nyu nan lac patagok phun njam patam an toàn. Phan Ánh – urang vak di rayo sap ndom Vn daok di bhum taneran kraong Cửu Long hu kadha vak brei thau ka bruk ini:

An Giang lac sa tỉnh lagaih ka bruk ngak padai, brah, dang akaok di bhum taneran kraong Cửu Long. Min dom thun jaik di ini bruk ngak padai brah gaok ralo kan kandah, kayua thâm canh tăng vụ, saong kayua biến đổi khí hậu nyu ngak kan kandah tal bruk patagok di phun padai. Bruk ngak padai 3 vụ ralo thun daok ngak patrun dinh dưỡng dalam taneh meng nan ba tal yaom jien buh tame ngak glaong oh ba mai kein laba ka urang nông. Meng dom kan kandah ini, gam saong darak pasar pablei brah daok gaok kan kandah, piah patrun kan kandah bruk pablei padai brah, An Giang hu salih meng pala padai tapa pala dom janih njam patam, salih padai 3 vụ tapa pala phun mbang baoh karei brei năng suất saong kein laba glaong jang. Abih di nyu nan lac dom bhum lagaih ka bruk pala njam patam yau: huyện An Phú, huyện Tân Châu, huyện Chợ Mới…

     Tui ong Trần Văn Chương, sa urang di tổ pambuak bruk pala njam an toàn Kiến An, xã Kiến An, huyện Chợ Mới: dom janih njam patam di labik ini meblah labaih meteh dom taneh di xã. Ini jeng lac labik hu taneh pala njam patam praong abih di Chợ Mới saong dalam tỉnh. Dalam 12 palei ye 5 palei hu padang labik pala njam. Dalam nan ralo meng pala tui harak pambuak bruk saong tui darak pasar, yaok harei pablei hu meng 1 tấn meteh tal 2 tấn njam. Ong Trần Văn Chương brei thau:  

 “Di Kiến An kol dahlak daok pala labaih 20 janih njam patam saong 15 janih baoh karaoh. Urak ini dang khang lac lasun saong hẹ, bruk pablei tabiak jeng tani tanat, urang nông kol dahlak jeng kham merat ngak kaya nông hacih”.

 Min, piah salih tapa pala njam patam angaok taneh padai oh njauk lac salih pajaih phun pala ini meng sa pajaih phun pala karei, abih di nyu nan lac pala njam patam an toàn ye dak kan kandah jang. Kayua nyu pambuak tal ralo janih yau: kỹ thuật pala drak siam jang, urang nông brei hu ralo phun jien jang piah salih janih phun pala ini, cơ sở hạ tầng yau thủy lợi nội đồng brei hu siam jang; brei duah hu dom janih pajaih brei kein laba kinh tế, ginup pren merak gauk. Abih di nyu lac tuk pala praong brei hu darak pasar nan lac bruk biak praong. Ndom ka bruk ini, ong Cao Vĩnh Thông, akaok duk khik caga phun pala, chi cục khik caga phun pala An Giang brei thau:

 “Njam patam saong phun mbang baoh lac phun hu pren khang hadei di phun padai, urak ini phun padai oh hu kein laba tra piah salih tapa njam patam ye brei hu ralo yếu tố iah ramik veik bruk pala drak. Bruk ngak padai ye urang nông randap meng lavik mai, salih tapa njam patam, phun mbang baoh ye kan kandah jang yau: thủy lợi, jalan nội đồng; bloh ilamu pala drak di urang nông saong ralo janih karei. Daok kan kandah abih di An Giang urak ini lac tuk quy hoạch bloh ye bruk pablei sản phẩm lac biak quan trọng; brei pambuak bruk, bo pambuak bruk di doanh nghiệp saong urang nông brei khang kajap piah sản xuất hu kein laba jang”.

Urak ini tỉnh An Giang hu labaih 260 ribau ha taneh ngak padai. Tui Đề án ramik veik gah ngak nông di tỉnh, tal thun 2020 hu salih 20% taneh ngak padai tapa pala njam patam saong phun mbang baoh. Urak ini taneh pala njam patam bahrau hu jaik 16.000 ha. tui bruk ba tabiak, tỉnh brei ba 26.000 ha taneh tapa pala njam patam, dalam nan padang 5 bhum pala njam pablei ka dom tỉnh gah meraong saong pamaong tal bruk pablei tabiak negar lingiu. padang dom bhum pala njam tui jalan pambuak bruk pablei saong pala tui ilamu công nghệ glaong labaih 7.500 ha. 

Bruk salih meneing taneh ngak padai tapa pala njam patam lac piah patrun kan kandah ka phun padai dalam tuk darak pasar pablei gaok kan kandah yau urak ini lac bruk njauk ngak. Min brei hu jalan ngak siam, brei khik kajap bruk pablei tabiak, nyaik bruk lac njam patam pala njauk ye laik yaom yau dom janih phun pala karei di bhum taneran kraong Cửu Long./.