Pathau mik va song tong abih gauk! Dom thun  mai ni, bruk salih janih phun pala, athur rong  di xã Phú Vĩnh, ban sit Tân Châu, tỉnh An Giang tagok khang. Rilo sang salih taneh ngak padai takik kein liba tapa pala phun mbang boh ba mai  kein liba  kinh tế glong jang rilo mbang dut song pala  padai. Saai Tăng Tấn Hưng lac sa urang nao dahlau dalam bruk salih phun pala hu jak jeng meng phun kruac bung kanduh hajao yaok thun laba hu labaih 1 tỷ đồng. PHAN ÁNH, Urang vak di rayo sap ndom VN dok di bhum taneran krong CL hu kadha vak brei thau ka bruk  ni. 

         Sang  saai Tăng Tấn Hưng, xã Phú Vĩnh, ban sit Tân Châu hu  4 ha taneh pala padai. Dom thun dahlau deih, pala padai oh hu hadom, phun jien glong, min kein liba takik, yaom kaom oh tani tanat, nan ye rai duik gaok rilo kan kandah . Saai Hưng sahaneng lac, njauk ngak hagait piah tagok  kinh tế, salih rai duik di angaok mblang hamu ni. Tuk camereip saai salih dom mblang taneh pala padai tapa pala hareik rong limo, min oh hu rilo jang dut song pala padai.  Saai Tăng Tấn Hưng brei thau.

      - "Dahlau deih pala padai oh njauk, yaom kaom oh liba hadom, sa công laba labaih sa triệu đồng, bloh anek nao bac biak abih rilo jien drei salih tapa pala hareik , min nyu oh kein jang hadom.

Meng hatai takre ngak bruk, takre duah thau, saai Hưng nao bac megru ilamu pala phun mbang boh di rilo labik. Hadei di tuk roh duah, akaok thun 2013, saai khang hatai salih  3 ribau m taneh padai jeng taneh bein, saai pala labaih 400 phun kruc bung kanduh hajao, phun tamuh siam song brei  năng suất glong. Meng dom jak jeng di tuk camereip, saai peih prong taneh labaih 1 ha piah pala labaih 1400 phun kruc bung kanduh hajao.  Tapa labaih 3 thun pala, năng suất, sản lượng boh kruc bung dak harei dak tagok. Thun bloh bein kruac bung di saai paik hu labaih 25 tấn boh, tui yaom 40.000 đ/ sa kg, ba mai ka sang saai hu labaih  1 tỷ đồng. Saai Tăng Tấn Hưng brei thau:

       - "Nao rivang iek mboh urang ngak , drei mai ngak tui. Pala kruac bung gleih glar jang pala padai, pala padai ye saneng jang, min pala kruac bung nyu kein liba jang. Sa công kruac bung duah hu rilo jien jang ngak padai, pla kruac bung yaom kaom tani tanat, laba rilo hu jien jang padai   , urak ni labaih hu hasit sarak".

          Meng hatai kham merat yam tapa kan kandah, thau sahaneng, thau ngak, saai Tăng Tấn Hưng, hu jak jeng song bruk salih phun padai tapa pala phun mbang boh ba mai kein liba glong, ba sang saai yam tapa kan kandah, yam tagok ngak kaya meda. Rilo thun gam, saai Hưng hu pok meyaom lac urang nong ngak mbang pablei salih naih joi di tỉnh.  Urak ni, bruk pala kruac bung kanduh hajao di saai hu rilo urang nong dalam song langiu tỉnh bac megru, ngak tui.

 Oh lac ngak kaya meda ka drei, urak ni saai dok pabak pajaih kruac bung song tacei pato ka rilo urang nong khin salih meng taneh pala padai tapa pala kruac bung, dong ilamu kỹ thuật brei mik va pala, ngak.

       Ong Lê Thanh Tùng, Phó chủ tịch Ubbhap bini  xã Phú Vĩnh brei thau, bruk salih taneh padai tapa pala phun mbang boh di saai Tăng Tấn Hưng lac jalan nao njauk, lagaih song bruk rami ramik veik bruk ngak nong di xã. Dalam xã urak ni hu  1.300 ha taneh ngak nong, tal urak ni urang nong salih hu 25 ha taneh padai tapa pala phun mbang boh. Urak ni  Ubbhap bini  xã Phú Vĩnh dok jak ba urang nong peih bruk salih janih phun pala athur rong tui jalan  khang kajap ba mai kinh tế dalam tuk vak anak tal.

       - "Urak ni padai ngak oh hu laba song oh tani tanat, bo taneh pala phun mbang boh biak takik, dalam tuk vak tal khol hulin peih bruk jak ba, pathau khan, pachreih ba bhap bini, ngan saong taneh sit, ngak padai takik kein laba ye salih tapa pala phun mbang boh rilo jang, piah tagok jien mek tame salih bahrau rai duik di bhap bini”.

Kein laba meng bruk salih taneh padai tapa pala kruac bung kanduh hajao di saai Tăng Tấn Hưng peih tabiak jalan siam mekre bahrau dalam bruk salih taneh padai takik kein liba tapa dom mô hình pala drak kein laba glong jang. Tapa nan dong ka urang nong patagok yaom jien mek tame di sa mbalng taneh, rik dong tame bruk rami ramik veik gah ngak nong tui jalan patagok kein laba saong khang kajap./.