Ngan haong urang Ba Na dhal Rơ Ngao daok pak Đăk Hà (tỉnh Kon Tum), lễ hội uan sang rông bahrau saong lễ hội aia tanjaoh nan lac dua lễ hội prong dalam bhap bani. Lễ uan sang bahrau ye oh lac thei jeng hu cơ hội mong iek, kayua ralo urang menek tabiak jeng hu mboh tabung sang rông dang glaong di kreh langik tasik, dang tapak di kreh palei. Daok lễ hội tanjaoh aia ye rah tabiak yaok thun, saong thun halei mikva dalam palei jeng chreih chai kuhria caga saong mong akaok.

Bilan 12, bingu cúc quỳ rak kanjik katam angaok jalan meng jalan roya 14 tame tal palei urang Rơ Ngao. Tapen đò angaok kraong Pô Cô pambuak pagam palei haong puh di mikva oh daok thavi thavang, bak manuac urang nao mai yau dom harei mikva Rơ Ngao tame bilan yuak kuak. Nan lac tuk bilan ngak hu blaoh blai, tangeiy, padai hu ba tame ratang; lac tukvak urang Ba Na Rơ Ngao kuhria caga ka lễ hội tanjaoh aia.

Ong A Thak daok pak palei 4, xã Đăk Rinh, huyện Đăk Hà, tỉnh Kon Tum langyah brei thau: iew lac lễ aia tanjaoh kayua lac dahlau deih, urang Rơ Ngao hu pandar dom phun la-u glai, klaak abih tai atau phun lồ ô, phun la-a, pagam veik haong gauk, sa kaok klauk dalam tame mạch aia ngầm. Aia tui nan nduac mai palei. Ngan haong urang Ba Na Rơ Ngao, mạch aia ngầm nduac tabiak meng dalam ceik, halau aia meng gah angaok kraong, craoh hu makna biak prong ngan haong rai diuk di puk palei. Lễ hội aia tanjaoh di urang Ba Na Rơ Ngao bhian rah tabiak dalam 3 harei: Harei akaok mereip, taha akaok palei taong hagar dalam sang rông, iew taong abih bhap bani dalam palei pataom mbaok, rik padai brah. Tahanek meng padai, oh tahanek meng mì, ngak tabiak alak. Riak alak  blaoh, tabiak harei drei nao rao máng aia. Rao máng aia, mek darah pabui, ngak pabe, darah menuk, trun ala máng aia nan. Akaok meti, taha akaok palei meng iew Yang juai ngak brei aia thu, brei ka anek kamuan, bhap bani hu ralo pren yava, ngak mbang ginup meda, ngak padai hu padai, ngak tangeiy hu tangeiy. 5 urang kumei dara chaok aia akaok mereip, chaok aia bahrau nan ba mai sang Rông, tuh tame caik tapai di taha akaok palei. Blaoh blai meng tal bhap bani chaok mbang.

Urang kamei bahrau prong tagok, salut mbut. Taha akaok palei iew Yang blaoh blai meng chaok aia ba tagok sang rông, bhap bani meng trun chaok. Dom urang kamei nan chaok dahlau. Ba mai sang, tuh tame caik tapai di taha akaok palei. Taha akaok palei menyum, taha akaok palei jeng iew Yang pak nan tra. Taha akaok palei mek hatai pabui, ngak menuk mek hatai menuk uak tagok pabah caik tapai, iew Yang trun mai menyum tapai haong bhap bani, harei ini bhap bani dalam palei menyum alak tanjaoh aia. Yang jaik ndom haong Yang atah, trun mai sang rông menyum bui haong puk palei. Likau yang brei ka bhap bani khang tangin kajap takai, ngak mbang ginup meda, jap karo salamat. Blaoh di nan, taha akaok palei pok sap iew, taong chiêng.

Taha palei bahrau langkan blaoh, sap hagar cieng yava tagok. Dom vòng xoang hu peih tabiak saong dak harei dak peih prong. Dom panuac daoh bhap bani dui atah tal harei hadei saong harei hadei tra. Dom caik tapai hu dom baoh sang dalam palei kuhria caga biak tani tanat saong sang halei jeng hu ba tabiak abih. Taong abih bhap bani saong tuai damuai ba drei tame dalam không khí ngất ngây di men tapai, di hatai manuac.

Dalam harei ka 3 di lễ hội daok rah tabiak sa adat hu dom likei dam, kumei dara mong akaok. Nan lac palih ruah tabiak dom likei dam naih jioi, gheih tangin piah khik palei. Dom kamei dara mek aia padang dalam dom nding la-a tanjah tame dom likei dam. Bruk di dom likei dam nan lac biak gheih ghang, mek khiên pacang aia, klah pasah. Dom urang likei oh pasah atau pasah takik meda hu taha akaok palei palih ruah, jao bruk khik iek sang rông, khik caga puk palei tuk hu kaol khamang.

Harei ini, ralo palei urang Rơ Ngao oh daok pandar máng aia. 3, 4 baoh sang dalam palei takac saong pandar haong gauk sa baoh bingun aia. Yau nan min, mikva jeng daok khik hu adat cambat tanarakun di drei. Ong A Lú daok pak palei  Kon Gung, xã Đăk Ma, huyện Đăk Hà, tỉnh Kon Tum khan lac, máng aia di palei Kon Gung hu yah klaak atah di ini jaik pluh thun, min yaok thun, mikva dalam palei jeng daok peih ngak lễ hội aia tanjaoh: Meng kan, drei daok pandar aia tanjaoh, urak ini oh daok aia tanjaoh tra, min bhap bani dalam palei jeng daok khik adat cambat tanarakun di urang Rơ Ngao pak ini. Tui adat cambat, 1 thun dalam 12 bilan, mikva ngak hamu apuh, tuk yuak kuak blaoh, taha akaok palei peih ngak. Sang halei jeng hu ngak tapai. Tuk nan njauk pataom mbaok abih baoh sang dalam palei, yaok baoh sang rik daong tui adat di palei. Rik daong piah hu jien blei pabui, blei menuk. Thun halei jeng yau nan, bhian di nyu njauk tame bilan 11 nan lac peih ngak lễ aia tanjaoh.

Urak ini oh daok máng aia. Hu máng aia njuak nao pasiam, min oh hu máng aia ye nao ngak jalan. Kayua nao mek aia pak halei oh hacih, 2, 3 sang pandar haong gauk sa baoh bingun aia, nyu khut labik halei pasiam labik nan. Tal harei nan bhap bani thau nan lac aia tanjaoh, pataom veik menyum sa labik. Thei bui tal halei ye daoh dai, abih tuk brei adat ye gilac veik puk palei.

Dalam lễ hội aia tanjaoh, urang Ba Na Rơ Ngao tadhau ayuh gauk hu ralo pren yava, ngak mbang ginup meda, thun hadei hu ralo padai brah, tangeiy ratak jang thun dahlau./.