Pathau mikva saong taong abih gauk! Urang Raglai di Ninh Thuận, hu sa adat bo takik thei thau tal, nan lac adat klaak kubo. Ini lac adat  praong di abih, ndung bak ilamu meng kan di urang Raglai, brei mboh hatai anit ranam di urang daok daok diuk palao urang metai mai haongceik glai, haong ong muk, ong kei. Adat nan hu peih ngak yau habar, daa mikva saong taong abih gauk duah thau tapa kadha “Dom bangsa adei saai” adit ini:

Dalam dom adat cambat di bhap bini Raglai, adat klaak kubo hu bhap bini iek praong, kayua nyu brei mboh bruk ginreih ngan saong rai diuk tâm linh di urang. Adat hu peih ngak praong prang, brei mboh talei rohim di urang daok diuk saong urang metai, lac bruk iek glang luac di abih di urang daok diuk ngan saong gauk gar labik vĩnh hằng. Ong Chamaléa Tiến (umo 56 thun), urang hu angan je dalam bhap bini bangsa Raglai di xã Phước Thành, huyện bhum ceik Bác Ái, brei thau: “Urang Raglai jeng hu ralo ilamu, adat cambat tanarakun yau dom bangsa karei. Min, kadha praong dalam ilamu Raglai nan lac adat klaak kubo. Ini lac adat cambat meng kan praong di abih bo urang Raglai daok khik ramik.

Adat klaak kubo di urang Raglai bhian rah tabiak dalam tukvak meng bilan 11 di thun dahlau tal akaok bilan 4 thun hadei. Nyu hu peih ngak dalam 3 harei, ngan saong dom adat cambat karei di gauk. Dahlau di tuk peih ngak, bruk kuhria caga ka harei peih ngak adat hu abih gauk dalam sang ngak biak tani tanat, praong prang. Sang kubo hu padang tagok, hu trang trí bingu la, pandap piah paling yang yau kabau, limo, pabui, menuk…, hu baoh sang kuhria caga dahlau.. Peih ngak adat di sang kubo, dom gru ieu yang ngal adat daa suan yava urang metai mai saong baoh sang piah gam bui sambai saong taduan pandap pok paling hu gauk gar mbuat pajaih caik angaok talam sit nan hu 3 cavar alak, 3 jam ralo, 3 panyin hala paneng, 3 panyin brah, sa drei menuk tuk. Dalam tuk ngak adat, gauk gar dalam baoh sang ba gauk kakuh likau, caong brei ka suan yava urang metai hu siêu thoát, mai padeih padei saong ong muk, ong kei.

Urang Raglai diukrai jum pataom gauk, nan ye adat klaak kubo bhian hu ginup menuac dalam palei mai hu mbaok piah likau la urang metai. Mai ngak adat, mikva puk palei thei hu hagait ye brei nan, anek kamuan dalam sang rik pataom tame piah ngak adat. Dalam harei puac abih di bruk peih ngak adat, likau la urang metai, urang Raglai bhian peih bruk me-in sambai, daoh tamia, taong mả la bloh menyum alak di sang luac melam, ngak brei harei mebuk hatai jeng harei bui sambai, gam pan tangin gauk gam tadhau yuh ka gauk hu raidiuk siam mekre saong hanem phol./.