Meng dom rai ini mai, tal bilan 6, bilan 8, atau bilan 10 saka Cam, mikva Cam Bani hu ngak Kareh ngak Katal – nan lac adat trưởng thành atau daok iew lac adat tame Bani ka anek likei saong anek kumei umo meng 15 thun tagok. Ini lac sa dalam dom adat biak prong dalam rai diuk di urang Cam Bani. Tui adat cambat saong hatai sanengdi urang Cam Bani, njauk tapa adat ngak Kareh saong ngak Katal bloh dom likei dam saong kumei dara meng hu Po NaBi lac prong jeng manuac jeng urang, meng hu ngak  dom bruk prong dalam rai di drei.

Adat ngak Kareh ngak Katal di urang Cam bhian hu ngak dalam 3 harei 2 melam. Harei ka sa, manuac urang dalam sang caga khan ao, ngak kajang. Harei ka dua, sap gap baoh kayau har meneng yau patei, kamang, pei yaih… harei ka 3 lac harei ngak adat. Po sang daa taong abih gauk gar dalam palei mai pataom mbaok piah iek mong tukvak anek likei saong anek kumei hu Po NaBi lac urang prong.

Tui sang kaya meda atau mbiah ginup bo ngak Kareh ngak Katal ka anek di drei prong atau sit. Bhian di nyu po sang njauk caga ka yaok urang ngak katal ngak kareh sa thi patei, sa naih kamang, sa drei menuk tano saong sa drei pabe piah iew Yang.

Tuk lingik laik sup jeng lac tuk dom likei kumei tal umo dam dara pataom gauk veik pak sang Po Dhi. Likei hu  Imum Tal ba tame daok dalam kajang Katal, daok kamei hu amuk Buh ba tame daok dalam kajang Kareh. Tal page mesup harei hadei, tuk aia harei bahrau tagok, dom urang dang akaok dom likei kumei nan ba taong abih kol nyu trun kraong menei, raco ka nyu hacih duh sa. Ini lac kadha praong dalam adat ngak kareh ngak katal. Meng hatai saneng lac, aia kraong meda rao habih rup babhap, pahacih dom duis sa saong ba mai siam mekre ka anek manuac. Mai tal baoh kraong lac hadar veik halau gha di drei, khan brei ka po langik po tasik thau bruk praong jeng manuac jeng urang di sa rai anek manuac.

Dahlau di tuk ngak adat , sa urang likei pok sa anek kaman likei jaik 8 bilan tal sa thun nan lac anek taco dalam sang Po dhi, atau dalam gauk gar talei but pajaih po sang ngak adat, iew lac anek Po La Dhi (Pô-la-thì) tame ngak adat.

         Hadei di tuk menei raco blaoh pak kraong, dom likei kumei ini hu ba tame kajang, labik peih ngak adat. Pak ini, dom ong Car ong Imum  ngak adat brei angan ka dom urang ini. Angan nan hu mek meng angan dom Po Yang. Angar nan  hu pandar tuk metai nao. Patui di nan lac adat cakak klik quy đầu ngan haong urang likei. Dahlau diah, adat ini hu peih ngak biak njauk haong angan iew di nyu. Nan lac sa jalan ngak ndung bak ilamiu, daong ngak hacih sa-at rup babhap, siam lagaih ka bruk pajeng anek pajeng pajaih. Harei ini, adat ini hu ngak tượng trưng ka dom urang lilkei. Ngan haong urang kamei hu ngak adat cakak mbuk piah sanya oh ngak suan haong agama di drei. Ndom ka makna di adat ngak kareh ngak katal di urang Cam Bani.

Yaom lac daok tamo dom adat cambat dalam peih ngak Kareh ngak Katal, min dut haong dahlau diah mboh hu siam mekre jang, dui katut panak tukvak peih ngak.

Tamat bruk ngak adat, Po sang hu da-a lisei dom mikva, grauk gar dalam palei  hu mbaok mong iek  anek kamuan di drei hu Po Nabi lac urang prong. Tapa nan, dom likei dam kumei dara hu ngak katal ngak kareh nan hu mikva, gauk gar alin brei pandap. Kuhria meng ini nao, dom likei kumei ini hu jeng urang Bani./.