Dalam baoh sang sit daok di palei Cầu Lợi 2, ban sit Quy Đạt, huyện Minh Hóa, tỉnh Quảng Bình, anek taco sang ong Đinh Minh Kham, amuk  Đinh Thị Dụng daok ba gauk pok lisei daa amaik ame tui njauk adat cambat tanarakun hu khik ramik meng ralo rai ini mai di bangsa.

Yaom lac kaya meda atau kan kathaot min tal tuk puac thun, dom urang anek jeng eng drei ngak dom pandap mbang ba mai daa amaik ame piah brei mboh hatai hiếu thảo. Meyah oh ngak hu var lisei siam mekre tui adat cambat ye urang palei klau brei, thun barau patuah jamo oh tame sang. Adat nan meng kan mai hu caik veik tal harei ini. Di Minh Hóa daok hu rilo urang ndom karei di gauk ka asal di adat cambat ini, min yaom lac ndom yau habar, jeng ba tal sa bruk lac yaok thun tuk tame thun barau, dom urang anek gam saong gauk ngak talam lisei daa amaik ame. Oh cang ndom, bui sambai di dom urang ngak amaik ngak ame dalam dom harei ini. Maong yaok urang anek kuhria cag aka drei dom pandap mbang, dalam hatai dom amaik ame sambai lo. Daok urang ngak ame yau ong Kham, oh padauk hu  hanem phon. Meng lavik ye, tapen urang kamuan kamei, harei ini ong Kham chreih chrai taong tagok dom ragu daoh đồng quê.  

Ndaoh sang ong Đinh Minh Kham oh atah, tapen ging pui khuah meriah, ong Đinh Thanh Dự, urang thau rilo ka ilamu bangsa hu dak ralo dalikan ka adat daa lisei amaik ame di bangsa: lac urang anek ye tal harei nan, bilan nan, tukvak nan brei hu trách nhiệm pok lisei daa amaik ame. Brei nao duah ka pahu dom janih bo drei mbang tết yau habar ye brei ba ka amaik ame mbang. Nan lac bruk njauk ngak di anek, taco. Daok urang taha cang tal harei nan maong anek ngak lisei daa drei piah tapa nan thau lac urang anek nan nyu ngak mbang yau habar. Thun halei bo anek oh pok mai ye thau anek drei thun nan nyu ngak mbang glaih glar ye. Min oh mbuah anek bo anit ka anek ralo jang. Nan ye adat cambat ini hu sa makna ndung bak bruk anit ranam gauk biak ralo.      

Harei ini, “pok lisei báo hiếu” oh lac adat ta eng di urang Nguồn ban sit Quy Đạt bo daok pambak tapa dom labik karei. Ralo tộc người di dom huyện Minh Hóa, Tuyên Hóa dalam tỉnh Quảng Bình jeng hu bac megru tui adat cambat hiếu đạo biak hu makna ini dalam dom harei tết./.