Meng dom thun 80 di abap dahlau, hadei di tuk luai ngak lin mai veik palei, ong Niên dok ranaih umo, hatung hatai chreih chrai, panuac ndom nao gam song bruk ngak, ong hu mik va dalam palei anit ranam pok ngak Akaok kapul sản xuất, bloh pok ngak akaok palei. Tapa akaok abap 90, ong ngak akaok kapul mesraiy phun jien ka gilang pariak ngak nong song patagok palei pala di palei ong dok. Tal urak ni hu 25 thun, ong Niên umo labaih 60 thun, mbuk patih kok, pren yava oh dok khang kadang yau tuk daok ranaih. Min harei harei, ong dok ndua dua gah bara, gam ngak akaok palei gam ngak akaok kapul mesraiy phun jien, nao tal yaok boh sang tangi sua bruk ngak mbang, pachreih ba mik va ngak KT. Jeng hu tuk ong khin padeih padei, min mikva dalam palei dok khin ong ngak. Amuk Đào Thị Vuông, sa urang daok di palei Thái Vô, xã Xuân Quang, huyện Bảo Thắng lac:

Urak ni, pok menuac daok ranaih urang oh ngak hu, dok urang ndom nyai hu yau ong Niên ye dalam palei hu taeng ong Niên min. Kayua yau nan ye, menuac rilo min oh hu urang halei ngak hu..Ong Niên dang tabiak menyai ye urang pang tui. Yaok mbang pilih ruah akaok palei oh lac gleih glar hagait, thei jeng pok ong Niên, oh cang buh phiếu, je tangin dalam 3 minite ye salah bloh.

Palei Thái Vô urak ni hu 172 boh sang, labaih 700 menuac, dalam nan hu ¾ boh sang ginup meda. Tuk tabung glong, dalam palei hu 100 boh sang mesraiy phun jien abih tih tagok tal 18 tỷ đồng. Dahlau deih, dalam palei rilo meng lac sang kan kathaot. Meng hu dom sarak brei mesraiy di rajaei, di gilang pariak ngak nong song patagok palei pala gam song bruk jak ba di ong Niên, mik va dalam palei jia tui, pang tui. Bloh sang ni bac tui sang deih, pakacah gauk mesraiy phun jien ngak KT, livik livik harei hu tabiak truh kan kathaot yam tagok ngak kaya meda. Urak ni mai palei Thái Vô hu mboh sang halei jeng ngak KT, meng rong glang, pala drak tal pablei salih kaya nong, tuk halei jeng chreih chrai yau tame bilan yuak. Ong Trần Bá Niên khan lac:

Sahaneng tal bruk rambah rambup di mikva nan ye khol hulin sahaneng lac brei jak ba mik va mesraiy phun jien piah patagok KT. Lac sa urang jakar prong atau sit, tuk mboh bhap bini mesraiy jien song patagok KT siam ye urang halei jeng bui sambai. Kayua yau nan ye, khol drei brei kham merat, dong ka mik va  patagok KT boh sang.

Di palei Thái Vô, sang halei khin mesraiy phun jien, oh cang nao tal gilang pariak. Meng pasang iek, tacei pato tal tut angan tame thế chấp, peih brei mesraiy, tong abih bruk jeng taeng ong Niên dang tabiak pambuak bruk song urang jakar gilang pariak. Ngan song mik va, harak gar mesraiy tuk tapa tangin ong Niên jeng biak mbuan lagaih. Bruk bayar jien laba ka gilang pariak di dom boh sang dalam palei jeng kayua ong dang tabiak pachreih ba. Rilo thun gam palei di ong hu dang akaok huyện ka bruk khik ramik siam phun jien mesraiy, oh hu urang halei oh bayar sraiy, oh bayar jien jhung. Dom bruk nan ong Niên dok ngak yaok harei bo oh mbuah kan hagait, oh mbang jien ndo hagait. Amuk Nguyễn Thị Minh, Akaok gilang pariak ngak nong song patagok palei pala huyện Bảo Thắng brei thau:

Sa-ai lac sa urang jakar abih hatai jai song mik va. Oh huac jalan mbak atah bayah, harei melam hajan hangin saai jeng nao ngak bruk di sa urang  akaok palei, song hatai cong khin ba phun jien di gilang pariak mai ka mik va urang nong piah patagok KT. Meda lac kapul mesraiy phun jien di sa-ai Niên urak ni ngak bruk biak siam.

Meng hatung hatian khin daong ka urang oh thau gleih glar, ong Trần Bá Niên ngak ka urang mboh yau gilang pariak hu caik dalam palei. Ndom tal ong, rilo urang sahaneng chip tal sa urang akaok palei umo taha min daok abih hatung hatian ba jalan ngak kaya meda tal tong abih dom boh sang./.