Thun 2005, hadei di tuk bac tamat Cao đẳng sư phạm, saai Nguyễn Đức Hưng daok di palei Mỹ Trung, xã Phước Sơn, tỉnh Bình Định mai ngak bruk di palei. Langiu tukvak pato bac, pandar taneh bein di sang, saai buh jien tame ngak trang trại meng taneh ngak lac 1.400 m2 piah raong 9.000 drei menuk sang mek baoh pablei pajaih. Urak ini, trang trại di saai yaok thun laba hu meng 50 tal 100 triệu đồng, ba bruk ngak ka rilo urang ngak di palei pala. Kadha “ urang ngak hamu caong thau” harei ini, kol drei gam duah thau ka bruk raong menuk mek baoh di saai Nguyễn Đức Hưng.

      Tui saai Hưng, raong menuk yaom lac mbuan, min njauk lac urang tari tarieng meng jak jeng. Abih di nyu nan lac, tuk mek menuk pajaih mai raong palao ye njauk klauk jru caga dom ruak kum menuk ada, tả, tụ huyết trùng, phó thương hàn…saong gam gam pruh jru pametai anek ruak, khử trùng var raong. Praong di abih lac njauk hu labik pablei tabiak tani tanat. Dahlau si raong, dahlak hu duah thau saong mboah tangin tame pambuak bruk saong labik kram baoh meuk pajaih di puk palei piah hu labik pablei. Urak ini yaok harei, dahlak laba hu jaik 2 triệu đồng meng jien pablei baoh menuk pajaih, saai Hưng khan lac yau nan.

      Anak tal, langiu bruk paglaong chất lượng baoh menuk pajaih piah pablei ka dom labik kram baoh, saai Hưng meda buh tabiak 600 triệu đồng padang cơ sở, blei jamriak kram baoh ngak tabiak menuk sang pajaih piah pablei tabiak darak pasal. Labik raong menuk di gru Hưng daok ba bruk ngak gam gam ka 2 urang ngak di palei ngan saong yaom jien bilan 3 triệu đồng yaok bilan.

      Oh lac ngak meda ka sang drei, saai Hưng daok tacei pato alamu raong menuk ka rilo sang urang nong di puk palei piah gam saong gauk ngak meda. Yau ye sang Trần Long, Đỗ Châu Hùng, Cái Văn Thành… yaok sang raong jaik 3.000 – 5.000 drei menuk pajaih, laba meng 20 – 40 triệu đồng/sa bilan.