Palei Cam Búng Bình Thiên dok di xã Nhơn Hội, huyện An Phú, tỉnh An Giang, hu labaih 1.120 boh sang song 2.200 urang. Yaom lac bruk ngak mbang kinh tế dok gaok ralo kan kandah min mikva di labik ini biak thau anit ranam gauk, jum pataom gauk, dong ba gauk piah yam tagok dalam rai duik tui jalan lac “siam ka dunya mekre ka agama”. Sang halei jeng hu kakei ka gauk ngak siam tui dom sarak, hukum di Đảng song karja. Meng nan bo mbaok meta puk palei harei ni hu rilo salih bahrau. Khaol drei jak gauk nao rivang palei Cam Nhơn Hội dalam dom harei akaok thun bahrau ni, tapa kadha vak di Hanipha, urang vak di rayo sap ndom Viet Nam, dok di ban raya Ho Chi Minh.

 Nao tui jalan roya prong 956 di tỉnh An Giang, tapa dom mblang hamu prong abih labaih 30 minite nan lac tal palei Chăm Búng Bình Thiên. Dalam dom harei luac thun ni, palei Chăm yau bui sambai jang, kayua rilo boh sang nao ngak mbang atah mai veik palei mbang tết song gauk gar. Taphia di nan, hu karja brei mesraiy jien ngak mbang, dong rei pajaih, phun pala, anek athur bo labaih 115 boh sang di labik ni hu tapa truh kan kathaot. Nao rah tapa puk palei, khaol hulin hu mehit sap bac di dom adei sit dok kham merat bac hukum di madrasah dok tapen sang megik biak prong siam. Mik va Chăm mai veik sang danaok hadei di dom thun bilan nao ngak mbang duah jien, bui sambai kayua lavik harei hu taom gauk oh var tangi sua bruk duik anek, bruk ngak mbang. Angaok mbaok di yaok urang, thei thei jeng mboh bui sambai tuk hu mbang tết dalam bui samnai trei sil. Saai Rojaly, sa urang nao ngak mbang atah, harei ni hu mai veik palei mbang tết song gauk gar bui sambai khan lac: Hulin nao ngak mbang atah labaih 4 thun ni ye, hulin bahrau gilac mai palei mbang tết, mboh bui sambai kayua sang halei kuhia caga ahar, mứt, kẹo, sang halei kan kathaot ye hu karja brei brah, ia jamen song hasit jien piah bui sambai mbang tết. Sang halei hu điều kiện ye rami ramik brei ka siam jang. Lin gilac mai palei mbang tết mbang ni mboh sambai lo.

Tết thun ni, bruk bui sambai di mik va Cam palei Búng Bình Thiên hu tagok jeng dua mbang tuk bhap bini Cam hu karja di labik ni brei padang ngak sa boh sang megik bahrau song yaom jien labaih 4 tỷ đồng kayua Kapul Trăng lưỡi liềm đỏ dunya dong brei, tui kuhria hu ngak salah bloh di kreh thun ni. Hu labik mbang labik dok siam mekre, hu bruk ngank mbang tani tanat, urak ni mik va dalam palei dak bui sambai jang, tuk hu boh sang megik prong siam, dong ka mik va Cam hu labik sambahyang. Ong Yadoh, Naib jumah Khrigiah megik xã Nhơn Hội bui sambai brei thau: Uan tabuan Đảng song karja hu dong ba ka urang Cam khaol hulin, yau padang ngak sang anit ranam, duah bruk ngak ka dam dara, rai duik di mik va hu dak harei dak salih bahrau. Mik va Cham khaol hulin cong khin haduik siam ka dunya mekre ka agama, anit ranam gauk jum pataom song dom bangsa Kinh Hoa Khmer.

Bruk bui sambai chreih chrai uran raok thun bahrau anek sak saih hu pambak tabiak grauk labik dalam palei Cham di An Giang. Mik va di labik ni mboh biak sambai hatai, kayua thun halei mik va jeng taduan hu dom pok pandap ndung mbak hatai anit ranam, brei mboh bruk sangka di dom pakat karja di labik ni brei ka mik va. Ni lac sa bruk ngak siam dalam dom harei akaok thun bahrau, brei mboh talei rohim jum pataom, di dom bangsa adei saai dok dalam taneh ia Việt Nam anit ranam. Ong Rojaly, Phaok mban Đại diện Cộng đồng Islam tỉnh An Giang brei thau: Dalam dom harei tết tal mai, hulin mboh karja di labik ni biak sangka tal bhap bini Chăm, mik va biak bui sambai chreih chrai jia tame bruk tacei ba di Đảng song karja. Mik va khaol hulin cong khin haduik siam ka dunya mekre ka agama, oh phân biệt bangsa, agama halei. Dom boh sang kuhria caga song rami ramik piah uan raok tết song mboh tết thun ni sambai jang thun dahlau. Mik va Chăm khaol hulin uan tabuan Đảng song karja hu caik hatai dong ba

          Sa thun bahrau hu mai tal palei Búng Bình Thiên jang yau dom palei Cham di xã biên giới Nhơn Hội, huyện An Phú, tỉnh An Giang. Sa rai duik siam mekre song trei sil dok mai tal mik va di labik niyau brei mboh sa harei hadei hu rilo siam mekre jang./.