Dự án padang jalan talei pandiak pacang cakak bruk pablei salih menuac hu peih ngak di 2 tỉnh An Giang saong Hà Giang. Dalam nan, jalan talei pandiak pacang cakak tội phạm pablei salih menuac tỉnh An Giang hu caik di pasak công tác xã hội khik caga uranaih tỉnh ngan saong lait ieu oh abih jien 18008077, peih tabiak meng 7 tuk tal 21 tuk taong abih dom harei dalam adit piah pang saong khan brei ka dom urang caong thau ka tệ nạn pablei salih menuac..

Adei Nguyễn Thị Thu Thúy daok di ban sit Tịnh Biên, huyện Tịnh Biên, tỉnh An Giang brei thau, dalam tukvak tapa, kapul Liên hiệp urang kamei huyện Tịnh Biên hu peih dom tal pasram ka bruk pacang cakak tội phạm pablei salih menuac ka bhap bini dalam huyện. Tapa 3 mbang hu mbaok tame tal pasram megru hu ba mai ralo ilamu ka Thúy. Meng nan adei hu pathau khan veik ka yaok urang. Abih di nyu nan lac tapa lait tổng đài 18008077 adei hu pang, hu ndom dom bruk kan klah rabha saong urang tư vấn:

Băng: “Adei thau hu bruk kanjah jhak ye adei mai sang adei  khan ka baoh sang, ka  mikva thau kanjah jhak di bruk pablei salih menuac, nyu kateik greik rai diuk di drei tuk drei gam tame. Yau oh hu tự do atau metai. Meyah medil atau mboh dom urang pablei salih menuac ye adei khan brei dom jabat khik caga uranaih, kapul dam dara atau kapul urang kamei jaik di abih piah khik caga ka urang atau tapa jalan talei pandiak pacang cakak pablei salih menuac”.

Ngan saong dom jalan ngak karei di gauk yau pachot, cap mek, palua, likau anek raong atau ngak maha likhah caga trá hình di dom urang pablei salih menuac ye bhap bini mbuan jeng nạn nhân meyah oh hu pabak dom ilamu piah pacang cakak. Ong Nguyễn Trung Nghĩa, iek gah nghiệp vụ saong chuyên môn di pasak pambuak bruk pacang cakak tội phạm pablei salih menuac tỉnh An Giang daok dalam dự án padang jalan talei pandiak pacang cakak pablei salih menuac brei thau, dom bruk ngak di dự án hu peih ngak tal dom xã biên giới piah paglaong akaok saneng, thau kuhria caga saong hu mbaok tame đấu tranh pacang cakak pablei salih menuac ngak salih barau khang dalam akaok saneng di bhap bini puk palei:

Băng: “Hu mbaok tame dự án ini ye hu dom bruk ngak paglaong ilamu ka urang jakar xã, phường saong daong dom bruk pathau khan di bhap bini. Meng nan, dom urang hu mbaok tame bruk pathau khan hu peih dom var pathau khan brei bhap bini thau  ka bruk pacang cakak pablei salih menuac. Langiu di nan,  hu peih bruk ka dom nhóm, klup kapul urang vak daok ranaih di sang bac THCS Nguyễn Trãi, ban sit Long Xuyên piah dom adei hu mbaok tame pathau khan bruk pablei salih menuac”.

Ong Nguyễn Hoàng Khanh, giám đốc pasak công tác xã hội khik caga uranaih tỉnh An Giang brei thau, tui bruk ba tabiak di dự án, tỉnh palih ruah ngak iek 10 xã daok di dom huyện An Phú, Tịnh Biên saong ban sit Tân Châu piah peih dom tal pasram megru ilamu pathau khan pacang cakak kol pablei salih menuac. Tal urak ini, pasak công tác xã hội khik caga uranaih tỉnh An Giang hu peih 6 tal pasram megru ngan song jaik 200 anek saih ka ilamu pathau khan pacang cakak pablei salih menuac. Taphia di nan, peih labaih 50 mbang pathau khan tui kapul piah brei thau ka jalan talei pandiak pacang cakak pablei salih menuac di dom sang bac, dom palei dalam dom xã di dự án piah paglaong akaok saneng di dom rai rah bhap bini ka tệ nạn pablei salih menuac urak ini. Ong Nguyễn Hoàng Khanh lac:

Băng: “Kol dahlak pambuak bruk saong kapul urang kamei peih dom mbang pathau khan tui jalan sân khấu hóa piah pathau khan tal abih dom xã taphia negar. Bloh peih dom tal pasram megru ka bộ đội biên phòng di 12 đồn biên phòng dalam tỉnh piah paglaong ilamu, pambuak bruk hong dom urang pan bruk agama bangsa piah pathau khan pacang cakak pablei salih menuac. Urak ini ralo bhap bini di labik ini hu paglaong akaok saneng ka bruk pacang cakak pablei salih menuac piah urang hu ilamu khik caga anek kamuan di urang”.

Yau nan, gam saong bruk kham merat di karja puk palei, bruk daong di gah pambuak bruk dunya NB, bruk pathau khan pacang cakak pablei salih menuac di dom xã bhum taphia negar di tỉnh An Giang hu khan tal bhap bini. Tapa nan, akaok saneng di bhap bini ka tệ nạn pablei salih menuac dak harei dak hu paglaong. Ini lac jalan ngak biak siam biak praong dalam tuk pacang cakak saong jhul kadul likuk tệ nạn pablei salih menuac di dom tỉnh biên giới di taneh ia drei./.