53 tuổi, ông Điểu K’Bên hu ngak rilo bruk di xã Tiên Hoàng, huyện Cát Tiên, tỉnh Lâm Đồng. Ong nan lac urang hu angan je dalam bhap bini saong hu mikva dalam palei anit ranam. Hu bruk hagait, ndam metai lahik, lakhah paga tal bruk bac da-a di anek kamuan, thei jeng duah mai piah ong langyah. Mboh rilo mikva dalam palei oh ka thau bac jeng yau cih vak akhar huroh yau nan ye meng thun 2011, lac urang Bi thu Chi bộ palei 6, ong biai saong Chi bộ saong Ban bhap bini palei pasang iek veik taong abih dom urang halei njauk brei nao bac akhar hu roh. Hadei tuk pasang iek, ong likau Đảng ủy saong UB bhap bini xã Tiên Hoàng peih tal bac akhar huroh. Ong Điểu K’Bên hadar veik: “Mbiah tal bilan 9 thun 2013, tal bac akhar hu roh hu peih ngak. 32 mikva adei sa-ai dalam palei 6, taong abih urang nan lac bangsa Chau Mạ hu mai bac. Urang sit abih jeng umo 25 thun, daok urang umo praong labaih 50 thun. Yau nan ye, piah jak ba urang tame bac nan gaok ong lac takik kan kandah. Langiu di nan, kayua adat cambat, jalan sahaneng daok biar yau nan ye bruk bac da-a oh hu ginup tantu. Dahlak saong dom adei sa-ai di Chi bộ saong Ban bhap bini palei brei kham merat jak ba meng khik hu tal bac  ini. Yaok adit brei bac 3 melam, dam dara gam saong urang taha umo dalam palei jak gauk mai bac akhar hu roh.

Mbiah bilan 5 thun 2015, tal bac akhar hu roh hu tamat. Yaom lac, hu jaik meteh  dom urang tut angan nao bac hu brei harak chứng nhận bac tamat danak dak tiểu học min tal bac akhar huroh ba mai rilo kein laba ka dom urang tui bac. Ong Trần Thế Hùng, Akok UB bhap bini xã Tiên Hoàng brei thau: Yaom lac, urang bac tamat tal bac akhar huroh tok 14 urang min taong bih dom urang hu tui bac thei jeng hu thau bac, thau vak. Makna praong glaong jang, jalan sahaneng di urang nan kambruk bac hu salih birau. Dahlau diah, urang iek biar bruk bac di anek bik min urak ini hu salih karei paje. Rilo urang mboh drei bac hu oh min anek bik njauk brei bac akhar huroh”. Yau ye baoh sang sa-ai Điểu K’Xuân. Kayua umo taha yau nan ye oh bac tal bac akhar huroh nan min Điểu K’Xuân brei ka kumei saong dua urang anek tui bac. Mbiah tal ini, diuk anek Điểu K’Xuân brei ka diuk saong dua urang anek thei jeng bac hu, vak hu akhar. Langiu di nan, mbiah tal ini , taong abih uranaih umo tal thun nao bac dalam xã hu jak ba tame sang bac saong tỷ lệ anek saih klak bac meteh dhi daok takik.

Palei 6, xã Tiên Hoàng nan lac palei hu taiong abih lac bhap bini bangsa Chau Ma diuk rai. Dalam palei hu 46 baoh sang ngan saong 86 urang. Mikva ralo meng bruk pala pa-ok blait, padai saong raong glang. Ong Điểu K’Bên lac, kein laba ralo di abih tuk bac mbo tuc akhar huroh mikva dalam palei bac hu akhar huroh tacei pato bruk pandar khak drak, jru hareik piah ba tame pandar ka nyu njauk, thau tavak tuk bac dom tal pasram ilamu ky thuat, thau kuhria, patak pataom bruk blei cai dalam sang. Hu yau nan, raidiuk kinh tế dak harei dak cak rok patagok. Meyah dahlau di ini 5 thun, tỷ lệ baoh sang kan kathaot di palei daok jaik 30% ye urak ini trun daok jaik 11%.” 

Ngan saong bruk peih tal pato akhar huroh saong ngak tui danak dak pato phổ cập, ong Điểu K’Bên urak ini lac phó Akok UB bhap bini xã Tiên Hoàng saong UB bhap bini tỉnh Lâm Đồng alin Harak meyaom bruk naih gheih dalam bruk dak padang xa hoi bac megru. Ini lac, bruk ngak hu makna praong piah xã jhul pakhang bruk pato phổ cập dom pakat bac saong bruk pachreih bac, pachreih megru di tỉnh./.