Hadei di 10 thun peih ngak danak dak dong dom boh sang kan kathaot bangsa takik rong limo payeng gauk, Pasak pachreih nong tỉnh Đăc Lac hu dong ka yaok rituh boh sang tabiak truh kan kathaot.

      Yaok mesup, muk H’reng Byă (bangsa Ê Đê) daok di palei Ja Wầm B, xã Ea Kiết, huyện Chư M’gar, tabiak bein kaoh hareik, cakak pong lai cám brei ka limo mbang. Muk brei thau sang amuk hu 6 urang min jien mek tame yaok thun tok caong tame 4 sào caphe taha, nan ye rai duik biak kan kandah. Thun 2006, pasak pachreih nong tỉnh Đắc Lắc hu dong ka sang muk sa drei limo binai piah rong.

     Meng hu pasak pachreih nong tacei pato ilamu rong siam, hadei di sa thun, limo pajaih menek hu sa drei limo anek, sang amuk khik veik, dok limo maik hu ba tapa ka sang karei rong. Meng nan mbiah tal harei ni, sang muk H’reng Byă hu tapon limo 4 drei, yaom labaih 100 triệu đồng, hu pren piah iek glang bein caphe siam jang. Amuk H’reng lac “Meyah oh rong limo, oh thau tuk halei sang muk tabiak truh hu kan kathaot. Urak ni hu dom drei limo ye, khak limo mek buh brei caphe, nan ye bo sang oh abih jien blei khak, patak patom hu jien padai. Sang rilo anek bo oh hu dong ye rambah lo, oh tuk halei sahaneng lac drei hu pok jien prong yau nan”.

     Ong Y Răm Byă, Akaok palei Ja Wầm B, khan lac palei hu  90 boh sang, jiak 400 urang, rilo meng lac urang bangsa Ê Đê. Meng thun 2006, rilo sang dalam palei hu pasak pachreih nong tỉnh Đắc Lắc dong limo piah rong payeng gauk. Urang jakar pachreih nong huyện song thú y xã abih hatai tacei pato jalan iek glang, pacang caga ruak biak siam nan ye tapon limo prong siam. Gam song bruk patagaok rong glang, mik va daok hu pala drak. Meng nan, rai duik mik va dalam palei hu salih bahrau biak rilo, boh sang kathaot urak ni dok 7% min.

       Tui pasak pachreih nong tỉnh đắc lắc, dalam 10 thun tapa, Pasak pachreih nong tỉnh hu dong 30 drei limo menek ka dom boh sang bangsa takik kan kathaot di dom huyện Bôn Đôn, Chư M’gar song ban sit Buôn Hồ. Tui jalan raong payeng gauk meng sang ni tapa sang deih, danak dak ni hu dong ka yaok rituh boh sang tabiak truh kan kathaot.

     Ong Nguyễn Nhân, Akaok pasak pachreih nong tỉnh Đắc Lắc brei thau “Bruk ngak ini hu jak jeng yau nan, lac hu bruk sangka di urang dang akaok karja palei song meng kham merat di mik va. Bruk rong limo payeng gauk hu dong ka dom sang kan kathaot dalam palei khik hu phun jien di karja, rai duik di urang hu tanitanat. Rilo sang  oh hu drei limo halei ye urak ni, meng danak dak, hu 3-4 drei limo. Danak dak hu dong ka mik va patruh eik patrun kathaot./.