Gam tal bruk khuah nhà hàng karaoke glong 8 tal, angaok mạng samar hu sa blah thaot brei mboh urang dok huac samar nduac tabiak truh labik khuah, gam song rilo panuac ndom pang oh jeng ka sa anai kamei ngak dalam nhà hàng, pacang dhung nduac tabiak meng blah aow tasau di drei. Anai nan oh suan, suan lac dom urang kurang thau ilamu nduac tabiak truh labik bala, ndom tabiak dom puac oh siam, oh njauk. Rilo amaik ame biak dut hatai tuk anek kamuan di drei jeng hu panuac đã kích angaok mạng ka bruk ni. Nan ye, amaik ame song sang bac sa mbang tra biak caik hatai tal bruk pabak ilamu tabiak truh labik bala ka anek saih. Ong Lê Trường Sơn,  ame di anek saih daok di quận Tân Bình ndom lac:

(Băng 19s:  Salih ka bruk khol drei ngak tapak di dom thao trường biak, dom bruk yau biak, urang jakar pacang pandam khuah meda tacei ka anek saih tabiak truh labik bala ye tuk nan anek saih meng ngak krein hu rilo bruk biak. Bloh tuk gaok sa bruk halei nan, dom adei  meng samar ngak tui bruk hu tacei pato, tuk nan dom adei meda tabiak truh hu pui khuah. Salih ka bruk khol drei pato lý thuyết biak rilo di sang bac yau urak ni. 

Dom amaik ame karei ndom lac, urak ni dalam sang bac pato ka uranaih biak rilo janih, dalam nan hu dom janih bo hadei ni meyah  oh tui chuyên ngành ye klah nao. Dalam tuk nan, hu ieu lac “ phổ thông” ye njauk pato dom ilamu hu pandar rilo dalam rai duik . Saai Phạm Thị Minh Tâm, sa urang amaik daok di quận 1 lac: 

(Băng 22s: Di dom negar dalam khu vực, dom adei sit meng di tuk bac tiểu học hu thau cambaih dom bruk njauk ngak tuk hu patuh, khuah, megei boh taneh… Min di negar drei bruk pabak ka dom adei dom ilamu pacang caga, abih di nyu nan lac nduac tabiak truh labik bala oh ka hu sangka ralo. Njauk dong ka dom adei khik caga hu rup di drei dahlau, nan oh ka ndom tal bruk  dong ka urang karei.

Di ban raya HCM urak ni, hu dom sang bac hu dom var pabak ilamu tabiak truh labik bala ka anek saih min biak takik. Dalam tuk nan, di sang, dom amaik ame jeng oh ka taong yaom njauk ka bruk tacei anek dom ilamu tabiak truh labik bala, oh ka pato uranaih oh ngak brei pui khuah yau: jui brei uranaih main pui, điện, song dom pandap mbuan khuah patuh, oh parang pandap di dom pambah mbang tame tabiak dalam sang. Anai  Nguyễn Thị Thu Cúc, Hiệu trưởng sang bac phổ thông trung học Gia Định, quận Bình Thạnh brei thau

 (Băng 19s: Sang bac hu pato bruk ini ka dom adei, min piah ngak dom bruk praong yau biak ye khol hulin oh ka ginup pandap piah ngak. Hulin sahaneng lac khol drei samar hu talei pambuak bruk di dom jabat iek gah pacang caga khuah song sang bac piah hu dom mbang pasram siam ka dom sang bac.

 Tui kuhria mboh di mintri Công  An, yaok thun hu jiak 300 urang gaok bala kayua khuah, patuh. Dom mbang khuah saong urang gaok bala kayua khuah patuh dak harei dak rilo jang. Taeng di ban raya HCM, meng thun 2014 tal ni hu 1.467 mbang khuah, ngak brei 25 urang metai, 76 urang njauk rambuac. Meng dom bruk yau: khuah 2 nhà hàng karaoke di jalan Trần  Quốc Thảo - quận 3, ngak sa urang metai, rilo urang njauk rambuac , khuah sang phố di jalan Nguyễn Trãi, quận 5 ngak ka 7 urang dalam sang metai, khuah tiệm tạp hóa di quận 6 ngak ka 2 duik pasang metai, khuah cửa hàng parang iek pandap điện ngak ka 4 dam dara metai… brei mboh tong abih dom urang gaok bala njauk sauk pui ba tal metai kayua oh tabiak truh hu labik khauh. Bruk ni dak brei mboh njauk pato tacei ka yaok urang meng di tuk dok bac dom ilamu tabiak truh labik apui khuah.

Piah ba dom ilamu tabiak truh labik bala tame dalam sang bac, Đại úy Nguyễn Thị Hồng Thủy,  Đội trưởng Đội pathau khan bruk tong abih bhap bini pacang pandam apui khuah - Cảnh sát pacang pandam apui khuah ban raya  Hồ Chí Minh brei thau

(Băng 19s: Khol drei tong yaom veik hadei di tuk dom adei ngak trắc nghiệm, piah thaujalan halei lagaih haong dom adei. Hadei di nan, pambuak bruk song Sở pato megru ngak tabiak dom tài liệu ka nyu lagaih. Siam di abih njauk ba dom asar kadha INI tame pato yau sa môn chính thống atau tacei pato tui danak dak ngoại khóa ka dom adei, saong brei tacei  ka gru pato piah urang pato pakai siam jang, min palih ruah jalan ngak halei ye kayua Sở pato megru ba tabiak

Bruk chủ động di gah pato megru, gah công an song yaok boh sang dalam bruk pabak kỹ năng sống, ilamu tabiak truh labik bala ka anek saih lac bruk brei ngak chip, ngak samar tuk bruk khuah patuh dok mbuan rah tabiak yaok harei./.