15 thun tapa, hu jaik 250.000 mbang baoh sang urang kathaot, sang sarak karja  saong yaok pluh ribau anek saih– sinh viên di tỉnh Đắk Nông hu taom gaok haong phun jien  ưu đãi meng Gilang pariak Sarak karja. Mai meng bruk pandar jien phun njauk mục đích, hu hiệu quả, nan ye hu ngak brei jaik 46.000 baoh sang tapa truh kathaot. Hoàng Qui, Urang vak di rayo sap ndom VN daok di Tây Nguyên hu kadha vak brei thau:

Baoh sang amuk Nguyễn Thị Linh, daok di palei Xuân Trang, xã Đức Minh, huyện Đăk Mil hu rai diuk biak kan kandah. Dom thun tapa, sa drei amuk Linh njauk kiak hatian raong 9 urang anek saong urang pasang bhian njauk ruak hakik pandik harao. Dom urang anek di ong amuk kham merat bac megru nan ye mek hu thành tích glaong. Thun 2010, dua urang anek di ong amuk thei jeng pakacah njauk tame đại học, baoh sang saong mikva dalam palei thei jeng uan min jeng biak rau ri kayua lac oh thau mek pak halei tabiak jien mbang bac dalam dom thun bilan nao bac atah sang.

Dalam hoàn cảnh nan, jien phun dhar gilang pariak sarak karja hu jeng gai veih, daong ka dom urang anek di amuk Linh hu jien mbang bac piah trang trải dalam rai diuk saong hu tốt nghiệp blaoh đại học. “Sang dahlak biak kathaot gilac rilo anek, ye pambak tame gilang pariak sarak karja daong ka baoh sang dahlak mesre hu 54 triệu đồng. Tal bilan thu kuhria gam jien patak pataom tra nan lac 370 ribau đồng sa bilan, ye urak ini dua urang anek hu nao bac tal labik tal dua saong tabiak trường paje”.

Lac Tổ trưởng tổ patak pataom brei mesre hu 15 thun ini mai, amuk Trần Thị Huỳnh daok di palei Đăk Hòa 1,  xã Đăk Hòa, huyện Đăk Song tuk halei jeng mek hu  hatai jia di mikva dalam palei. Dom thun tapa, amek Huỳnh hu tacei pato ka 40 baoh sang dalam palei ngak harak ba-ar piah mesre phun jien meng Gilang pariak Sarak karja tỉnh Đắk Nông piah đầu tư tame bruk ngak mbang pala drak, pasiam veik dom kan kandah dalam rai diuk, ngan haong taong abih phun jien 1 tỷ 475 triệu đồng. Piah khik iek phun jien mesre, yaok bilan, dom tổ viên tuk halei jeng chủ động đóng jien jhung ginup abih ka Phòng giao dịch Gilang pariak Sarak karja di huyện Đắk Song. Amuk Trần Thị Huỳnh brei thau, jaik abih dom tổ viên thei jeng pandar phun jien njauk mục đích, ralo baoh sang tabiak truh kan kathaot saong hu jeng baoh sang kaya meda: “Mong rah tapa dom thành viên dalam tổ peih ngak biak siam, oh caik ka sre tapa harei. Tal ini tổ mesre phun jien di palei Đăk Hòa 1, xã Đăk Hòa hu tapa truh kathaot biak ralo, dalam nan hu dom urang padang ngak hu sang bahrau biak khang trang, blei tame ginup abih pandap panda piah pandar dalam sang”.

Tui harak khan brei thau di dhar Gilang pariak sarak karja tỉnh Đăk Nông, 15 thun tapa, bruk ngak di dhar oh padeih cak rok patagok. Phun jien duh ka baoh sang kathaot saong dom baoh sang sarak karja dak harei dak ralo, ngan haong tanut cakrok patagok kuhria rah tapa yaok thun labaih 15%, ngak brei patagok taong abih phun jien brei mesre tak urak ini lac 2.147 tỷ đồng.

Phun jien ini hu daong ka 246.000 mbang baoh sang kathaot saong dom baoh sang sarak karja mesre piah cakrok patagok bruk ngak mbang pala drak, paglaong jien mek tame, ba brei bruk ngak ka yaok ribau urang ngak; daong ka labaih 33.000 mbang anek saih - sinh viên mesre dalam tuk bao bac megru. Gam haong nan, Dhar Gilang pariak sarak karja tỉnh Đăk Nông jeng padang ngak 2.000 baoh sang anit ranam alin brei ka baoh sang kathaot.

Tui taong yaom di UB bhap bani tỉnh Đắk Nông, tapa phun jien ini di gilang pariak sarak karja, rai diuk di bhap bani binah halei hu patagok, ngak brei grap tanat  bruk ngak mbang kinh tế - xã hội di puk palei, patrun baoh sang kathaot di tỉnh meng 33% (thun 2004), urak ini trun daok 19,2%. Cambaih laih hu jaik 46.000 baoh sang tapa trun kathaot, dalam nan hu labaih 13.000 baoh sang lac bhap bani urang bangsa takik.

Ong Đào Thái Hòa, Akaok dhar gilang pariak sarak karja tỉnh Đăk Nông brei thau, tukvak anak tal, jabat ini patui veik iek catang danak dak, mục tiêu cakrok patagok kinh tế di puk palei, daong ba hu hiệu quả jang ka urang kathaot, baoh sang jaik kathaot saong dom baoh sang sarak karja karei, abih di nyu lac dom labik atah bayah, bhum tapen negar.

Ngan haong dom jalan ba saong jalan ngak nan, dom baoh  sang sarak karja saong urang kathaot di tỉnh Đắk Nông meda patui veik hu ralo jang cơ hội piah taom gaok haong phun jien mesre ưu đãi meng Gilang pariak sarak karja piah cakrok patagok bruk ngak mbang pala drak, grap tanat rai diuk./.