Jeng yau ralo labik karei dalam palei Đồng Khởi, meng harei taneh aia hu sron mbon, bruk patruh eik patrun kathaot tuk halei jeng hu Đảng bộ, karjar saong bhap bani huyện Châu Thành, tỉnh Bến Tre biak caik hatai sangka. Tapa nan daong ngak brei salih bahrau bhum palei  cách mạng.  Nhật Trường, urang vak di rayo sap ndom VN daok pak bhum taneran kraong CL hu kadha vak brei thau ka bruk ni: 

Piah peih ngak bruk patrun kathaot, Châu Thành peih ngak Đề án patagok ralo bruk ngak mbang tabiak truh kathaot khang kajap. Tapa pasang iek, huyện palih ruah labaih 1.000 baoh sang kan kandah hu mbaok tame. Huyện peih bruk daong phun jien meng gilang pariak, pato bruk ngak, ba brei bruk ngak, padang ngak sang ranam, daong trợ cấp xã hội, ba urang ngak nao ngak bruk di negar langiu, daong brei anek pajaih phun pajaih... 

Thun bloh, dalam huyện hu labaih 3.100 baoh sang kathaot hu mesre phun jien meng gilang pariak sarak karja saong yaom jien labaih labaih 47 tỷ đồng; padang ngak 108 baoh sang anit ranam brei ka urang kathaot; pato bruk ngak, ba brei bruk ngak ka labaih 2.600 urang ngak. Abih di nyu nan lac, huyện hu daong palaghaih ka 49 dam dara nao ngak bruk di negar langiu. Dom bruk ngak yau brei sraoh thẻ bảo hiểm y tế, oh mek jien bac, daong brei pok jien bac ka anek kamuan baoh sang kathaot; trợ cấp xã hội ka baoh sang kathaot hu peih ngak ginup abih. Mai meng nan bo thun blaoh, Châu Thành hu 186 baoh sang tabiak truh kathoat; daok baoh sang kathaot tui tiêu chí bahrau trun daok labaih 6% dalam abih baoh sang dalam huyện.

Dom kapul nyaom yau: Kapul urang kamei, kapul urang nong, urang dahlau diah ngak bol lin saong dam dara dalam huyện sangka, daong ba abih hatai saong biak siam danak dak “patruh kathaot”. Kapul urang kamei huyện hu 338 tổ, đội rik pataom jien phun brei mesre payeng gauk ngan haong yaom jien tagok tal 2 tỷ đồng. Langiu di nan, Kapul daok khik iek dom phun jien karei meng gilang pariak, dom dự án di dom kapul nyaom dunya  lac jaik 100 tỷ đồng. Mai meng nan bo yaok thun hu 15% hội viên urang kamei dalam huyện tabiak truh kathaot. Bruk ngak hu dalam patruh eik patrun kathaot di Châu Thành lac sa tanut hadah piah ka dom puk palei karei dalam tỉnh bến Tre bac megru; lac jalan piah ka huyện cakrok patagok dalam tukvak anak tal.

Piah ka bruk patrun kathaot di huyện Châu Thành hu khang kajap, tui amuk Nguyễn Thị Diễm Châu, akaok Ban tacei jalan patrun kathaot xã Tân Thạch, njauk hu ralo jalan ngak, dalam nan njauk jak ba urang kathaot kham merat yam tagok, klaak tapa hatai saneng pambak tame bruk daong ba di karja: Urak ini iek tui tiêu chí bahrau, baoh sang kathaot tagok biak ralo. Mikva daok pambak tame karja ralo jang ta-eng drei yam tagok. Urak ini dom jalan ngak lac parilo bruk ngak mbang duah jien, daong ka dom baoh sang kathaot tabiak truh kathaot. Parabha bruk ka dom urang dalam Ban tacei pato daong. Dom baoh sang kathaot di kapul nyaom halei ye kapul nyaom nan daong ka  hội viên di drei patruh kathaot.

Pachreih tui bruk “Đồng khởi- Khởi nghiệp” kayua Tỉnh ủy Bến Tre ba tabiak, Châu Thành daok hu jalan daong ka mikva patrun kathaot tui jalan khang kajap; dalam nan hu bruk ba ilamu kỹ thuật bahrau tame bruk ngak mbang pala drak; caik hatai tal bruk ba anek kamuan dom baoh sang jaik kathaot, baoh sang kathaot nao ngak bruk di negar langiu. Ong Võ Văn Bân, urang dalam mban tacei pato patrun kathaot huyện Châu Thành daok brei thau lac: jalan ngak ye tapa Đề án, khaol dahlak hu dom gilang pariak sarak karja, dom pasak meyaih khan bruk ngak tuk baoh sang kathaot caong khin raong glang, pala drak bo kurang jien phun ye drei tacei nao tal dom gilang pariak mesre jien. Daok urang ngak ye tacei nao tal dom pasak pato bruk ngak. Ngan haong urang nao ngak bruk di negar langiu , baoh sang kathaot ye hu sarak daong brei mesre phun jien ưu đãi, palaghaih ka dom baoh sang nan nao ngak bruk di negar langiu, hu jien mek tame glaong, patruh kathaot khang kajap.

     
          Meng dom  bruk ngak hu, gam haong dom jalan ngak siam, hu bruk rik daong di taong abih hệ thống chính trị saong bhap bani, jia lac dalam tuk vak anak tal, bruk patrun kathaot di huyện Châu Thành, tỉnh Bến Tre meda hu glaong jang; baoh sang kathaot veik trun abih. Ini jeng lac pren khang piah ka puk palei patui jalan yam tagok dalam bruk “Đồng khởi bahrau” angaok bhum taneh la-u./.