Mban đại diện urang Cam Islam Bal raya Hồ Chí Minh daok kuhria caga  peih bruk uan raok bilan Ramadan  ka urang Cam daok di ban raya.  Thun ini, bilan Ramadan meng harei 17/6 tal harei 17/7. Ini lac adat cambat meng kan mai, caik ka urang Chăm Islam umo meng 15 thun tagok njauk eik mbang, eik menyum  (meng tuk aia harei tagok tal tuk aia harei tame)  dalam luac sa bilan, khik hacih hatung hatain saong rup pabhap piah sambahyang saong ngak bruk pahla. Aí Nghiêm, urang vak di rayo sap ndom Việt Nam daok pak bal raya Hồ Chí Minh  hu kadha vak brei thau ka  bruk uan raok  Ramadan thun ini di bhap bani  Cam Islam bal raya Hồ Chí Minh. 

Bal raya Hồ Chí Minh urak ini hu labaih 6.500 urang bangsa Chăm. Dalam dom thun jaik di ini, hu bruk sangka di Đảng saong Karja, bruk daong ba di dom pakat, dom ngành di bal raya, rai diuk bhap bani Chăm dak harei dak patagok. Ralo sarak yau daong gah sang daok, brei mesre phun jien piah ngak mbang, miễn giảm jien bac ka anek saih bangsa takik... hu daong ngak brei mbaok meta di dom khu phố Cam dak harei dak salih bahrau, ilamo bangsa hu khik ramik. Tame jamaah Cam di Quận 8, bal raya Hồ Chí Minh dom harei ini mboh bruk bui sambai uan raok Ramadan hu mai tal yaok baoh sang, tal yaok baoh hatai manuac urang . Sap bac Qur’an yawa tagok ngak ka bilan Ramadan bui sambai jang. Dom pakat karja Quận 8 daok daong ngak ka bilan Ramadan hu chreih chrai jang, pambuak pakajap jang talei rohim haong mikva Cam quận 8. Piah caga ka harei Ramandan jaik tal, mikva urang Cam Islam bhian ngak dom janih har meng kan di bangsa yau Ha-kling, Sây kada, Nam keng…Bilan Ramadan lac tuk piah ka dom urang dalam sang mai pataom gauk, bui sambai tapen gauk mbang huak di tuk melam, ba gauk nao sang megik sambahyang saong ngak dom bruk pahla. Sa harei Ramadan hu peih tabiak meng sa van mbang, ieu tui urang Islam lac huak eik. Mai rivang Surao Nurul Islam, phường 17, quận Bình Thạnh, lac jamaah di jaik 400 urang anek Cam bal raya Hồ Chí Minh, khaol dahlak mboh bruk bui sambai, chreih chai di mikva daok cang raok bilan Ramadan. Ini jeng lac tuk piah ka mikva brei mboh hatai anit ranam gauk, kak kajap talei gul pataom gauk dalam jamaah. Bilan Ramadan, mikva halar hatian rik pataom piah daong ka urang kathaot. Meng bruk kuhria caga tani tanat, bilan Ramandan thun ini di urang Cam Islam bal raya Hồ Chí Minh meda kak kajap jang talei rohim jum pataom gauk, sa tangin haong gauk khik ramik ilamu bangsa, diukrai tui jalan “siam ka dunya mekre ka agama”./.