3-7  TP.Hồ Chí Minh: Cộng đồng chung tay tiếp sức mùa thi

Pathau mikva saong taong abih gauk! Dom harei ini, anek saih meng dom tỉnh, ban dalam taneh ia tuh mai ban raya HCM piah pakacah ĐH saong CĐ thun 2014 mbnag sa. Dom mblang radaih,  jalan mbak dalam ban raya mboh ralo menuac jang. Bruk mbang huak, ndih daok, nao mai dahlau saong dalam mbang pakacah jeng daok lac bruk dang akaok hu amaik ame saong anek saih caik hatai sangka. Yaok ribau sinh viên halan hatian saong ralo bhap bini ban raya daok  ba tangin tame daong dom anek saih mai pakacah. Urang vak Kim Dung daok di ban raya HCM hu kadha vak brei thau ka bruk ini:

Adei Nguyễn Văn Sơn meng Quảng Trị mai ban raya HCM piah pakacah tame ĐH, CĐ mbang 1 ini. Barau trun radaih di mblang radaih miền đông, Sơn saong ame hu dom sinh viên abih hatai tacei ba:

“Anek ame adei barau trun radaih, hu dom saai ao jao mai taom gaok saong tacei ba biak abih hatai jai. Adei hu thau nan lac urang halan hatian nan ye adei biak yên tâm. Saong hu dom saai pajeng mai tal labik, oh abih jien radaih mai tal labik daok trọ”.  

Meng dom ga radaih pui, mblang radaih praong tal taong abih dom labik pakacah, tuyến radaih buýt dalam ban raya, amaik ame saong anek saih jeng taduan hu bruk daong ba, tacei jalan abih hatai jai di kapul sinh vein halan hatian. Ralo sang bac ĐH, CĐ daok hu daong anek saih, amaik ame labik daok saoh. 3 sang bac di quận 9 saong quận Thủ Đức lac: Học viện Công nghệ bưu chính viễn thông, Đại học Sư phạm kỹ thuật saong Đại học Giao thông vận tải hu caga jaik 4 ribau labik daok trọ saoh saong yaom lap ka anek saih. Daok danak dak “daong pren bilan pakacah” di thành đoàn ban raya ye duah hu 38 ribau labik daok trọ ka anek saih saong amaik ame anek saih. Dalam nan, hu labaih 5 ribau labik daok trọ saoh, daok veik nan lac sang daok trọ lap jien, meng 10 ribau tal 80 ribau đồng sa harei. Danak dak jeng hu 10 ribau pok lisei brei saoh ka amaik ame saong anek saih dalam dom harei pakacah. Đặng Văn Hải, sinh viên sang bac Đại học Luật ban raya Hồ Chí Minh hu mbaok tame danak dak “daong pren bilan pakacah” lac:     

“Dahlau deih daok gah brak tame, adei oh thau hagait, min hu dom urang halan hatian daong ba nan ye adei mboh sahanang hatai saong pakacah gam tame sang bac ĐH. Urak ini adei caong ngak urang halan hatian piah daong pren ka dom ayut anek saih, piah dom ayut hu jeng sinh viên”   

Dalam tuk peih ngak danak dak “daong pren bilan pakacah”, ralo kapul, nyaom hu jalan ngak gheih, pambak praong hatai anit ranam, samar daong ka dom anek saih mai pakacah gaok kan kandah. Saai Lê Quốc Phong, Bí thư TƯ đoàn, akaok TƯ kapul sinh vein VN, akaok mban tacei pato danak dak “daong pren bilan pakacah thun 2014” lac:

“Danak dak daong pren bilan pakacah peih tabiak labik ka dom ayut sinh viên patagok bruk halan hatian di drei, pato pakai bruk anit ranam gauk,  tapa nan ieu menuac sia dalam xã hội gam hu mbaok tame saong sinh viên. Anak meta mboh lac, dalam 12 thun peih tabiak, bhap bini daok di dom labik hu labik pakacah hu brei mboh hatai anit ranam di drei, klah rabha saong dom anek saih nao pakacah tame ĐH”.

Gam saong danak dak “daong pren bilan pakcah” di dom sang bac, dom kapul nyaom, thun ini, ralo baha daok di ban raya HCM jeng hu daong ka anek saih nao pakacah tame ĐH, CĐ ngan saong labaih 7 ribau labik daok trọ saoh, yaok rituh ribau pok lisei chay ka amaik ame saong dom anek saih gaok kan kandah. Yaok ribau phật tử hu mai tal dom baha meng rilo harei ini mai piah daong ka anek saih. Hu labaih 30 ribau pok lisei chay hu dom baha kuhria caga brei saoh ka anek saih dalam dom harei pakacah. Amuk Lê Thị Song Hải, umo 56 thun – sa urang phật tử hu mbaok tame rami ramik labik daok brei ka anek saih dalam dom baha jaik labik pakacah saong kuhria bruk mbang ndih ka dom adei khan lac:

“ urak ini padeih hưu ye, bruk ngak oh daok ralo tra, takre nao daong pren bilan pakacah piah daong ka dom adei bhum atah bayah, bhum palei pala, tagok ini meyah oh hu thei kren randap huac gaok dom bruk oh patuah jamo”.   

Rilo po sang trọ, duk trọ jeng halan hatian brei ka anek saih saong amaik ame daok trọ saoh dalam dom harei ini. Saai Nguyễn Thị Hương daok di  labik 378/ 50 Xô Viết Nghệ Tĩnh, Quận Bình Thạnh barau puh ramik 2 duk dalam sang piah taduan anek saih mai pakacah tame ĐH. Ini jeng lac thun ka 3 saai brei anek saih daoh saoh:

“Drei saneng lac urang daok di palei mai, diuk rai kali kalih patak pataom meng asar brah, bloh ba anek tagok ban raya pakacah sa mbang ye abih jien padai. Oh hu hagait piah daong ka urang ye dahlak brei amaik ame anek saih daok trọ. Oh khat lahik hagait. Hu hagait drei daong nan”.

Bruk daong ba di dom kapul nyaom saong hatai anit ranam di bhap bini ban raya HCM hu rik daong ka dom anek saih sanang hatai, khik ramik pren yava piah pataom tame bruk pakacah./.