Bhap bini Cam tinh Binh Thuan daok di 4 xa saong 9 palei, hu 7.526 baoh sang saong 37.000 menuac. Hadei di 39 thun peih paha, hu bruk sangka di dom pakat Karja, bruk kham merat yam tagok di bhap bini, nan ye bruk kinh te-xa hoi bhum urang Cam dalam tinh hu cak rok, mbaok meta palei pala hu hadah hadai tagok. Bruk ngak mbang ngak huak saong akaok sahneng di mikva dak harei dak salih bahrau. Ini lac jalan piah ka bhap bini Cam Binh Thuan khang takai yam tagok.

Dalam sa mbang mai rivang veik palei Cam Lac Tanh, urak ini lac khu pho Cam di ban sit Lac Tanh, huyen Tanh Linh, tinh Binh Thuan, khol dahlak mboh tatuak drei anak bruk salih birau di sa palei kan kathaot dahlau diah. Dom jalan nao mai dalam palei jeng hu tuh ximang atau tuh betong khang kajap, samu tapak, rilo baoh sang bahrau hu padang tagok salih ka dom baoh sang daning haluk dahlau diah yau brei mboh pren khang bahrau di bhum taneh ini. Sa urang daok dalam palei ini chreih chrai khan lac: “Hu Karja daong jien padai, mikva rik prein yawa ngak jalan dalam palei bo taong abih dom jalan meng akok palei tal luac palei hu tuh betong, maong mboh sang danaok praong siam, jalan mbak praong laneng lanoi hacih sa-at, mikva biak chreih chrai”.

Khol dahlak vaih tame rivang sang ong Thong Ninh, urang hu mboh di anak meta dom bruk pandik harao, khat lahik kayua mesruh metak jang yau bruk cak rok patagok pak di labik bo ong ndih tapui tabiak saong praong tagok. Taduan khol dahlak dalam baoh sang hu ginup pandap pandar, ong Ninh oh padauk hu dom bui sambai di drei. Ong lac: “Tuk giải phóng mai, taneh ia hu yasa baoh negar anek bik hu nao bac ada. Hu Ndang saong Karja daong tacei pato jalan ngak mbang mikva hu yau harei ini”

Hu urang jakar pachreih nong tacei pato, jao brei ilamu, yaok ribau baoh sang mikva khang hatai mesre jien salih janih phun pala, anek raong tui jalan ngak tabiak pandap piah pablei. Klak bruk tok ngak sa janih phun padai, rilo baoh sang ngak kaya meda meng phun thanh long, cao su, peih tabiak jalan ngak mbang birau kein laba jang. Ta-eng bruk raong limo, mbiah tal urak ini, karja palei hu peih brei ka 1.423 baoh sang mesre jaik 10 ty dong blei 1.878 drei limo menek saong brei 64 drei limo tano lai sind, patagok taphon limo di bhum urang bangsa Cam dalam tinh hu jaik 12.000 drei. Sang ong Thông Sâm daok di palei Hiệp Hòa, xã Tân Thuận, huyện Hàm Thuận Nam, tỉnh Bình Thuận, lac sa dalam dom boah sang hu tagok meng phun jien mesre blei limo tui sarak  di tỉnh,  brei thau: “Ndang saong Karja brei mesre phun jien piah blei limo raong, liomo caik menek pablei mek jien pala thanh long, pala bei, ngak padai…”

Bhum urang bangsa Cam di Bình Thuan hu labaih 5.300 ha taneh pala drak, kuhria rah tapa yaok baoh sang hu jaik sa heca taneh, ralo meng ngak padai. Dom thun jiak di ini, hu ia meng dom binek  praong yau: Cà Giây, Sông Quao, Sông Lòng Sông… nan ye bruk ngak padai meng 1 vụ tagok jeng 2 - 3 vụ dalam sa thun, padai yuak hu meng 55 tal 60 tạ sa hecta. Baoh sang kan kathaot bhum urang bangsa Cam tal akok thun 2013 daok labaih 9% trun jaik 5% dut saong thun 2009.

          Ong Mai Sên, Akok Mban bangsa tỉnh Bình Thuận, lac: “ Mikva Cam tỉnh Binh Thaun bac megru ilamu khoa học biak siam, dalam bruk pala drak jeng yau dalam raidiuk. Mikva Cam ralo meng ngak padai ia, taneh pala drak biak tani tanat. Mikva Cam ralo meng daok di bhum taneran nan ye hu mbang tui taong abih dom ribaong kraong bo Karja buh jien tame ngak. Maong rah tapa mikva urang Cam ngak mbang pala drak tani tanat, thau ba ilmu tame ngak, mek hu rilo kein laba. Nan lac jalan lagaih piah ka mikva Cam cakrok patagok”.

Patui bruk jayah praong bilan Xuân 1975, dalam bruk salih birau harei ini, bhap bini Cam biak tari tarieng, oh huac glaih glar, daok buh pren yava tame haong dom bangsa adei sa-ai dalam tỉnh, dak padang bhum palei Binh Thuan dak harei dak kaya meda./.