Meng trách nhiệm di sa urang menuac taneh Việt, jien trợ cấp yaok bilan meng 2 triệu meteh tal labaih 3 triệu đồng, rai diuk daok gok ralo kan kandah, dalam tuk pren yava oh daok min dom urang dahlau daih ngak thanh niên xung phong xã Giao Hòa saong An Hóa, huyện Châu Thành oh thei pandar thei bo halan hatian rik tame hu labaih 11 triệu đồng daong ka dom urang lin. Amuk Nguyễn Thị Lành, urang dahlau daih ngak thanh niên xung phong xã An Hóa khan lac bruk ngak ini mai meng tuk TQ ba padang giàn khoan sung hukum angaok bhum tasik di VN saong dak harei dak jhak, pandar kapal praong paoh kram kapal ikan di urang taong cap ikan VN nan ye kol dahlak halan hatian ba gauk rik jien ndo, drap ar piah khik caga taneh ia palei negar.

Daok ong Võ Trí Quân – sa po doanh nghiệp pablei salih vật liệu xây dựng di xã Phú Túc brei thau, meng tuk hu urang jakar Mặt trận palei brei thau ka bruk di labik TQ padang giàn khoan sung hukum, ong halan hatian rik tame 100 triệu đồng, saong hatai caong khin rik hasit pren yava piah daong ka dom urang lin cảnh sát tasik saong kiểm ngư tasik.  

“Yaom jien ini ngan saong baoh sang nan lac biak praong, min dahlak saneng lac urak ini dom saai daok dang anak bruk hiểm nguy yau nan, ngan saong bruk taneh ia yau nan dahlak mboh daok praong jang. Nan ye dahlak rik jien ini piah daong dom saai sanang hatai khik caga taneh ia palei negar”.

Dalam tuk nan, jaik 20 ribau urang taong cap ikan di kreh tasik atah saong labik taong ikan meng kan mai nan lac Trường Sa yaom lac duh hatai min abih gauk jeng khang hatai tabiak tasik. Piah patagok kein laba bruk taong cap ikan jeng yau daong ba gauk tuk gaok bala, dom urang taong cap ikan bhian nao tui kapul, tui nyaom; dalam tuk biên phòng tỉnh tuk halei jeng khik liên lạc, halan hatian daong 24/24. Urang taong cap ikan angan Nguyễn Văn Em, daok di xã Bình Thắng, huyện Bình Đại – sa urang hu labaih 20 thun pambuak saong tasik lac:  

“TQ ba padang giàn khoan dalam taneh di drei, bruk nan lac sung. Daok bruk taong ikan ye urang taong ikan kol dahlak jeng daok tabiak tasik tal tuk oh daok pren yava. Daok sarak di Đảng, karja ye urang taong ikan kol dahlak biak sanang hatai tabiak tasik”.

Labaih sa bilan ini mai, meng tuk mehit lac TQ meblah mek chủ quyền saong quyền tài phán labik đặc quyền kinh tế tasik di taneh ia drei, dom tổ chức đoàn thể tỉnh Bến Tre hu pathau khan rilo ka bruk tasik pulao, ka jalan đấu tranh di đảng saong karja drei brei ka bhap bini dalam tỉnh thau cambaih; saong tapa nan jeng peih tabiak ralo bruk daong ka dom urang lin daok ngak bruk di HS saong TS meng ralo jalan ngak, nao dahlau nan lac Ủy ban Mặt trận negar tỉnh. Tapa nan hadei di sa adit peih tabiak, rik pataom hu labaih 314 triệu đồng piah payua brei ka dom urang lin dalam mbang sa. Daok tỉnh đoàn Bến Tre langiu bruk peih ralo bruk ngak pamaong ka biển đông, urak ini daok hu kế hoạch saong likau adat di tỉnh daong “danak dak 100.000 phun li-u brei ka tasik pulao VN” kayua hiệp hội la-u VN peih tabiak. Dalam tuk cang hu adat brei peih ngak, urak ini hu jaik 500 phun li-u pajaih kayua bhap bini rik daong; yaok pluh urang nông naih joi halan hatian tabiak pulao piah tacei ilamu pala, dalam nan hu “patao li-u” Đỗ Thành Thưởng ./.