Dom harei ni, ong Hồ Văn Nhiên daok di palei 1, xã Phước Năng, huyện bhum ceik Phước Sơn, tỉnh Quảng Nam harei halei jeng likau haong pô brei hajan trun, pruh ka mblang padai dok katam khuak kayua pandiak bhang. Ong Nhiên dut hatai, livik livik jeng hu hajan ribuk min ia hajan oh hu hadom. Pandiak bhang dom bilan ni mai ngak ka padai metai thu, bei plom, phun tangei jeng oh duik hu:

2 bilan ye oh ka mboh hajan, bilan 6-bilan 7, tal bilan 8 ye oh thau hu hajan halei oh. Puh thu abih dok padai ye katam hala, paguh page nyu metai. Hamu gah angaok thu ia, nan ye oh tacoh, dok hamu gah ala ye tacoh min pala bloh nyu katam hala, thu abih. Puh prong tangei thu, padai jeng thu. Eik lipa ye, brei hu hajan nao.

Pandiak bhang dui atah oh ngak hu padai puh, rilo mik va pataom tame ngak padai ia, ye gaok halak halin,  baoh bao meh palai kaik. Ong Hồ Văn Yê dok di palei 2, xã Phước Năng brei thau, sang ong pala 2 sào padai ia min bahrau drak bloh njauk baoh bao meh kaik abih dhar. Ong Ye ngak rilo jalan meng ieu pataom gauk nao duan mek tal pruh jru min oh hu siam hagait:

Padai puh oh ka tal bilan ye nyu thu, huac eik drei ngak gam padai hamu. Min hamu baoh bao meh biak  rilo, nao duan oh abih, pruh jru jeng oh abih, kaik khut abih. Drei tam harei ni, harei paguh nao rivang mboh lihik abih ye, nyu kaik tal gha. Harei, nyu dok dalam lubang, melam nyu blo tabiak. Tuk drei ngak oh mboh sa drei halei, min page drei tame ia mong mboh baoh bao ameh tabiak bak. 

Bilan hè thu thun ni, urang nong huyện Phước Sơn tam drak labaih 330 ha padai ia. Pandiak bhang dui atah dom mblang hamu oh hu ia pruh. Taeng padai puh song tangei jiak thu bih, oh tagok, mbuan si trun năng suất. Oh lac kurang ia pruh, rilo mblang hamu padai ia njauk halak palai kaik, rilo meng lac baoh bao meh, halak blik hala song ruak trĩ. Ong Lê Muộn, Phaok akaok sở ngak nong song patagok palei pala tỉnh Quảng Nam brei thau: urak ni dom danao ia dalam tỉnh jeng khik hu ia pruh ka bilan hè thu, min di rilo huyện bhum ceik dok rah tabiak bruk thu lagu di rilo labik:

Di bhum ceik bilan hè thu ye pagam pambak  tame ia pruh dalam khe dom huyện trung du, bhum ceik njauk kurang ia cục bộ, dom mblang hamu nan, hu dom thun urang oh ngak, dok dom bhum padai prong di tỉnh ala ni oh kurang ia. Bhum ceik jeng drak bilan hè thu, ngak tui jalan di Sở min oh tuk halei urang ngak sa mbang song gauk, urang drak t, nan ye njauk baoh bao meh song bọ trĩ palai kaik.

Anak bruk kurang ia pala drak song halak halin palai kaik bilan hè thu di dom huyện bhum ceik, ảnh hưởng trak tal năng suất, chất lượng mùa vụ, gah ngak nong song karja di dom puk palei ni dok pataom tame peih ngak dom jalan pacang pandiak bhang, caga halak halin, khik caga phun pala. Ong Nguyễn Mạnh Hà, Chủ tịch Ubbhap bini huyện Phước Sơn, tỉnh Quảng Nam brei thau

Meng bloh huyện jeng hu tỉnh dong (ba) 200 triệu đồng kuac raok krong ribong. Min tuk kuac  bloh ye ia di dom krong chaoh thu lagu, oh hu ia ngak kan kandah tal bruk pala drak di urang nong. Jalan ngak di khol hulin urak ni lac patrun bruk tathuak ia di dom danao hu ia piah patrun thu lagu, kurang ia hadei di ni. Dom mblang taneh halei oh hu ia ye khol dahlak jak ba bhap bini salih tapa pala tangei, pala bei. Huyện hu tacei jalan ka phòng ngak nong brei urang jakar mai piah tacei pato song dong ka bhap bini jru pacang caga halak halin, ruak kik./.