Di mblang hamu ấp Tân Bảnh xã Tân Phước huyện biên giới Tân Hồng, mikva urang nong daok trun pajaih njam patam bilan hè thu. Ini jeng lac mbang akaok mereip ông Nguyễn Văn Nhõng  khang hatai trun pajaih 1 ha lange. Lac khang hatai kayua dom taneh taphia ông thei jeng ngak padai hè thu. Meng bruk ngak karei ini hu daong ka ông abih takik phun jien, meng ngak taneh, pasang iek saong ia piah pruh ka phun lange. Dalam tuk nan, dom taneh padai hè thu di tukvak ini daok gaok jit jamaok palai kaik saong rilo taneh mbuan si li-ua ngak veik: mboh pala lange hu rilo kein lagaih. Jien buh tame takik, pren ngak takik jang rilo duk saong ngak padai. Daok ngak padai urak ini mboh nyu biak rilo jit ruak, rầy mò biak rilo”

-Lingiu di lange ye ritak lo jeng lac janih phun hu rilo urang nong di huyện Tân Hồng pala. Meng dom siam lagaih yau: năng suất glaong, yaom pablei tani tanat, takik pren pasang iek…taneh pala ritak lo di Tân Hồng daok tagok rilo. Sa bruk praong jang nan lac tuk pala ritak lo meda caik veik ka taneh hàm lượng đạm biak glaong, caga klaoh hu jit ruak daok kandong veik meng vụ padai dahlau. Tapa nan daong urang nong sahanang hatai jang dalam bruk pala drak, khik caga hu kein laba tame saong praong jang lac trun takik dom khat lihik dalam bilan hè thu. Ông Nguyễn Văn Thưa - xã Tân Thành A – Huyện Tân Hồng khan lac: Yau kỹ sư trun ini taong yaom lac padai ini gaok kanyik lùn saong jamaok palai kaik 50 tal 70%. Daok eng drei lac mboh ritak ini biak siam paje, mboh cakrok siam meda paik mek hu rilo.

-Tui ông Nguyễn Văn Tài, Trưởng phòng ngak nong saong patagok palei pala huyện Tân Hồng, urak ini dom mblang padai dalam huyện daok gaok jit jamaok palai kaik biak trak. Taneh njaom ruak labaih 4000 ha, njaom ruak meng 20 tal 80%. Yau nan ye huyện daok pachreih mikva trun pajaih njam patam dalam bilan hè thu ini:  Tapa pasang iek di dom puk palei saong di balai ngak nong ye dom taneh kol drei pala njam hu sahaneng hatai jang kayua oh hu gaok jamaok palai kaik. Ka dua lac mikva abih takik phun jien buh tame. Panuac kakei urak ini ka dom bhum taneh caga trun pajaih atau lac taneh tambok glaong ye kol drei jhui pala padai bo njauk pala njam. Abih di nyu nan lac tangei kayua hu bruk daong jien di karja.

Di huyện Tam Nông, dalam bilan hè thu thun ini huyện jeng hu tabiak bruk trun pajaih jaik 1000 ha njam patam. Dalam nan pataom tame rilo lac phun bei glaong, amraik saong kiệu. Libik pala pataom tame di dom xã Phú Ninh, An Hòa saong An Long. Daok dom xã ngak nong ye taneh salih tapa pala njam patam thun ini jeng takik. Ông Nguyễn Thanh Hồng - Trưởng phòng ngak nong saong patagok palei pala huyện Tam Nông brei thau: bilan njam hè thu 2018 jeng siam lagaih, dom HTX urang nong jeng daok caga ngak taneh, caga pajaih, dom kraong ribong jeng hu kuac hacih saat piah ba ia pruh ka mikva piah  tuk kurang ia jeng khik caga hu ka pala drak.

-Tui pathau khan di Sở ngak nong saong patagok palei pala tỉnh Đồng Tháp dalam tỉnh urak ini daok trun pajaih labaih 10 rabau hecta pataom tame dom janih njam patam yau  ye: lange, tangei, amraik saong dom janaih njam karei. Taphia bruk cakak jit ruak daok kandong veik dalam bilan hè thu ye bruk salih tapa pala dom janih njam patam meda daong patak pataom hu ia pruh dalam tuk pandiak bhang yau urak ini./.

Thúy Linh