Khu dân cư Minh Tiến hu 149 sang gam saong 576 menuac, dalam nan bhap bini bangsa takik hu tal 70 %.  Sang danaok daok atah di gauk, ilamu bac da-a oh samu gauk, raidiuk daok gaok rilo kan kandah; bruk pathau khan, jak ba bhap bini tame dom bruk pakacah gauk kayua puk palei ba tabiak jeng gaok rilo kan kandah…Lac sa Bí thư chi bộ, meng rilo thun ini mai, amuk Thịnh kham merat yam tapa rilo kan kandah, ba dom bruk pakacah gauk di palei nao tagok, rilo bruk hu jeng “labik hadah” piah ka rilo labik karei mai bac megru, ngak tui, meng nan nyu daong paglaong raidiuk, daong kak kajap talei jum pataom di Đảng saong bhap bini.

Dalam bruk padang ngak palei pala bahrau, khu Minh Tiến, amuk Thịnh hu jak ba mikva dalam palei alin brei taneh, peih jalan nao tal dom baoh sang. Oh njauk lac pathau khan, jak ba dalam dom mbang nyaom bo amuk daok caik rilo tukvak nao tal yaok baoh sang, khan brei bhap bini thau ka makna di danak dak padang ngak palei pala bahrau. Meng sami samar, abih hatung hatian, amuk hu mikva  anit ranam saong iek praong.  Livik livik harei, mikva dalam khu halan hatian alin brei taneh, giải phóng mặt bằng  brei ka dom đơn vị padang ngak njauk tukvak ba tabiak. Ngan saong kadha lac “urang đảng nao dahlau, puk palei nao hadei”, sang amuk hu alin brei 200m2 taneh thổ cư, yah klak var ro mek taneh ngak jalan. Meng nan, taong abih urang đảng dalam khu ngak tui siam. Dalam 4 thun, hu 91 sang dalam khu brei taneh, njam patam, drap ar angaok taneh praong abih tih jaik 18 ribau m2, kuhria tabiak yaom jien jaik 626 triệu đồng. Hu sang brei labaih 1 ribau m2 taneh bein. Tal urak ini hu 91 mbang baoh sang brei jaik 20.000m2 taneh, yaom njam patam, baoh kraoh, drap ar angaok taneh tagok tal 800 triệu đồng. Meng bruk halan hatian brei taneh di dom baoh sang bhap bini, tal urak ini jalan nao tapa khu Minh Tiến hu peih praong, daong peih praong bruk pablei salih nao mai, ba kinh tế xã hội di palei cakrok patagok.

Dalam bruk cakrok patagok kinh tế - xã hội, amuk Thịnh saong mBan Chi uỷ khik ramik talei jum pataom piah tacei pato dom kapul nyaom ngak siam bruk di drei, kham merat pathau khan, jak ba bhap bini dalam palei salih janih pala, janih raong,ba ilamu kỹ thuật bahrau tame ngak. Dalam 2 nhiệm kỳ, Chi bộ Minh Tiến hu tacei pato bruk patagok kinh tế - xã hội, an ninh - quốc phòng dalam khu dân cư hu siam mekre, patagok kinh tế hu meng 6,8% tagok yaok thun. Rilo thun gam, Chi bộ khu Minh Tiến hu dak angan lac đơn vị hacih sa-at, khang kajap,  90% baoh sang mek hu angan sang ilamu, taong abih uraniah hu nao bac da-a, jien mek tame kuhria rah tapa yaok urang hu 19 triệu 500 ribau đồng sa thun. Amuk Thịnh tuk halei jeng hu mikva dalam khu anit ranam kayua abih hatai ka bruk palei, bruk taneh ia.

Amuk khan lac, piah ngak hu yau nan, amuk saong mBan Chi ủy palei Minh Tiến tuk halei jeng ngak tui panuac Wa pato, tuk halei jeng pasram đạo đức di urang đảng, ba akaok nao dahlau, ndom nao gam saong ngak, bhian caik hatai tacei pato dam dara ka tư tưởng chính trị, jalan diukrai siam mekre, daong ka chi đoàn thanh niên tuk halei jeng hu dom đoàn viên gương mẫu hu bhap bini anit ranam piah caga ba tame đảng. Meng dom bruk ngak hu yau nan, yaok thun Chi bộ khu Minh Tiến jeng hu UB bhap bini xã pok meyaom lac đơn vị xuất sắc, dom chi hội, chi đoàn, mBan ngak bruk mặt trận yaok thun hu Ủy ban MT negar xã, dom ban ngành kapul nyaom di xã brei angan lac đơn vị khang kajap, xuất sắc./.