Dom lagu daoh bhap bini di bangsa Tày hu biak rilo janih, yau: Then tính, Phong slư, Pựt lằn, Nàng ới, lượn Tày… mbak carak ilamu di bangsa. Tuk panuac daoh yamen liar hu pok tagok ye mboh yau bingu la, cim brim song langik tasik lai tame panuac daoh, ngak ka dom panuac daoh yau lai li-an jang, yau hu seok par atah, par glong, dalam nan lagu Hoa tình biak bingi pang, biak yamen li-an.

Lagu daoh hoa tình lac dom panuac ariya, lac sap ndom di boh hatai hu dom  gu likei kamei atau yaok kapul likei kamei doh nao mai atau doh song gauk. Dom panuac ariya  giản dị tui jalan ví von brei mboh bruk sami sama, hadah krah di 2 gah doh nao mai. Asal kadha di doh nao mai hu biak rilo janih, meda ndom kal boh sang, puk paga, taneh ia, palei negar, likei kamei ranam gauk. Panuac ariya hu paneh tui thể lục bát, ragu ragam cambaih laih, hu tính ngẫu hứng yau: doh ngak krein, daoh pambuak talei rohim, sinya gauk, calah gauk. Peih akaok song tamat panuac ariya jeng lac sap ieu “ Adei loi” biak yamen liar meng gah likei song panuac ieu javap jalei “ Saai loi” bingi pang di gah kamei.

Tuk vak doh oh hu tukvak, bruk doh nao mai meda rah tabiak luac melam ia bilan bak boh atau harei rija roya. Tuk khin padeih piah mbang huak dom gah jeng da-a gauk meng dom panuac doh, pagap yau:  Adei lơi, adei ơi, /tal tuk jala pandiak ye, padeih dom panuac daoh yamen li-an, da-a adei haong ayut tame sang, Sang sa-ai gah nan drei salam amaik ame, adei ơi..adei lơi

Dahlau deih urang Tày paneh tabiak lagu daoh Hoa tình piah doh dalam harei rija roya, dalam dom ndam likhah, dalam tuk sal;ah bruk ngak nong atau dalam dom melam ia bilan hadah. Bruk hadar kanal bhian lac tui cambuai. Dom likei dam, kamei dara doh nao mai piah duah thau gauk. Hu biak rilo likei dam, kamei dara krein gauk, thau gauk, bloh anit ranam gauk song hu rilo gu hu jeng duik jeng pasang tapa dom panuac doh bingi pang, yamen li-an di lagu daoh Hoa tình .

Lagu daoh Hoa tình yamen li-an, bingi pang yau nan, nan ye hu patua veik tapa rilo rai rah. Urak ni, di tỉnh drei dalam dom chi hội khik ramik lagu daoh bhap bini hu biak rilo nghệ  nhân, tác giả paneh tui lagu daoh Hoa tình, dalam nan njauk  ndom tal  tác giả Đàm Nha, sa urang anek di palei Hồng Việt (Hòa An), sa nhà thơ, sa nghệ nhân paneh rilo kadha doh, panuac ariya piah ka dom hội viên Chi hội khik ramik lagu daoh bhap bini huyện Hòa An doh dalam tuk rija roya, tết, angaok rayo papar sap papar binguk huyện, tỉnh. Lagu daoh hu vak tui 2 sap Tày - Việt.

Hoa tình - sa lagu daoh bhap bini gheih mekre njauk hu khik ramik song patagok. Bruk khik ramik dom lagu doh bhap bini song lagu daoh Hoa tình oh lac kayua sa pakat, sa gah bo brei hu mbaok di rilo ban, ngành song di tong abih bhap bini./.