Mbiah tal harei ini, urang Cam di Ninh Thuận jeng daok khik tamo bruk menyim meng tangin biak gheih lac ngak tabiak bingu la tapak angaok kik menyim, ngak hu dom blah khan bai ndung bak ilamu Cam. Kadha vak di  Minh Huệ, urang vak di rayo sap ndom Việt Nam:

     Di HTX jih dalah Cam, palei Caklaing Mỹ Nghiệp, huyện Ninh Phước, Ninh Thuận, nghệ nhân Thuận Thị Trào daok menyim. 1 tangin ranyah haloak nao mai di kreh dua tal marai. Tangin diah pan tasi menyim meng kayau paoh tame marai ngak jeng sap lách cách, ngak ka marai mbang catang tame gauk. Blah khan bai sambo bhong hu bingu la sambo màu kanyik katam. Bingu Yang Siva, dua gah tangin pan dua mbaik troy dang angaok ka-ing cim ginreih.

      Piah hu sa blah khan bai hu bingu la mekre yau ini, njauk tapa ralo công đoạn. Meng kan, njauk pala kapah, paik baoh mai pambu thu, laih asal blaoh katung marai. Piah ka talei marai nyu kajap oh klaoh, oh tabiak bilau tuk menyim, urang Cam ba tram tame aia brah, hadei di nan parang tabiak, pambu thu blaoh ka nyaom sambo màu. Kanduh phun tràm nhuộm marai jeng sambo hijao. Sambo bhong hu ngak meng hala trâm bầu, atau katak phun cánh kiến. Sambo jhuk meng phun buông, atau  nhuộm meng hala chùm bầu, hadei di nan ba nao tram dalam gluh 7 harei melam. Tuk hu blaoh marai sambo, urang taro marai tame nding, cuk cako saong puac abih nan lac menyim.  Nghệ nhân Thuận Thị Trào, HTX Thổ Cẩm Chăm Mỹ Nghiệp, lac urang menyim naih abih dalam palei brei thau, camereip lac ba marai tame khung. Tuk ba marai tame khung, pagap yau khin 100 mét ye drei ba njauk 100 mét. Tuk hu tame khung blaoh drei cuk cako. Khan bai hu menyim meng talei marai gar sambo màu bhong. Bingu yang Siva lac bingu kan ngak di abih, njauk pandar tal 130 cako.

      Kik menyim di urang Cam ngak meng kayau. Glaong jaik 1met meteh. Atah jaik 4m. Marai sambo màu bhong rah tui kik piah menyim khan bai. Daok marai sambo màu kanjik katam, mbong patih angaok dom cako piah ngak jeng bingu la. Bingu la nyu ndaong tagok tui yaok nhịp haloak. Urang menyim megei nao megei mai, oh daok sa labik. Sa-ai Thiên Thị Mỹ Thuận, urang di HTX Thổ cẩm Cam Mỹ Nghiệp, hu tuk mbaiy rup nao gah anak piah ramik veik cako, hu tuk yar tangin, mek marai. Sa-ai Thuận khan lac, daok meng page tal biar harei tok menyim hu 1 tal 1 mét meteh.  Tui yaok janih khan bai bo nyu atah katut karei di gauk, tui bingu la mbuan  atau kan bo pandar kik katut atau kik atah. Kik atah tok menyim hu khan bai khổ hẹp meng 2-25cm. Min atah meda tagok tal yaok pluh mét.  

      Bruk menyim angaok daneng katut nyu karei jang dut haong menyim angaok daneng atah, nan lac, urang menyim hadei di tuk mek merai blaoh meng tame cako. Bingu la kan ngak tok menyim hu angaok daneng atah. Daneng katut menyim janih khan bai hu khổ prong meng 4tấc tal 1m, atah jaik 2m. Khan bai ini bhian piah ngak khan me-om, khan lang angaok bàn atau phui. Tui yaok janih bingu la bo urang menyim kuhri kuhria ka nyu njauk, piah mek hadom talei marai ngak jeng bingu la saong marai nền ka lagaih sambo màu. Dalam dom bruk piah ngak tabiak blah khan bai ye bruk mek marai lac kan ngak di abih. Dom urang prong thun hu ilamu meng ngak hu siam.  

     Amuk Thuận Thị Trào ndom lac tuk menyim, njauk ngak ka nyu samu tangin, meyah oh ngak yau nan khan bai oh catang siam saong kan ndaong hu bingu la. Meng palak tangin gheih di urang menyim, dom talei merai sit sot hu jeng dom blah khan bai hu sambo màu hadah mekre, mboh yau ndaong tagok angaok khan bai. Piah ngak hu dom bingu la gheih mekre yau nan, urang menyim brei naih, brei gheih tangin saong hu óc thẩm mỹ. Hu yau nan meng ngak mekre ka blah khan bai

      Piah hu dom bingu hala yau hatai caong, urang ngak njauk thau cambaih bruk ngak bingu la, meng mek marai, cuk cako saong thau cambaih bruk đan, luồn marai dalam tuk menyim. Tui ong Hàm Minh Thiệu, Akaok HTX Thổ cẩm Cam Mỹ Nghiệp, dom bingu la meng kan, bingu la kan ngak tok menyim hu angaok kik atah. Jeng lac sa janih bingu la min tui óc thẩm mỹ, tui hatung hatai di yaok urang menyim bo hu phối màu, brei tabiak dom bingu  sambo màu sup atau hadah. Nan ye khan bai Cam lac sa sáng tạo karei di urang menyim - ong Hàm Minh Thiệu langyah:“Janih bingu hala daneng menyim atah lac bingu  inegirai. Jeng daneng menyim nan, marai nan, min urang menyim naih jioy khin ngak jeng bingu halei ye tabiak jeng bingu nan. Meyah urang menyim khin hu nền hijao ye nyu tabiak nền hijao, khin ba nền bhong ye tagok nền bhong. Meyah urang menyim takre nền hijao bhong meluk gauk ye nyu hu nền hijao bhong meluk gauk. Bingu la nyu biak karei gauk”.

     Kadha praong piah ngak tabiak bingu la nan lac dui marai saong cuk cako. Nghệ nhân Thuận Thị Trào brei thau jalan ngak bingu la Cam: Mong tame bingu la, nền khan bai piah palih sambo màu ka nyu lagaih. Pagap yau nền màu bhong ye drei njauk ngak bingu samo màu hagait piah mbang tame gauk. Saong kan di abih nan lac bruk cuk marai tame cako ngak jeng bingu la ini. Bruk nan lac praong di abih. Kỹ sư hu thiết kế tame ini, nghệ nhân hu thiết kế tame ini, tuk bo tame kik ini blaoh ye urang menyim tok pal haluak menyim lac hu jeng bingu la ndaong tagok angaok blah khan bai./.