Labik khik ramik phun glai Tà Kóu (huyện Hàm Thuận Nam, tỉnh Bình Thuận) urak ini daok dang anak bruk jah tak glai piah pala thanh long. Tui panuac khan di bhap bani, dalam sa bilan tapa, glai Takuh njauk jah tak ralo. Dom urang nan jah tak phun glai piah mek taneh pala thanh long min jabat chức năng jeng oh ka duah mboh thei ngak bruk nan piah xử lý. Việt Quốc, urang vak di rayo sap ndom VN hu mai tal labik pandiak ini piah duah thau ka dom hagait daok rah tabiak pak ini:

Dom harei tapa, khaol dahlak hu mbaok di xã Tân Thuận, huyện Hàm Thuận Nam, tỉnh Bình Thuận piah duah thau bruk jah tak glai. Meng canah klau darak Tân Thuận, nao tui jalan tagok apuh, khaol dahlak abih jaik 20 minit piah tame tal labik. Tapa truh láng Mã, gah anak nan lac dom mbuan taneh kalu prong jaik 1 héc-ta bak phun kayau glai. Phun bahrau kaoh jaleih, thu hala ndih dak gauk. Mboh ralo lac dom phun glai bahrau pala hu đường kính meng 10-25cm.

Nao tame veik dalam kreh glai sến jaik 300 mét, khaol dahlak hu mboh sa binah glai njauk kaoh abih phun. Dom talei phun sến tapak njauk kaoh saong cagaik jaleih abih. Inem caghaik jeng daok mboh bahrau. Urang ba jalan brei thau dom urang daok jah tak glai meng dalam tabiak langiu. Cang phun thu meng ramik, li-ua taneh piah pala thanh long.

Labik glai jah tak daok dalam Tiểu khu 302A tok atah Trạm Khik iek glai Tân Thuận jaik 3 km tui jalan cim par. Hadei di tuk glai njauk jah tak, urang jakar khik iek glai meng thau, mai ini pasang iek, ngak biên bản. Ong Trần Tuấn Dũng, Akaok trạm khik iek glai Tân Thuận lang yah ka bruk suai damuai ini: Suai thau  kayua manuac di Trạm takik. Pak trạm ini hu tok dua adei sa-ai min mong iek jaik 2.600 héc-ta. Manuac di kol dahlak parabha gauk di rilo labik atah di gauk. Njauk pasang iek taong abih địa bàn, nan ye gaok tuk mai bruk jah tak glai suai thau.

Jabat po glai nan lac Ban khik iek khu glai tamo Takuh hu taduan trách nhiệm lac oh nao pasang iek samar drah piah rah tabiak bruk nan. Hadei di tuk duah mboh, Ban khik iek khu glai tamo Takuh hu pambuak bruk haong Chi cục Lâm nghiệp Bình Thuận, Hạt Kiểm lâm huyện Hàm Thuận Nam, UB bhap bini xã Tân Thuận gam haong dom jabat chức năng di puk palei nao pasang iek tapak labik rah tabiak, ngak hồ sơ tui iek saong urak ini daok cang mek dom urang jah tak glai.

Ong Võ Hữu Phương, Phaok akaok iek gah Khu khik iek glai tamo Takuh brei thau: Tukvak jaik di ini pak xã Tân Thuận hu mehit lac Tiểu khu 302A hu neh tabiak gah langiu quy hoạch 3 janih glai. Dalam tuk nan taneh pala thanh long daok tagok yaom, bruk pablei salih taneh riya suan adat hukum dom mblang taneh apuh klak jaik di nan daok rah tabiak ralo. Oh daok sahneng tal adat hukum, dom urang nan klaik dauk tame jah tak glai meblah taneh glai piah pala thanh long. Ong Phương lac: Meng bruk nan nyu ngak jeng labik pandiak di tiểu khu 302. Dalam tukvak katut panak duah mboh hu 5 bruk gam san ủi taneh gam jah tak phun glai. Anak bruk yau nan, jabat ini jeng brei patagok bruk pasang iek, ngak hồ sơ ieu dom jabat chức năng xử lý tui njauk adat hukum.

Urak ini, Ban khik iek glai tamo Takuh hu ngak hồ sơ akaok mereip, payua ka UB bhap bini xã Tân Thuận, Hạt Kiểm lâm huyện Hàm Thuận Nam gam haong dom jabat chức năng huyện Hàm Thuận Nam ieu pambuak bruk pasang iek, duah dom urang jah tak glai piah xử lý tui njauk adat hukum. Yaom lac urang nan ngak hagait, bhap bani atau urang jakar puk palei, meyah mboh lac hu pambuak pagam tal bruk jah tak glai ye njauk taong phạt tui adat hukum di karja.

Khu khik iek glai tamo Takuh, huyện Hàm Thuận Nam, tỉnh Bình Thuận hu padang tagok meng thun 1996 praong abih tih 10.503 héc-ta, daok dalam dom xã: Hàm Minh, Hàm Cường, Tân Thành, Tân Thuận, Thuận Quý saong bal sit  Thuận Nam. Dom labik jaik taphia haong khu khik iek ini daok cakrok patagok khang phun thanh long. Kayua YAU nan ye, meyah oh langyah catang  dom urang jah tak glai di dom labik pandiak di Tân Thuận, lih mek glai pala phun thanh long meda ba tal bruk srau dhau pambak tal dom labik karei./.