Bình Thuận pala thanh long hacih caga raok darak pasal đẳng cấp

    -Urak ini, piah plaih pambak tame darak pasal mengkan, rilo urang nong di tỉnh Bình Thuận  khang hatai buh jien tame pala thanh long tui tiêu chuẩn an toàn GlobalGAP (peih bruk ngak nong siam di dunya). Gah ngak nong Bình Thuận  thau lac, ini jalan nao oh salih karei hu piah paglaong chất lượng saong yaom di janih kaya nong praong di tỉnh. Kadha vak “ pala thanh long hacih piah caga raok darak pasal đẳng cấp” di Việt Quốc urang vak daok di ban raya Hồ Chí Minh ndom ka jalan nao barau ini:

 -Sang ông Nguyễn Quốc Nguyên Vũ daok di xã Hàm Minh, huyện Hàm Thuận Nam kak kajap saong bruk pala thanh long meng labaih 20 thun tapa. Mboh yaom thanh long pala tui jalan mengkan trun tagok srau kadau, 3 thun dahlau, ông Vũ  salih tapa pala thanh long hacih. Trang trại thanh long hacih Phúc An di ông Vũ urak ini hu 25 héc-ta hu baoh pablei tapa dom taneh ia : New Zealand, Hàn Quốc saong Cananada... Ông Vũ bahrau pala pabak 20 héc-ta, patagok taneh pala thanh long tui tiêu chuẩn GlobalGAP di trang trại jeng 45 héc-ta. Ông Vũ, pô trang trại Phúc An brei thau: “Tui drei mboh, urang nong njauk thau ngak ka thanh long di drei hu chất lượng jang piah paglaong yaom pandap meng bruk pala tui tiêu chuẩn GlobalGAP atau tui jalan hữu cơ, piah oh pagam pambak tame darak pasal mengkan.” 

-Quy trình pala GlobalGAP brei hu kỹ thuật glaong saong hu bruk khik iek catang meng pasang iek tal  paik baoh saong buh tame kadung pablei tabiak taneh ia lingiu. Tui jalan ngak ini, beir pala GlobalGAP karei jang duk saong beir bình thường. Taneh beir rabha jeng yaok khu, yaok lô tui thứ tự taong số cambaih laih piah mbuan  pasang iek saong khik ramik jeng ye thau hu asal di nyu tuk hu bruk kandaong labaih jru khik caga phun pala atau hu ruak rah tabiak.

-Di trang trại Sơn Trà, huyện Hàm Thuận Nam, meng taneh pala labaih 20 héc-ta, dom urang ngak pasang iek beir tui sa jalan ngak bài bản. Dom bruk ngak beir yau drak khak, kakak dhar, pruh ia…jeng hu urang gah kỹ thuật vak cambaih tui yaok libik saong hu ngak catang. Saai Nguyễn Hữu Phương, khik iek gah kỹ thuật di Trang trại Sơn Trà lac : “Thanh long hacih lac thanh long kan si ngak, pablei tapa dom taneh ia hu darak pasal kan tame. Darak pasar nan urang caong ngak catang meng tuk pala, tal tuk paik baoh, khik ramik, chế biến, pajeng ba. Kayua yau nan ye, nyu hu  yaom glaong.

-Urak ini, lingiu dua trang trại praong hu angan lac Hoàng Hậu saong njam patam baoh traoh Bình Thuận, labaih pluh trang trại karei di tỉnh Bình Thuận jeng daok jhul khang bruk pala thanh long hacih ka kinh te glaong, ndalam nan njauk ndom tal: Gia Thành, Phúc An, Sơn Trà... Jaik abih baoh pala hu jeng hu pablei tapa dom darak pasal kan tame yau : Đức, Canada, Hàn Quốc, Nhật Bản, Ấn Độ...ngan saong yaom tani tanat jaik 30.000 đồng 1 kg.

-Tui Sở ngak nong saong patagok palei pala Bình Thuận, dalam tỉnh urak ini hu 220 hecta thanh long tui tieu chuẩn ini. Gah ngak nong tỉnh ba tabiak jalan lac meng ini tal thun 2020 njauk pataom tame pala thanh long tui tieu chuẩn an toàn piah peih praong bruk pablei tabiak darak pasal kan tame. Barau ini, rajaei Úc jeng brei adat blei thanh long Việt Nam. Bruk ini peih tabiak jalan veik ka urang pala thanh long hacih.

    -Dalam tỉnh Bình thuận urak ini hu jaik 27.000 héc-ta thanh long, baoh jaik meteh triệu tấn sa thun, min rilo meng pablei tapa Trung Quốc tui jalan tiểu ngạch. Maong rah tapa, taneh pala thanh long tui jalan an toàn GlobalGAP daok takik duk saong pren khang urak ini. Min, dang anak jalan mbeik drei tame dunya, ini lac jalan nao kajap. Dom urang nong nao dahlau dalam bruk salih jalan ngak klak, khang hatai buh jien tame pala drak tui jalan ngak nong an toan, daok peih tabiak jalan nao barau ka janih kaya nong praong ini di tỉnh Bình Thuận./.