Labaih 10 thun klak palei negar Kiên Giang nao padang mbang ngui di palei Trí B, xã Krông Na, huyện Buôn Đôn, sang ông Danh Quân, bangsa Khơ mer hu patruh kathaot, hu raidiuk tani tanat. Hadar veik dom harei akaok mereip mai pak ini, ông Danh Quân brei thau, raidiuk di bhum taneh barau biak kan kandah. Oh hu jien ngak mbang, sang ông tok mbang njam, mbang bu diuk tapa harei. Akoak thun 2015, sang ông Quân hu đồn biên phòng Sê Rê Pôk daong sa yau limo piah raong palimek.

Gam saong nan, urang jakar, urang lin di đồn bhian mai ravang, tacei pato alamu raong glang, caga ruak. Mbang pablei limo akaok meti, ông laba hu jaik pluh triệu đồng. Hu jien gam saong dom alamu hu meng tuk daok di palei, ông pala hareik vil val beir pablak haong labaih 200 phun quýt saradang, buh jien ngak jalan pruh ia tự động di bilan thu, raong pabak pabui glai piah hu jien mek tame. Ông Quân khan lac, meng hu bộ đội biên phòng jia saong abih hatai daong, sang ông hu pabak pren piah yam tagok, gam cakrok kinh te sang gam pachreih dom sang karei ngak tui piah ba gauk tabiak truh kathaot: Gah bộ đội biên phòng jeng jaik tabhia saong bhapbini. Drei lac urang daok pak atah mai ini, jeng kham merat yam tagok. Hu limo dalam var raong, jeng kham merat pala hareik ini dhiah piah raong  ka hu kein laba piah mikva urang mboh urang jia tame piah hadei ini mikva drei ngak tui, kham merat ba gauk yam tagok patruh kathaot.

Oh lac hu sang ông Danh Quân, rilo sang karei di xã tapeng negar  Krông Na, huyện Buôn Đôn jeng taduan hu bruk daong di đồn biên phòng Sê Rê Pôk. Trung tá Lê Hải Thanh, Chính trị viên đồn biên phòng Sê Rê Pôk brei thau, đồn hu padang rilo mo hinh daong urang bhapbini patagok kinh te yau raong limo binai, raong limo palimek…Piah padang hu hatai jia di urang bhapbini, dom urang jakar, urang lin di đồn hu pilih dom sang ngak iek dalam bruk patagok kinh te piah ngak mẫu dahlau. Meng di nan peih bruk pathau khan tapak di dom mô hình điểm piah mikva hu mboh, hu pang tapak saong paglaong kein laba bruk pathau khan: Peih ngak danakdak bộ đội biên phòng padang ngak palei pala barau, đồn hu trun tal 15 palei, buôn, padang mô hình raong limo palimek saong raong limo binai. Tui nan jak ba bhapbini di đơn vị daong dom sang raong hu 15 drei limo binai saong dua drei limo palimek. Tapa dom mo hinh bruk daong urang bhapbini ye dom urang jakar, urang đảng di dom palei, buôn patagok hu libik dang akaok dalam bruk khik caga an ninh biên giới jeng ye dak padang kinh te.

Krông Na lac xã kathaot bhum tapeng negar di huyện Buôn Đôn, tỉnh Đắk Lắk, hu lingik tasik kan kandah, taneh riya thuligu, yau nan ye bruk daok dang saong pala drah di mikva gaok rilo kan kandah. Oh lac daong mikva patagok kinh te, bộ đội biên phòng daok daok hu daong urang bhapbini hu ia hacih piah pandar.

Amuk H Aly Ê Ban, bangsa Ê Đê, daok di buôn Ea Mar, xã Krông Na brei thau, dahlau dhiah piah hu ia pandar, urang bhapbini dalam buôn njauk nao biak tah piah mek ia mai pandar. Ia di kraong craoh lac nerak, daok kuac bingun ye tok pandar hu dalam bilan hajan bo ia daok metham. Meng thun 2012, buôn Ea Mar hu mban jak ba “ baoh sang ka urang kathaot labik tapeng negar” tỉnh Đắk Lắk (mintri Quốc phòng) alin brei bingun ia khoan saong bể padang ia, bruk ia  pandar ka mikva hu langyah ngak ka thei jeng mboh bui sambai.

-Xã Krông Na urak ini hu jaik 1.500 sang urang bhapbini gam saong labaih 5 rabau 500 urang di 13 bangsa. Meng hu bruk sangka daong di dom pakat saong di bộ đội biên phòng daok dalam huyen yau nan ye dom thun tapa, yaom lac daok gaok rilo kan kandah min raidiuk di urang bhapbini dak harei dak hu siam tagok, jien mek tame kuhria rah tapa tui yaok akaok menuac hu labaih 12 triệu đồng/sa thun.   

Oh lac ngak siam bruk khik caga an ninh bhum taphia negar, dom urang lin quân hàm xanh di đồn biên phòng Sê Rê Pôk daok kham merat daong mikva xã Krông Na, huyện Buôn Đôn duah hu jalan nao piah patagok kinh te, pasiam raidiuk. Meng ini, urang bhapbini hu raidiuk tani tanat, abih hatai pambuak saong dom gah chức năng pataom tame khik ramik an ninh trật tự, khik caga chủ quyền biên giới taneh ia.

Thúy Linh