Tui kuhria mboh dahlau, pandiak bhang tua riya di tỉnh Binh Thuan daok dui atah tal bilan 6. Tua riya khang yau nan  ngak ka bruk kurang ia dak trak. Anak bruk nan, bol bhap Cam di huyện Bac Binh thau duah halau ia piah pala drak, raong glang saong piah pandar.

     Di dom palei Cam huyen Bac Binh, tinh Binh Thuan piah hu ia pruh ka phun thanh long dalam dom harei langik pandiak bhang yau ini, dom baoh sang mikva hu buh jien tame blei mac jamriah njuk ia daok kandaong veik dalam dom danao, bingun. Daok dom baoh sang oh hu ia piah pruh ka phun pala ye kuac bingun ia. Sang sa-ai Lư Tôn Hoài Nhân daok di palei Bình Thắng, xã Phan Hòa, huyen Bac Binh brei thau, urak ini bein thanh long labaih 300 got daok tabiak baoh, min ia pruh urak ini thu abih. Piah daong ka bein thanh long di drei diuk hu, sa-ai Nhân buh tabiak jaik 10 triệu đồng piah kuac bingun. Patuah ka sang sa-ai, kuac sa mbang dalam trun labaih 15 mét ye hu ia.

Oh patuah yau baoh sang sa-ai Nhân, baoh sang ong Thổ Bảo hu bein taphia nan hu dua mbang kuac bingun min oh hu ia. Kuac mbang ka klau dalam trun jaik 20 mét meng hu ia, min ia njom likhun mesram. Ong Thổ Bảo brei thau:

“ Thang dahlak hu kuac tha baoh bingun hu ia min mbak kayua njom likhun…”

Meng hu bingun ia nan bo sang ong Bảo hu ia pruh ka labaih 500 got thanh long daok tabiak baoh saong hu ia menyum  ka taphon limo jaik 10 drei.

Padiak bhang tua riya dui atah, oh lac ngak kurang ia pruh, ia menyum ka taphon limo pabo pabe bo daok ngak brei kurang ia pandar di mikva. Piah hu ia pandar ka baoh sang di drei, rilo mikva Cam labik ini brei kuac bingun atau kuac veik bingu ia klak di sang drei. Min, kayua pandiak bhang dui atah yau nan ye dom bingun ia thu abih, oh ginup ia pandar yaok harei. Anak bruk ini, rilo baoh sang eng drei  kuac rok bingun duah ia meng jalan ia hacih. Ong Lâm Gia Nghĩa daok di palei Bình Mỹ, xã Phan Thanh, huyện Bắc Bình, tỉnh Bình Thuận lac: “…Thang dahlak buh tame labaih 4 trieu ndong mek ia hacih tame sang piah pandar.”

Meng hu pambuak bruk khang kajap di karja palei saong Thủy điện Đại Ninh, Thủy điện Bắc Bình saong dom danao, binek padang ia yau nan ye bruk peih kareik ia ka dom sang mac di huyen Bac Binh hu lagaih. Ndem ka bruk nan, ong Lâm Ngọc Tình, Akok dhar peih ia Bac Binh, tinh Binh Thuan brei thau:

 “ Mbiah tal tukvak ini urang dang akaok UB bhap bini huyen Bac Binh jeng yau gah thủy nông njauk gauk brei ia ka gah peih ia Bac Binh tal luac abih bilan 6. Daok hadei di ini oh ka thau yau halei. Min jia lac tal bilan 6 meda hu hajan.”

Anak bruk langik pandiak bhang thu lagu dui atah, piah hu ngak padai bialn hè thu thun 2016 di huyện Bac Binh, tinh Binh Thuan hu caga bloh dom jalan ngak. Di dom mbalng taneh mbuan kurang ia pruh, karja pachreih mikva salih tapa pala dom janih phun takik pruh ia yau ratak lagaih saong taneh riya di yaok bhum palei. Ong Trần Ngọc Tân – Phó Akok Ub bhap bini huyen Bac Binh, tinh Binh Thuan brei thau:

“ Tui kuhria puac bilan 5 akaok bilan 6 meda hu hajan, meyah njauk yau nan, huyen brei dui atah tukvak trun pajaik padai bilan hè thu thun 2016 suai jang 15 harei dut saong bilan he thu thun 2015. Daok jalan ngak ka 2, tui kuhria mboh dahlau tal bilan 9 meng hu hajan ye huyen brei ngak dua vu min. Daok meyah dalam huyen hu hajan di puac bilan 4 akaok bilan 5 ini, ye brei ngak klau vụ yau yaok thun. Hu 3 jalan ngak yau nan.”

Urakini,  pandiak bhang jeng daok rah tabiak.  Gam saong bruk kham merat di dom jabat chức năng ye bhap bini njauk ngak tui panuac kakei di gah ngak nong, saong brei sami samar dalam bruk pacang pandiak bhang piah trun takik khat lahik ka bilan hè thu./.