Bruk barau di palei Cam Bình Sơn

         Mikva Cam di xã Bình Sơn, huyện Long Thành, tỉnh Đồng Nai hu labaih  120 sang ngan saong  800 menuac, daok di dua ấp 5 saong  6. Mikva Cam di ini tui Islam saong hu sa baoh sang megik, sa baoh Surao . Yaom lac raidiuk daok rilo kan kandah, min mikva Cam Bình Sơn tuk halei jeng thau jum pataom gauk, anit ranam gauk saong ngak siam dom sarak di Đảng, hukum di Karja. Dalam tuk pahadar 42 thun harei  gah meraong negar hu peih paha, Hanipha urang vak di rayo sap ndom VN daok di ban raya HCM hu kadha vak ndom ka bruk salih barau radiuk di mikva Cam di in, daa mikva saong grauk yut tui pang :

-Jalan tame Bình Sơn harei ini hu tuh menyek jangaih siam nao tapa bein phun cao su praong, hijao. Puk palei mikva Cam hu tamuh tagok rilo baoh sang barau gam saong dom công trình menyek truac saong ia pandar hacih. Duk saong 40 thun dahlau, raidiuk mikva hu salih barau njauk uan tabuan. Dahlau daih dalam dom thun 1976 – 1985, tuk barau mai ini padang mbang ngui, mikva Cam daok pak ini pak thiah, raidiuk gaok rilo kan kandah. Tal thun 1999, tuk hu huyen Long Thành rami ramik ngak jeng puk, jeng palei tui danakdak daong di karja, mikva dak harei dak tani tanat raidiuk.

 -Tuk vak ini,  mikva rilo meng tame ngak cong nhan di nông trường cao su Bình Sơn saong ngak công nhân di dom công ty, xí nghiệp karei dalam xã. Dom urang daok veik lac pablei salih, raong glang saong pala drak di sang. Piah daong dom adei saai kumei Cam pasiam raidiuk, Uy mban bhapbini xã Bình Sơn pambuak bruk saong Gilang pariak sarak karja daong ka rilo sang mikva hu mesraiy jien yaom laba lap piah ngak mbang. Barau ini, dhar kapul urang kumei Cam puk palei hu tacei adei saai hu mesraiy phun jien meng danakdak 129 kayua taneh ia Bỉ daong piah raong glang saong pablei salih sit, ba jalan mbuan lagiah ka mikva patagok kinh te. Meng nan, raidiuk di mikva dak harei dak tani tanat, rilo sang blei hu dom pandap piah pandar dalam sang, blei radaih patuhpiah nao mai.

Ia mbaok di bhum taneh thu lagu dahlau diah, harei ini hu salih barau ralo. Mikva Cam Bình Sơn urak ini oh daok huac eik, kathaot, kurang pandap mbang, ia menyum ya dahlau thiah. Langiu dom jalan nao mai mbuan lagaih, Bình Sơn daok hu balai  y tế hu rilo thiết bị barau. Libik cong nghiep Bình Sơn di xã Lộc An taphia nan oh lac ba bruk ngak ka mikva Bình Sơn bo daok pachreih hu rilo công nhân urang Cam mai meng dom tỉnh An Giang, Đồng Nai saong ban raya HCM.

Bruk bui sambai praong abih di mikva lac karja  hu daong ka  mikva padang sang megik Al Islah, abih labaih 500 trieu dong saong tal thun 2012 karja  hu jak ba dom mạnh thường quân dalam tỉnh rik daong padang ngak sang ilimo bhapbini abih 1 tỷ 200 trieu dong ka mikva hu libik pataom, me-in. Langiu di nan, anek kamuan di mikva daok hu bac akhar Cam di sang Megik piah khik ramik ilimo bangsa.

 Dom harei - bilan siam di mikva yau ye bilan eik Ramadan, harei Roya, karja hu mai rivang saong alin pandap ka dom sang kan kandah. Sang megik hu peih bruk pakacah bac Qur’an, lang hukum, daong gah adat cambat ka mikva Cam nao ngak rukun haji di palei Mecca (Á Rập Saudi). Ông Nguyễn Bá Phúc, Akaok uy mban Mặt trận negar xã Bình Sơn, huyện Long Thành, tỉnh Đồng Nai lac : Xãk halei jeng daong palagaih, oh lac bangsa halei jeng ba gauk dak apdang puk palei siam jang, raidiuk di mikva dak harei dak tagok, bruk bac daa di mikva jeng hu glaong meng cao đẳng tal đại học. Dom urang kumei nao ngak công nhân xí nghiệp hu jien bilan meng 5 triệu 500 rabau đồng tal 7 triệu đồng, raidiuk mikva biak tani tanat.

-Dalam bui sambai pahadar 42 thun harei gah meraong negar hu peih paha, mikva Cam Bình Sơn pachreih anek taco oh padheih bac megru, kham merat ngak mbang patagok kinh te, ilimo, xa hoi…Urak ini hu rilo dam dara, urang đảng ranaih umo urang Cam daok ngak bruk di dom công trường, xưởng mac di palei Bình sơn. Hu rilo urang ranaih umo karei daok bac megru di dom sang bac cao đẳng, đại học jeng daok caong khin tuk bac blaoh mai daong ka puk palei.

-Yam tagok haong taneh ia, palei Cam Bình Sơn oh padheih patagok kinh te, ilimo, xã hội. Mikva Cam di ini daok kham merat pasiam raidiuk, kham merat hu labaih jien padai, drap ar, brei ka anek bhik nao bac da-a, paglaong ilamu piah harei hadei rik pren ka palei negar.