Bruk njauk caik hatai akaok meti tuk bahrau mai tal Khu dân cư ấp Trà Sết, xã Vĩnh Hải, bal sit Vĩnh Châu, tỉnh Sóc Trăng nan lac 200 baoh sang hu padang ngak sa kiểu dak jeng talei atah. Taphia di nan lac jalan điện, jalan nao mai, blai pabak ia hacih hu padang ngak biak siam.

Taduan raok khaol dahlak dalam baoh sang bahrau khang kajap dalam khu dân cư, sa-ai Kim Thị Hol bui sambai khan lac, meng hu bruk daong brei baoh sang, sa-ai hu labik daok tani tanat, urak ini dua diuk pasang tok thau kham merat ngak mbang. Sa-ai Hol brei thau, pasang nao ngak pah, daok sa-ai nao  duah mek ariang, mek bao, ikan, yaok harei jeng duah hu labaih 200.000 đồng. Meng meteh thun ini mai, jien duah hu grap tanat jang, khaol dahlak jeng thau patak pataom bahrau blei hu sruh radaih patuh piah ndik nao mai. Dahlau diah daok jaik taphia kraong ribaong, oh hu taneh padang ngak sang nan ye biak kan kandah. Hu karja brei taneh, brei sang mboh bui hatai ralo, drei jeng oh daok huac bruk anek bhik di drei mblung aia tra. Urak ini tok daok kuhria ngak mbang duah jien blei brah, kuhria ka nek mbang bac. Daok pak diah gam glaih ramik pasiam sang danaok, gam kuhria bruk mbang huak di anek bhik, harei hu harei oh biak duh hatai.

Jeng lac sa dalam dom sang urang bangsa takik, rai diuk kan kandah hu daong brei sang daok di khu dân cư Trà Sết, sa-ai Thạch Thị Khai khan lac, labiah 3 thun tok gauk, diuk pasang sa-ai daok dalam baoh sang kreim hala taik tahak, padang ngak angaok taneh di amaik ame. Harei tapa harei, dua diuk pasang nao duan bao, mek nghêu, mek ikan tok caong pablei ginup jien piah cai pandar dalam sang, yau nan min rai diuk tuk halei jeng kurang anak kurang likuk. Urak ini tapa daok di labik bahrau, sa-ai peih tiệm tạp hóa sit piah gam daok pak sang mong anek, gam pablei piah duah jien tame. Daok pasang nao peih radaih ka sa công ty nan ye sang sa-ai jeng hu grap tanat. Sa-ai Khai hadar veik dom harei akaok mereip bahrau tame labik daok bahrau: Mai daok pak ini uan tabuan ralo. Tuk mahit thông báo tame daok drei uan ralo, huac tame trễ oh daok sang. Tuk nan drei nao dahlau min oh ka hu điện, oh ka hu aia, tal dua klau hadei meng hu điện hu aia, karja palei mboh drei tame daok nan ye samar ba điện brei piah hu pandar.

Dự án grap tanat labik daok ka dom baoh sang urang bangsa takik ấp Trà Sết, xã Vĩnh Hải hu mblang taneh prong jaik 90 ha; dalam nan taneh daok meblah labaih 6ha. Hadei di jaik 2 thun peih ngak, di kreh thun 2016, khu dân cư hu ngak salah blaoh, palaghaih ka 200 baoh sang hu labik daok, grap tanat rai diuk. Gam haong nan lac hệ thống điện jalan, sang bac, balai iek ruak, aia hacih duh ka bruk ngak mbang ngak huak di mikva. Dự án hu phun jien Trung ương daong 35 tỷ đồng, phun jien tỉnh 2 tỷ đồng. Urak ini hu jao brei ka dom baoh sang mbang tui sarak tame daok.

Amuk Nguyễn Thị Mỹ Nhiên, phaok akaok Ủy ban bhap bani bal sit Vĩnh Châu, tỉnh Sóc Trăng brei thau, bruk grap tanat labik daok, rai diuk ka 200 baoh sang di khu dân cư Trà Sết hu tác động biak prong ngan haong puk palei. Ini lac bhum bãi ngang tapen tasik, baoh sang kathaot daok hu ralo, bruk hu labik daok tani tanat meda daong ka mikva sanang hatai piah ngak mbang, yam tapa truh kathaot, daong khik caga siam mekre an ninh chính trị, trật tự an toàn xã hội saong patagok kinh tế di puk palei. Khu dân cư Trà Sết padang tagok, hu brei labik daok tani tanat ka bhap bini, ngan haong bal sit Vĩnh Châu ye hu tác động biak prong, daong ka mikva kathaot hu sang daok, hu taneh pala drak, palahik sang taik tahak, daong patagok kinh tế xã hội biak prong ka bal sit, abih di nyu lac bhum taneh  Vĩnh Hải.

Labaih meteh thun ngak salah blaoh saong ba tame pandar, Dự án Khu dân cư Trà Sết  hu daong ka ralo baih sang kathaot, mikva Khmer grap tanat bruk ngak mbang kinh tế. Ralo mikva brei thau, ini lac thun akaok meti mikva hu uan raok thun bahrau dalam bui sambai, chreih chai, trei sil di abih./.