Bruk “Hamu padai ar bingu” di danak dak “Khik iek jit palai padai meng cong nghe sinh thái” kayua Viện Roh duah Padai dunya (IRRI) peih ngak iek camereip di bilan padai Đông Xuân 2009-2010 di dua huyện Cai Lậy saong Cái Bè di tỉnh Tiền Giang. Bruk ngak ini pamaong tal 2 kadha praong nan lac parilo phun bingu di takai hamu saong padeih pandar jru pametai halak tuk phun padai daok sit. Meng nan, daong pakhang prein pacang ruak ka phun padai saong daong urang ngak nong takik pandar jru pametai halak. Tame bruk nan, urang nong dalam bhum hu tacei pato pala rilo janih bingu vin taom dar hamu. Tapa nan, yaok hecta patak pataom hu tal 500 ribau đồng jien blei jru khik caga phun pala saong jien apah manuac pruh jru.

Urak ini, danak dak ini daok hu ba tabiak ngak tui di Ba Ria-Vung Tau. Rilo urang ngak nong di labik ini brei thau: hamu padai jaik abih oh pruh jru halak halin bo năng suất jeng daok hu labaih 6 tấn sa hecta di bilan padai Hè Thu saong padai Mùa, daok bilan Đông Xuân meda tagok tal jaik 7 tấn, rilo jang jaik 1 tấn sa hecta dut saong bruk ngak yau bhian harei. Ong Nguyễn Hữu Sang, urang nong di HTX An Nhứt lac:

 “Lagaih di anak meta lac drei oh buh jien tabiak pala bingu, kadua lac hu daong phun jien piah ngak mbang, urang di HTX hu ngak tui ilamu birau, ini lac bruk ngak biak lagaih ka hamu di drei, kayua nyu oh hu halak halin.”

          Ilamu di urang nong tame bruk ngak ini, lac: pala dom phun tabiaik bingu mbong  saong kanyik katam bhian hu rilo phấn bingu jang saong pachreih hu rilo janih thiên địch mai mbang halak halin. Ông Trần Văn Hải, urang nong daok di xa An Nhứt, huyện Long Điền lac:

 “Hamu oh hu halak halin, gah langiu mboh rầy rilo, dom labik hu pala bingu  ye oh hu halak halin, dreih yau halak nyu tame nyuk bingu, ngak hu dalak biak njauk hatai mboh nyu laba kadrei”. 

Amuk Trần Thị Thiên Hương, Akok jabat ngak nong, Pasak Pachreih nong – Pachreih ngak kaya tỉnh BR-VT taong yaom: Ngak tui bruk nan  daong patrun nerak tachrauk alam moi truong, ngak brei sumu jalan sinh thái angaok hamu saong daok daong urang nong khik caga prein yawa, pagalong ilamu ky thuat, abih di nyu lac dalam bruk khik iek halak halin palai pajua hamu padai. Ini lac sa bruk ngak birau, lagaih saong bruk cak rok patagok bruk ngak nong khang kajap.

Bruk “ hamu padai ar bingu”  yau peih tabiak sa jalan ngak birau ramik pasiam hamu padai tui jalan patagok di bhap bini pak Ba Ria - Vung Tau.   Anak bruk pandar jru khik caga phun pala pametai halak halin bak rah dalam bruk ngak nong yau urak ini, ye bruk ngak nan lac bruk siam biak njauk ngak tui./.