Saai Lưu Thị Kim Tuyến daok pak palei Cakleng brei thau : palei menyim Cakleng hu labaih 500 urang ngak gheih. Dom urang nan menyim tui bingu la, alamu mengkan : Ong amuk drei mengkan paneh tabiak piah anek taco harei hadei hu bruk ngak. Urang Cam tari tarieng, ciuk kho ngak dom blah khar bai jhik ao. Kayua mengkan oh hu jien blei khan bai. Drei pala phun papah, ngak tabiak khan bai hadei nan ngak tabiak dom pandap.  

(Nhạc Chăm nền…)

Tui dalikan Cam, po kamei Ponegar pato ka urang thau menyim. Dalikan khan lac : mengkan, meng tuk anek menuac barau hu mbaok di baok taneh lac  Pô Inưga hu trun dunya, diukrai saong urang Cam. Po pato urang kamei Cam menyim, duh sa. Amuk Phú Thị Thu, sa urang menyim naih joi di Cakleng khan : mengkan, urang kamei ly tuong njauk thau menyim. Yau nan ye, thei hu bí quyết jeng khik biak tani tanat saong tok pato veik ka anek kumei "Pô Inưgar ngak tabiak dom bingu la urang Cam. Akaok mereip lac saai Po nan ngak jeng bingu la ini. Mengkan ngak piah caik veik ka amuk akaok akeit, amuk nai. Amaik caik veik ka anek. Urak ini, urang kakuh Po nan. Amaik caik ka anek, amuk caik veik ka taco. Caik hamit hamit. Caik tal tuk drei metai meng loi "

Pô Inưgar pato urang Cam menyim, paneh tabiak bingu la, dalam nan hu dom bingu la ndung bak tam linh. Min, harei ini, oh njauk thei jeng thau ngak dom dom bingu la mengkan nan. Menyim bingu ma, thaot binguk anek cim jrim, thaot binguk thoi…thue meng tangin abih, oh hu mac dalam ini. Bingu la mengkan lac po siva. Takik mboh abih lac janih ini. Dalam palei tok hu 5 urang thau ngak. Bing la mengkan ngak kan kandah lei?

Kan kandah biak. Maong tame lac thau paje. Drei meng daok sit tal urak ini yau nan ye mboh mbuan. Baok drei pablei hu bingu mai, gar vá, tu mun…min gah halao janeng lac bingu la mengkan. Kayua ong di halao janeng hu ndam metai njauk ba janih nan meng ngak hu. Nan lac adat cambat tanarakun Cam. Baok ini biak takik hu dahlau si drei ngak drei njauk ieu yang.

Yau nan, kayua habal bingu la mengkan ndom ka po siva gilaic takik yau nan? Amuk Phú Thị Thu langyah yau ini : " Si va lac baok takoi. Mengkan oh hu bingu la halei sumu bingu la ini. Po siva ini thei blei caik dalam sang biak patoah jamo, biak khang kadang, oh hu ruak. Urang Cam njauk hu po siva meng tabiak cambaih adat cambat tanarakun Cam. Mengkan njauk urang kaya meda meng hu baok ini, urang kan kathaot oh hu lac. Mengkan, sa palei tok hu sa urang thau ngak, oh njauk ngak pambak praong lac "

Po Siva lac salam 3 urang po glaong abih hu urang Cam daok kakuh. Dalam adat cambat tanarakun di urang Cam, Po Siva hu ngak bruk khik bimong lan saong daong Po patao Cam khik caga bhapbini. Po siva hu pok kakuh meng rilo mau urang karei di gauk, ye dong nhat siva saong linga ( duong vat) atau Siva saong po patao Cam Bhadravarman, atau Siva lac urang kumei dara hu rilo gah tangin.Piah ngak jeng dom biingu la gheih meta, urang menyim njauk hu tangin ngak gheih, akaok saneng tham my. Di bruk patoh khan bai njauk ngak ka gheih tangin, oh yau nan, khan bai oh cang mịn saong kan si ngak hadah bingu la. Meng plah tangin gheih di urang menyim, dom talei mrai sit dak harei dak salih jeng blah khan bai hu suan saong sambo mblat mblat. Saai Lưu Thị Kim Tuyến brei thau "alamu menyim lac dahlau si drei menyim lac drei moc. Moc blaoh meng ba tame daneng. Tame daneng blaoh meng dak bingu la blaoh meng menyim. Theu meng tangin min"

Sambo di urang Cam pandar dom sambo hagait?

Sambo hijao, tim, kanhik, bhong hagait nan. Lai sambo tui hatai mekre di drei min. Di urang Cam sambo bhong lac sambo patuak jamo, sambo chien thang. Dom sambo karei ngak ka nyu hadah tagok, mblat mblat. Tok mengkan drei nyaom, min urak ini oh hala yau mengkan tra. Blei mrai piah mai ngak ka samal, samal tukvak. Dom talei mrai r=tok dalam ban raya ba tabiak.

Mengkan nyaom njauk nyaom yau habal?

Nyaom kan kandah. Drei paik hala mai sang blaoh drei rak. Rak blaoh, buh dom talei ko tabiak, drei nyaom , min tok hu sambo jhuk saong bhong min. Sambo patih lac papah patih paje nan ye mek ka ngak sambo patih.

Dahlau thiah, piah hu sambo jhuk, urang menyim Cam njauk nyaom khan bai meng hala chùm bầu, hadei nan tram saong gluh lada 7 harei 7 melam. Takre hu sambo bhpng njauk nao duah nhựa gan dam dalam glai, panduh phun chàm…urak ini, urang menyim tok blei dom talei mrai hu nyaom sambo blaoh ba tame daneng menyim./.