Padang mbang ngui meng dua palak tangin saoh, meng tari tareng, khin saneng, khin ngak, sa-ai Bế Ích Hiển, bangsa Tày daok di palei Khau Hoa, xã Bế Triều, huyện H òa An, tỉnh Cao Bằng padang hu labik ngak mbang praong ngak ka menuac urang mboh mahu. Kadha vak di Chu Hiểu angaok harak  báo Thông tấn xã Việt Nam. 

       Hadei di tuk khin gauk, diuk pasang sa-ai Bế Ích Hiển saong Triệu Thị Hải gaok oh takik kan kandah, jien mek tame pagam pambak tame dom sào hamu. Hadei di ralo melam saneng duah, njauk ngak hagait piah tapa truh kathaot, thun 2005, sa-ai khang hatai nao mesre di gilang pariak 30 triệu đồng piah padang ngak van ro raong glang, salih janih phun pala. Sa-ai Hiển mboh lac, meyah pala padai ye abih 4 bilan, pala njam patam tok abih meng dua tal klau bilan min jien mek tame rilo jang klau tal pak mbang. Kayua yau nan ye, sa-ai palih ruah phun njam patam piah pala cak rok patagok kinh tế baoh sang.

     Lingiu di bruk pala njam patam, sa-ai Hiển daok padang van ro, pandar khoa học kĩ thuật tame raong pabui. Urak ini, sa-ai padang ngak hu 8 talei van ro ngan haong 16 ô, raong 9 drei pabui binai, pabak pabui pajaih. Yaok thun, sa-ai Hiển raong dua lứa pabui, pablei hu yaok tấn rilo pabui.

     Sa-ai Hiển brei thau, tukvak akaok mereip, bruk raong pabui gaok ralo kan kandah kayua oh ka thau pandar khoa học kĩ thuật, phun jien buh tame ngak daok takik, jit ruak ralo. Tukvak hadei, sa-ai duah thau, bac megru ilamo meng dom hội viên karei ka bruk pala drak, raong glang nan ye hu grap tanat saong hu jien mek tame . Meng jak jeng di drei, sa-ai klah rabha ilamu ka dom hội viên dalam palei bac megru ngak tui saong kham merat jak ba dom hội viên ngak kaya nong hacih pambuak pagam haong bruk pacang khik môi trường, ba bruk ngak ka mikva dalam palei, patagok jien mek tame ka sang drei. Urak ini, sa-ai hu daong ka 12 hội viên hu bruk ngak saong daong sa baoh sang kathaot phun jien saong pajaih.

     Oh njauk hatai haong dom bruk ngak hu, kham merat ngak meda jang angaok bhum taneh palei drei, sa-ai Hiển daok roh duah, bac megru kĩ thuật pala saong patagok pajaih jadhar Thái Lan. Ini lac pajaih brei baoh prong, yamen saong hu darak pasar takre blei. Thun 2016, sa-ai Hiển mek hu 25 triệu đồng meng bruk pablei jadhar. Sa-ai Hiển brei thau, dom thun hadei, sa-ai meda peih prong bruk pala jadhar piah patagok jien mek tame ka baoh sang. Bruk raong glaong, salih janih phun pala hu jak jeng siam mekre hu ba jien tame ka sang sa-ai meng  600 - 700 triệu đồng sa thun. Tal urak ini, meng kein laba di bruk cakrok patagok ngak mbang pablei salih, sa-ai  Hiển blei hu labaih 6.000 m2 taneh, padang ngak sang bahrau biak praong, siam, blei hu ralo drap ar hu yaom saong raong dua urang anek mbang bac ginup abih. Ndom ka sa-ai Bế Ích Hiển, ong Hoàng Vĩnh Tường, Phaok akaok Uỷ ban bhap bani xã Bế Triều, huyện Hòa An ndom lac, sa-ai Hiển lac sa kareih camin hadah dalam bruk urang nong ngak mbang pablei salih naih jioy di xã Bế Triều. Meng thau ba khoa học kĩ thuật tame bruk ngak mbang pala drak, sa-ai hu jalan piah peih prong, dak padang dom mô hình patagok kinh tế karei, rik daong tame bruk patagok kinh tế di puk palei. Ini lac mô hình ba mai kein laba glaong, njauk caik ka dom hội viên urang nong bac megru saong ngak tui.

      Meng dom jak jeng di drei, thun 2016, sa-ai Hiển hu hadah mbaok meta lac sa dalam 7 urang nong di tỉnh Cao Bằng hu Thủ tướng Raja-ei pok brei Harak meyaom ka bruk urang nong ngak mbang pablei salih naih jioy./.