Dalam baoh sang ton khang kajap di ong Tòng Văn Phanh saok di palei Thẳm, phường Chiềng Sinh, ban Sơn La hu biak ralo pandap panda meng lát hu pak meng tangin. Bruk njauk biai nan lac dom pandap yau chiếc ép khẩu, giọ, lếp, gaiy havei ia jeng hu ong Phanh ngak oh lac nao blei. Ong Phanh lac: 

“Dom pandap ini sang ngak meng lavik ye, lac bruk ngak meng kan di ong muk caik veik, ame drei caik veik ka drei drei brei bac, camereip pak jeng biak kan, hadei ini drei randap bloh mboh pak jeng mbuan min”   

Dalam sang di urang Thái, bruk pak lát lac bruk di urang likei. Kayua yau nan ye, meng sit ong Phanh hu ong nội saong ame pato pak dom pandap panda dalam sang, meng dom pandap mbuan ngak tal pandap kan ngak ye ong jeng thau pak saong pak biak siam. Yaom lac pandap piah ngak dom janih yau ép khẩu, giọ, lếp, gaiy havei ia… jeng hu dalam glai, min palih ruah yau habar piah ngak hu pandap pak siam, kajap oh lac mbuan, brei thau mek dom phun krem, la-a oh taha lo, oh meda lo, oh luh jung. Tuk ba mai jeng oh caik lavik kayua phun thu, mok mbang kan blah saong oh khik hu độ limin.

Duah thau, mboh lac, bruk pak di urang Thái jeng biak rilo janih, bhap bini bhian palih ruah kiểu pak tui pandap kuhria ngak, yau pak canaih ye pak nóng mốt, nóng đôi atau pak ô vuông. Daok dom pandap yau salao lisei, ép khẩu, yot caik jrim cih di adei saai kamei ye hu pak chéo atau pak hình quả trám piah ngak mekre ka pandap.

Min, meng hu dom pandap meng katak, mẫu mã gheih mekre yau urak ini, ye bruk pak piah pandar oh daok hu ralo bhap bini palih ruah yau dahlau. Ong Tòng Văn Phanh daok di palei Thẳm, phường Chiềng Sinh, ban Sơn La brei thau:

“Bruk ini dahlau kayau ong muk amaik ame drei, lac bruk meng kan, bloh tal rai drei, urak ini tal dom anek taco, lac haong kol nyu ong taha ye, oh pak hu nan ye dom taco drei patui ngak”.

Meng tari tarieng, gheih ngak, bhap bini bangsa Thái hu yuk suan yava tame krem, tame la-a ngak jeng dom pandap giản dị min hu kein lagaih, hu makna praong dalam rai diuk yaok harei di bhap bini bhum ceik. Tapa oh thau hadom tuk trun, tagok, tal urak ini bruk pak lát di bhap bini bangsa Thái daok di Sơn La jeng daok hu khik, yaom lac di baoh sang. Min, taong abih dom baoh sang, dom urang ngak saong diuk meng bruk pak lát tuk halei jeng caong khin lac bruk pak lát meng kan hu patagok piah rik daong khik ramik sa bruk ngak meng kan ndung bak ilamu di bangsa drei angaok bhum taneh Tây Bắc./.