Pathau mikva saong taong abih gauk! Hu sa bruk ngak meng kan daok hu mboh meng lavik samar dalam bhap bini Raglai saong hu khik ramik mbiah tal harei ini, nan lac bruk pak lat. Ngan saong dom pandap yau: gùi, nia, haning, chapi… hu daong ka mikva patagok jien mek tame ka baoh sang, gam ba bruk ngak, gam khik kajap ilamu meng kan di bangsa drei.

Kol dahlak hu saai Phạm Văn Luyện, Phaok akaok UB bhap bini xã Phước Chiến (huyện Thuận Bắc, tỉnh Ninh Thuận) yaih khan ka sa palei ngak meng kan di puk palei. Atah di pasak xã jaik 5km tui jalan roya 706, palei ngak  puk Tập Lá mboh di anak meta kol dahlak. Ong Katơr Hiệu, urang kak kajap saong bruk ngak meng labaih 30 thun brei kol dahlak thau, bruk pak nia, gui, haning… lac bruk ngak meng kan di palei. Tuk ong ndih tapui tabiak ye hu thau bruk ini, min tapa thun bilan, bruk ngak meng kan di mikva Raglai daok lahik nao. Min, ralo bhap bini puk palei jeng kham merat khik veik bruk ngak meng kan di ong muk caik veik.

Thun 2011, UB bhap bini tỉnh tabiak Quyết định 2246/QĐ-UBND harei 7-10-2011brei bruk daong patagok palei ngak,  padang angan pandap di tỉnh NT tukvak 2011-2015, mikva labik ini biak bui sambai, chreih chrai, hu peih tabiak jalan patagok ka palei ngak meng kan daok lahik nao. Ong Phạm Văn Luyện daok brei thau lac: hadei di tuk hu Quyết định di UB bhap bini tỉnh, xã hu palih ruah palei Tập Lá piah ieu pataom bhap bini, ginum meyai padang palei ngak di labik ini. Tapa labaih 4 thun, palei ngak hu daong piah peih 2 tal pato megru bruk pak lát, hu mbaok tame 5 mbang nyaom drak parang iek, daong yaih khan pandap, daong brei mesraiy phun jien, padang tổ pambuak bruk palei ngak thủ công mỹ nghệ. Meng nan pachreih hu ralo mikva hu mbaok tame palei ngak, dom pandap ngak di labik ini patagok tui yaok thun. Thun 2015, hu labaih 8.000 pandap hu ngak tabiak, dalam nan ralo di abih lac gui, nia, haning, tó.. Meda ndom lac,  dalam tukvak tapa  dom urang ngak hu mbaok tame palei ngak dak thun dak rilo jang, tal urak ini hu labaih 100 urang ngak nghề. Jien mek tame meng bruk pak lát meng 50 tal 70 ribau đồng sa harei sa urang.  

Saai Đạo Thiên Vũ, Phaok Jabat Kinh tế-Hạ tầng huyện Thuận Bắc, brei thau: piah ka palei ngak di Tập Lá samar hu công nhận, biak caong bruk hu mbaok di bhap bini saong urang jakar labik ini. Huyện Thuận Bắc biak caong dom sở, ngành tacei pato cambaih laaih quy trình dak padang saong quy hoạch bhum nguyên liệu ka plei ngak; padang labik parang iek pandap, thiết kế mẫu mã, padang angan di palei ngak; daong duah labik pablei, pambuak saong doanh nghiệp, kak bruk ngak pandap saong pablei pandap palei ngak.

Hu yau nan, palei ngak Tập Lá meng patagok, rik daong khik ramik ilamu meng kan, peih tabiak jalan nao barau, ba bruk ngak ka urang ngak palei pala./.