Bruk raong pabe lai Bachboer  di mikva urang nong tỉnh Ninh Thuận

Pathau mikva urang ngak nong ! Meng labik lac mbuan raong, pren pacang caga ruak siam, pablei hu yaom nan ye dom thun jaik ini rilo sang di xã Phước Hậu,huyện Ninh Phước salih tapa raong pabe lai Bachboer, ba mai kei laba glaong duk saong raong pabe di puk palei. Kol drei duah thau bruk raong pabe lai Bachboer  di mikva urang nong tỉnh Ninh Thuận, tapa kadha “ urang ngak hamu thau “ harei ini. 

   Thun 2013, sang ông Hồ Năng, akaok palei Trường Sanh, xã Phước Hậu hu daong 6 drei pabe pajaih Bachboer (1 tano, 5 binai) meng danakdak dự án pachreih nong cải tạo tapol pabe. Tapa tukvak raong, urak ini, tapol pabe lai Bachboer di sang tagok hu labaih 100 drei. Ông Hồ Năng khan lac : duk saong raong pabe Bách Thảo, ye raong pabe Bachboer hu rilo siam lagaih jang, langiu di bruk mbuan si raong, pabe ini daok mbang hu hala medar, hala nho, saong pabe ini nyu takik ruak, menek samal, yaom kinh te jeng glaong jang, yaok thun jien mek tame meng raong pabe Bachboer di sang ong hu labaih 100 triệu đồng.

Daok saai Phạm Thị Hồng, palei Trường Thọ, xã Phước Hậu jeng lac sang raong pabe lai Bachboer hu kein laba glaong. Meng raong janih pabe ini, sang saai  jeng sang hu ginup meda di puk palei. Saai brei thau :  pabe lai Bachboer nyu mbang siam, menek samal,  yaok thun menek meng 1 -2 mbang, yaok mbang meng 1 -2 drei, pabe trak meng labaih 3 kg tal 5kg sa drei, pabe praong trak jaik 100-150kg. Sang saai raong 40 drei, yaok thun mek jien tame jaik 100 triệu đồng, meng nan bo hu jien raong anek mbang bac saong blei pandap pandar dalam sang.

Thun 2010, meng phun jien daong di Dự án meriak gauk ngak nong, Tổ hợp tác sản xuất pajaih pabe lai Bachboer xã Phước Hậu hu padang tagok. Akaok mereip hu 12 sang pataom mbaok tame ngan saong 72 drei pajaih, phun jien labaih 420 triệu đồng, dalam nan yaok sang hu dự án đầu tư 6 drei pajaih, tui yaom jien abih tih labih 35 triệu đồng sa sang, langiu di nan, dom sang daok hu tacei pato kỹ thuật, bruk pasang iek …

   Ong Nguyễn Như Hùng Triết, Phó akoak uy mban bhapbini xã Phước Hậu, brei thau : siam lagaih di pajaih pabe lai Bachboer lac menek siam, samar praong, takik jit ruak, mbang hu rilo janih hala kayau, pandap mbang mbuan duah, hu rilo dalam palei, hu darak pasal takre, yaom glaong duk saong pabe puk palei meng 18-20%. Abih di nyu nan lac dom thun tapa, taneh pala phun medar tagok biak khang ba mbuan lagaih ka dom sang raong pabak pandap mbang ka tapol pabe. Kuhria tal urak ini, dalam dom sang pala medar hu tal 85%  hu raong pabe Bachboer, mboh rilo abih di dua palei Trường Thọ saong Trường Sanh, sang raong takik abih lac 5 drei, rilo lac labaih 100 drei. Meda ndom lac, bruk raong pabe di xã Phước Hậu hu paeih tabiak jalan patagok kinh te lagaih haong puk palei, paglaong jien mek tame ka bhapbini, tapa nan rik daong tame bruk padang ngak palei pala bahrau dalam xã./.