Hadei di ralo thun nao ngak bruk duah jien di dom bal praong, sa-ai Võ Sỹ Phúc klak bal mai palei padang mbang ngui meng bruk raong pabo. Ini lac sa quyết định táo bạo, kayua dahlau di nan oh ka hu urang nong halei di tỉnh Quảng Ngãi raong janih athur ini. Khaol drei duah thau ka mô hình raong pabo ba mai  kein laba glaong di sa-ai Võ Sỹ Phúc, tapa kadha “Urang ngak hamu caong thau” harei ini.

Hu daok saong ngak bruk pak bal raya Hồ Chí Minh min oh ginup diuk. Sa-ai klaak mai palei, lac anek di urang nong, nan ye bruk raong glang oh kan kandah hagait ngan haong sa-ai, min palih ruah drei hagait, anek hagait piah raong, piah salih bahrau hu rai diuk lac kadha oh mbuan. Dalam tuk saneng kuhria, sa-ai quyết định raong pabo. “Ini lac athur raong oh ka hu di Quảng Ngãi, meyah drei lac urang raong akaok meti meda hu siam lagaih”. Meng jien phun akaok mereip jaik 50 triệu đồng, puac thun 2015, sa-ai tame tal bal Phan Rang-Tháp Chàm (Ninh Thuận), bhum taneh pandiak angin thu lagu, lac palei di pabo, piah blei 16 drei pabo ba mai sang ngak van ro raong glang.

Langiu di bruk bac megru ilamu raong pabo meng dom urang nao dahlau pak Ninh Thuận, internet nan lac jalan daong ka sa-ai duah thau ilamu raong glang jeng yau meyaih khan sản phẩm di drei. Tapon pabo di sa-ai hareik hagait, hala kayau di labik halei jeng mbang hu, saong daok hu klauc jru pacang caga jit ruak saong brei mbang pabak patau khoáng chất, tapol pabo prong samar. Tui sa-ai Phúc, hadei di 2 bilan raong, yaok drei pabo di sa-ai teik trak 16 kg, trak jang 6 kg dut haong pabo raong pak Phan Rang. Tal urak ini, sa-ai hu 30 drei pabo binai saong 7 drei pabo tano. Yaok drei binai menek meng 1 – 2 drei, kaoh bloh jien buh tabiak, yaok thun sa-ai laba hu  jaik 100 triệu đồng meng jien pablei pabo. Ini lac yaom jien oh sit dut haong bhap bani di Mộ Đức urak ini. Gam nao tal dom nhà hàng, quán mbang piah meyaih khan, gam quảng bá pabo angaok Facebook, dom drei pabo di sa-ai dak harei dak hu ralo manuac urang thau tal. Ralo urang daok brei mboh hatai pok meyaom bruk ba akaok nao dahlau, khin saneng khin ngak di sa-ai.

Pok meyaom bruk jak jeng di mô hình raong pabo, ong Phạm Văn Thọ, Phaok Akaok Ủy ban bhap bani huyện  Mộ Đức,  tỉnh Quảng Ngãi taong yaom: Bruk raong pabo ba mai  kein laba glaong dut haong dom janih athur raong karei. Anak tal, karja pachreih mikva pambk prong bruk raong ini saong pok panuac tagok karja daong brei mesre phun jien piah raong, piah patruh kathaot saong cakrok patagok kinh tế./.