Piah hu aia pruh ka phun thanh long dalam dom harei pandiak bhang, dom baoh sang hu buh jien tabiak blei mac bơm, pataom mek aia daok kandong veik dalam dom danao, bingun. Dom baoh sang oh caga hu aia pruh ka phun pala ye ba gauk kuac raok bingun. Sa-ai Lư Tôn Hoài Nhân, daok pak palei Bình Thắng, xã Phan Hòa, huyen Bắc Bình brei thau, bein thanh long labaih 300 got daok tabiak baoh, min ia pruh thu abih. Piah khik bein thanh long, sa-ai Nhân buh tabiak jaik 10 triệu đồng piah kuac bingun. Biak patuah jamo, bahrau sa mbang kuac dalam labaih 15 mét ye hu aia. Oh patuah jamo yau sang sa-ai Nhân, sang ong Thổ Bảo hu bein daok jaik taphia nan, tal mbang kuac ka 3 dalam jaik 20 mét meng hu aia, min ia nyaom lakhun. Ong Thổ Bảo brei thau: Aiai nyaom lakhur, nan ye njauk njuk mek aia ba tame danao ka nyu kandong lakhur piah pruh ka phun thanh long saong nyaom patam karei karei. Aia takik, nan ye drei njauk buh jien tabiak ngak hệ thống pruh aia patak pataom. Oh pruh bal glai bal klo yau dahlau diah. Meng nan, baoh sang ong Bảo kuhria hu harei pruh ka labaih 500 got thanh long daok tabiak baoh saong hu aia menyum ka tapol limo jaik pluh drei.

       Ralo sang brei kuac bingun atau kuac veik bingun klaak. Min kayua pandiak bhang dui atah nan ye dom baoh bingun nyu thu abih, oh ginup aia pandar yaok harei. Anak bruk yau nan, mikva duah mek aia meng halau aia hacih palei pala. Ong Lâm Gia Nghĩa, daok pak xã Phan Thanh, huyện Bắc Bình brei thau: “Yaom lac sang dahlak daok jaik kraong Lũy, baoh kraong prong, min tal bilan ini jeng thu abih, nan ye sang mek aia meng hệ thống aia hacih palei pala piah pandar, labaih 4 triệu đồng. Meng nan oh daok huac kurang aia pandar, mboh aia jeng hu tani tanat”. Meng hu bruk pambuak gauk siam di raja-ei puk palei haong ban khik iek dom thủy điện Đại Ninh, Bắc Bình saong dom baoh bingek kavei padang aia nan ye bruk ba aia mai ka dom sang mac dalam huyện Bắc Bình hu peih ngak siam. Ngan haong dom mblang taneh ngak padai oh caga hu aia pruh, karja pachreih mikva salih tapa pala dom janih phun tamuh hu dalam pandiak yau phun ratak, laghaih haong taneh riya di yaok bhum palei./.