Pathau mikva saong taong abih gauk! Kuhria meng akaok thun tal in, di ban sit Cần Thơ rah tabiak rilo mbang glut jaleih khang, ngak ka 4 baoh sang di bhap bini daok di quận Cái Răng, huyện Phong Điền saong quận Ô Môn laik trun kraong. Kadha vak di Phạm Hải, urang vak di Rayo sap ndom VN daok di bhum taneran kraong brei thau ka bruk nan:.

MBan Chỉ huy pacang caga bala meng lingik tasik saong duah urang njauk bala ban sit Cần Thơ brei thau: Kuhria meng akaok thun tal ini, Cần Thơ hu  9 mbang glut jaleih khang, ngak ka 4 baoh sang di bhap bini laik trun kraong saong rilo jalan palei njauk ia ba seik, ngak kan kandah tal bruk ngak mbang saong nao mai di bhap bin. Urak ini, di rilo quận, huyện daok hu rilo labik mbuan glut jaleih dalam tukvak anak tal, abih di nyu nan lac dalam quận Ô Môn.

Bahrau ini, di quận Ô Môn rah tabiak 2 mbang glut jaleih khang ngak ka sa  cây xăng saong sa jalan njauk ia ba seik. Dahlau nan, harei 28/5 cây xăng di sang amuk Bành Thị Ánh Hồng daok di Thới Phong, phường Thới An jaleih trun kraong.

Amuk Hồng brei thau: dahlau nan 1 harei, sang saong labik pablei xăng menyek di amuk mboh ra-ai talah atah nan ye sang amuk samar ba pandap tabiak nao gah lingiu. Tal harei hadei ye nyu jaleih, drap ar njauk ia ba seik ihik abih labaih 200 triệu đồng. Tui maong mboh di urang vak kol dahlak, labik glut jaleih ini atah jaik 30m saong mbang dalam tame gah labaih 5m, hu ia nduac khang, dalam gah ala labaih 15m.

Dahlak ndih mehit patau jaleih, tabiak iek meng mboh daning nyu talah tabiak, bloh ieu dom sa-ai trun iek mboh lac nyu jaik glut jaleih.

Lac urang hu sang daok jaik labik cây xăng bahrau njauk ia ba seik, ong Võ Hồng Đức, umo 75 thun brei thaut: Sang ong daok di labik ini meng rilo rai ini mai min oh ka mboh glut jaleih khang yau urak ini. Baoh sang di ong jeng daok mbleing nao gah takai kraong, urak ini taong abih bruk ngak mbang ngak huak di sang hu ba tabiak gah anak kayua oh thau tuk halei sang nyu jaleih trun kraong. 

Urak inidrei mboh nyu jaik jaleih tal ye, njauk duah labik karei padang sang veik. Huac lo oh ndih dalam sang,huac melam nyu jaleih anek taco nduac oh hu ye metai abih.

Atah di nan oh hadom di labik Thới Trinh A, phường Thới An, labik canah  3 ribaong Tầm Vu nduac tabiak kraong Ô Môn jeng rah tabiak bruk glut jaleih ngak klaoh sa jalan, mbang dalam tame sang di ong Cao Văn Lăng. Ini lac mbang glut jaleih ka 3 kuhria meng tuk sang ong mai daok di labik ini, mbang glut jaleih ini khang di abih.

4 thun dahlau, sang ong buh tabiak yaok rituh triệu đồng piah pasiam labik glut jaleih anak sang min hu dom bilan ye glut jaleih khang jang, dalam labaih 10m. Labik jaleih gah anak lac jalan nao mai di yaok rituh sang. Urak ini, bhap bini daok di labik ini daok glaih glar kayua njauk nao tapa hẻm sit piah tabiak jalan praong, kayua labik glut jaleih lac jalan nao mai di bhap bini.

Dalam quận Ô Môn daok lac labik mbuan hu glut jaleih, ngak kan tal bruk ngak mbang ngak huak di rilo sang. Ong Tống Huy Hoàng, akaok jabat Kinh tế saong Hạ tầng quận Ô Môn brei thau: Dalam quận hu jaik 30 labik glut jaleih praong sit atah abih tih 3.000m, tukvak tapa rah tabiak 4 mbang glut jaleih khang di phường Thới Hòa saong Thới An. Anak bruk glut jaleih daok rah tabiak khang yau urak ini, Quận hu buh brei labaih 3 tỷ piah pasiam dom labik glut jaleih, daong panduan ba pandap ka bhap bini…Daok suai livik ye pok panuac caong pabak jien ngak bờ kè piah khik caga salamat ka menuac sia saong drap ar di dom sang daok di labik mbuan glut jaleih.

Yaom lac bahrau tame bilan hajan min bruk glut jaleih di Cần Thơ saong dom tỉnh bhum taneran kraong CL daok rah tabiak khang, rilo sang di bhap bini njauk ia ba seik, mbuan metai menuac saong lihik drap ar di bhap bini. Biến đổi khí hậu saong bruk mek cuah rilo dalam tukvak tapa ngak salih jalan ia nduac, ngak brei glut jaleih dak harei dak khang jang. Anak bruk glut jaleih yau urak ini, dom palei njauk hu dom jalan ngak siam, drah samar piah khik caga siam mekre ka menuac sia saong drap ar di bhap bini daok di bhum mbuan hu glut jaleih./.